CNI International News
ဝါရှင်တန်၊ သြဂုတ် ၅
မြောက်ကိုရီးယားသည် ရုရှားကို ယူကရိန်းစစ်ပွဲအတွင်း အသုံးပြုနိုင်မည့် လက်နက်ခဲယမ်းများ အပါအဝင် စစ်ရေး အကူအညီများ ထောက်ပံ့ပေးရန် စဉ်းစားနေသည်ဟု အမေရိကန် အမျိုးသားလုံခြုံရေးကောင်စီ (NSC) အရာရှိ တစ်ဦးက ပြောကြားခဲ့ကြောင်း The Korea Times မှ ဖော်ပြခဲ့သည်။
အမေရိကန်သည် ယူကရိန်းကို တိုက်ခိုက်နေသည့် ရုရှား၏ တရားမဝင် စစ်ပွဲကို ထောက်ပံ့ပေးမည့် အားထုတ် ကြိုးပမ်းမှုများအပေါ် ပိတ်ဆို့မှုများ ဆက်လက် ချမှတ်သွားမည်ဟု NSC ၏ မဟာဗျူဟာ ဆက်သွယ်ရေး ညှိနှိုင်း ဆောင်ရွက်ရေး အရာရှိ ဂျွန်ကာဘီ (John Kirby) က ပြောသည်။
"ရုရှားကာကွယ်ရေးဝန်ကြီး ဆာဂျေရွိုင်ဂူ (Sergei Shoigu) ဟာ မြောက်ကိုရီးယားဆီက လက်နက်ခဲယမ်းများ ဝယ်ယူဖို့အတွက် မကြာသေးခင်က မြောက်ကိုရီးယားကို သွားရောက်ခဲ့ပါတယ်" ဟု ကာဘီက ပြောသည်။
အမေရိကန် အမျိုးသားလုံခြုံရေးကောင်စီ (NSC) အရာရှိ ဂျွန်ကာဘီကို တွေ့ရစဉ်
ပြီးခဲ့သည့် သီတင်းပတ်က ရုရှားကာကွယ်ရေးဝန်ကြီးသည် မြောက်ကိုရီးယားတွင် ပြုလုပ်ခဲ့သည့် ကိုရီးယားစစ်ပွဲ အဆုံးသတ်သည့် နှစ်ပေါင်း ၇၀ ပြည့် အထိမ်းအမှတ် အခမ်းအနားသို့ တက်ရောက်ရန် ပြုံယမ်းမြို့တော်သို့ သွားရောက် ခဲ့သည်။
"ကျနော်တို့ ရထားတဲ့ သတင်းတွေအရ ရုရှားဟာ DPRK ဆီက လက်နက်ကြီး ကျည်ဆန်တွေ ဝယ်ယူဖို့နဲ့ DPRK နဲ့ ရုရှားအကြား စစ်ရေး ပူးပေါင်းဆောင်ရွက်မှုတွေကို တိုးမြှင့်ဖို့ ကြိုးပမ်းနေတာကို သိရပါတယ်" ဟု ကာဘီက မြောက်ကိုရီးယား၏ တရားဝင် အမည်ဖြစ်သည့် ကိုရီးယား ဒီမိုကရက်တစ် ပြည်သူ့သမ္မတနိုင်ငံ (Democratic People's Republic of Korea) ၏ အတိုကောက် DPRK ကို ရည်ညွှန်း ပြောကြားခဲ့သည်။
ယူကရိန်းတပ်ဖွဲ့များသည် ရုရှားထံ သွားရောက်မည်ဟု ယူဆရသည့် သင်္ဘောတစ်စင်းပေါ်မှ မြောက်ကိုရီးယားလုပ် ရော့ကက်များကို စီးနင်းရမိခဲ့သည်ဟု Financial Times သတင်းစာက ဖော်ပြခဲ့ပြီးနောက် ကာဘီ၏ ပြောကြား ချက် ထွက်ပေါ်လာခြင်း ဖြစ်သည်။
မြောက်ကိုရီးယား ခေါင်းဆောင်ကင်မ်က ရုရှားကာကွယ်ရေး၀န်ကြီး ဆာဂျေရွိုင်ဂူကို လက်နက်တွေ ပြသနေစဉ်
"မြောက်ကိုရီးယားနဲ့ ရုရှားအကြား လက်နက်ရောင်းဝယ်ရေး သဘောတူညီချက်တွေဟာ ကုလသမဂ္ဂ လုံခြုံရေး ကောင်စီရဲ့ ပြဋ္ဌာန်းချက်တွေကို တိုက်ရိုက်ချိုးဖောက်မှု ဖြစ်ပါတယ်"ဟု ကာဘီက သတင်းစာရှင်းလင်းပွဲတွင် ပြောကြားခဲ့သည်။
ရုရှားသည် မြောက်ကိုရီးယားထံမှ လက်နက်များကို မှီခိုနေရခြင်းသည် ရုရှားသမ္မတ ဗလာဒီမာပူတင် (Vladimir Putin) နှင့် ရုရှားအစိုးရ၏ ဆိုးရွားသည့် အခြေအနေကို ဖော်ပြရာ ရောက်နေသည်ဟုလည်း ကာဘီက ပြောသည်။
"ပူတင်ဟာ ယူကရိန်းစစ်ပွဲအတွက် မြောက်ကိုရီးယားနဲ့ အီရန်နိုင်ငံတွေဆီက လက်နက်တွေကို ဝယ်ယူနေပြီး တရုတ်ရဲ့ လက်နက်တွေကိုလည်း ဝယ်ယူဖို့ ကြိုးစားခဲ့တာ သေချာပါတယ်"ဟု ကာဘီက ပြောကြားခဲ့သည်။
Source: The Korea Times
