![](/images/jfgjfghjfjhgjfg.jpg#joomlaImage://local-images/jfgjfghjfjhgjfg.jpg)
- By CNI
- Category: လူမှုဘဝ
- Hits: 2463
CNI International News
ဘာရီ၊ ဇွန်လ ၁၇
အီတလီဝန်ကြီးချုပ် ဂျော်ဂျီယာ မယ်လိုနီ (Giorgia Meloni) သည် ၂၀၂၂ ခုနှစ်က စတင် တာဝန်ထမ်းဆောင် ခဲ့ချိန်ကတည်းက ၎င်း၏ ရှေးရိုးစွဲအယူဝါဒကို ပြသခဲ့သလို မကြာသေးမီက အီတလီတွင် ပြုလုပ်ခဲ့သည့် စက်မှု ထိပ်သီးခုနစ်နိုင်ငံ (G-7) ညီလာခံတွင် ထိုရှေးရိုးစွဲအယူဝါဒကို ထပ်မံဖော်ပြခဲ့သည်ဟု ရိုက်တာမှ ဖော်ပြခဲ့သည်။
ပြီးခဲ့သည့် သီတင်းပတ်က ပြုလုပ်ခဲ့သည့် G-7 ညီလာခံတွင် မယ်လိုနီက မိသားစုအရေးကိစ္စများ၊ မျိုးပွားမှုဆိုင်ရာ အခွင့်အရေးများနှင့် ပတ်သက်ပြီး ၎င်း၏ တရားသေ ကိုင်စွဲထားသည့် ရှေးရိုးစွဲအယူဝါဒကို အလျှော့ပေးမည် မဟုတ်သည့် အကြောင်းကို ထုတ်ဖော်ပြသခဲ့ခြင်းဖြစ်သည်။
ဇွန်လ ၁၃ ရက်မှ ၁၅ ရက်အထိ ပြုလုပ်ခဲ့သည့် G-7 ညီလာခံတွင် ထိန်းချုပ်ခံထားရသော ရုရှား၏ ပိုင်ဆိုင်မှုများကို အသုံးပြုပြီး ယူကရိန်းအတွက် ဒေါ်လာဘီလျံချီ ချေးငွေထောက်ပံ့မှုများ၊ တရုတ်နှင့် ကုန်သွယ်ရေးတွင် ဖြေရှင်းရ မည့် အကြောင်းအရာများကို အဓိကထား ဆွေးနွေးခဲ့သည်။
ထိုအရေးကိစ္စများတွင် G-7 အဖွဲ့ဝင်များအကြား တူညီသည့် သဘောတူညီမှုများရရှိခဲ့ပြီး ကမ္ဘာလုံးဆိုင်ရာ စိန်ခေါ် မှုများကို ရင်ဆိုင်ဖြေရှင်းရာ၌ အနောက်နိုင်ငံများ၏ စည်းလုံးညီညွတ်စွာရှိမှုကို ချီးကျူးခဲ့ကြသည်။
အီတလီဝန်ကြီးချုပ် ဂျော်ဂျီယာ မယ်လိုနီနဲ့ ပြင်သစ်သမ္မတ မက်ခရွန်ကို တွေ့ရစဉ်
ထို့နောက် အီတလီသည် မမျှော်လင့်ဘဲ G-7 နောက်ဆုံး ကြေညာချက်ထဲမှ ဘေးကင်းလုံခြုံစွာနှင့် တရားဝင် ကိုယ်ဝန်ဖျက်ချမှုဆိုသည့် အကြောင်းအရာကို ဖယ်ရှားရန် အပြင် ကာကွယ်ဆေး ရန်ပုံငွေများနှင့် ပတ်သက်ပြီး ရေးသားထားသည့် အသုံးအနှုန်းများအား ပြင်ဆင်ဖော်ပြရန် တောင်းဆိုခဲ့သည်ဟု သံတမန်များက ထုတ်ဖော် ပြောဆိုခဲ့သည်။
ကိုယ်ဝန်ဖျက်ချခွင့်နှင့် ပတ်သက်ပြီး မယ်လိုနီနှင့်အခြား G-7 အဖွဲ့ဝင်နိုင်ငံများအကြား သဘောထား တိုက်ဆိုက်မှု မရှိခဲ့ဘဲ မယ်လိုနီသည် အီတလီ၏ အလှည့်ကျဥက္ကဋ္ဌ တာဝန်ကို အသုံးချပြီး ၎င်း၏ ရှေးရိုးဆွဲ အယူအဆကို အ လျှော့မပေးဘဲ ထိုအကြောင်းအရာကို ကြေညာချက်ထဲမှ ဖယ်ရှားရန် တောင်းဆိုခဲ့ခြင်းဖြစ်သည်ဟု သံတမန် များက ပြောသည်။
“မယ်လိုနီဟာ ကိုယ်ဝန်ဖျက်ချမှုကို ဆန့်ကျင်သူဖြစ်ပြီး အရင်ကလည်း အခုလို ဆန့်ကျင်ခဲ့ပါတယ်။ ဒီအကြောင်းအရာဟာ သူ့အတွက် အလျှော့မပေးတဲ့ အကြောင်းအရာ ဖြစ်ပါတယ်။ ကျနော်တို့က ကိုယ်ဝန် ဖျက်ချခွင့်ကို တရားဝင်ဖြစ်ဖို့ လုပ်ဆောင်ခဲ့ပေမယ့်လည်း G-7 ဥက္ကဋ္ဌနေရာကို ယူထားတဲ့ အီတလီက မလုပ်နဲ့ဆိုရင် မလုပ်ရတော့ပါဘူး” ဟု အမည်မဖော်လိုသည့် ဥရောပသံတမန်တစ်ဦးက ပြောကြားခဲ့သည်။
ဥရောပနှင့် အမေရိကန်ရှိ ရှေးရိုးစွဲ အုပ်စုများကဲ့သို့ပင် မယ်လိုနီ၏ Brtothers of Italy ပါတီသည် ကိုယ်ဝန်ဖျက်ချ မှုကို ဆန့်ကျင်ခဲ့ပြီး အစဉ်အလာရှိသည့် မိသားစု စံတန်ဖိုးများကို မြှင့်တင်ရန် တိုက်တွန်းလျက်ရှိသည်။
Source: ရိုက်တာ
![](/images/jymhhfyhmkfkmdkmd.jpg#joomlaImage://local-images/jymhhfyhmkfkmdkmd.jpg)
- By CNI
- Category: လူမှုဘဝ
- Hits: 461
CNI News
၂၀၂၄ ခုနှစ်၊ ဇွန်လ ၅
တရုတ်၊ ထိုင်း၊ မလေး၊ ဒူဘိုင်း၊ တိဘက်၊ ဆော်ဒီ အစရှိသော ပြည်ပနိုင်ငံအသီးသီးသို့ လူကုန်ကူးခံရမှုဖြစ်စဉ်သည် ယခင်ကထက် ပိုမိုများပြားလာကြောင်း လူကုန်ကူးခံရသဖြင့် အကူအညီတောင်းခံလာသူများအား ကူညီ ဆောင် ရွက်ပေးနေသူများက CNI သတင်းဌာနသို့ ပြောသည်။
လက်ရှိတွင် ၃ လအတွင်း လူကုန်ကူးခံရသဖြင့် လိုက်ပါဆောင်ရွက်ပေးရသော အမှုအရေအတွက်သည် ယခင်က တစ်နှစ်အတွင်း လိုက်ပါဆောင်ရွက်ပေးရသည့် အမှုအရေအတွက်နှင့် ညီမျှနေကြောင်း၊ လူကုန်ကူးခံရသူများတွင် ဒေသခံ၊ နယ်ခံ ယုံကြည်ရသူများမှ အဓိက လုပ်ဆောင်ကြခြင်းဖြစ်ကြောင်း လူကုန်ကူးခံရသူများအား ကူညီ ဆောင်ရွက်ပေးနေသူ မမျိုးမျိုးအေးက CNI သတင်းဌာနသို့ ပြောသည်။
၎င်းက “ပိုပြီးတော့များလာတယ်။ တရုတ်တို့ ဒူဘိုင်းတို့ဆိုရင်လည်း ပိုပြီးတော့ များလာတယ်။ အခုပစ်မှတ်ထား တာကတော့ နယ်ကလူတွေပေါ့။ နောက် တစ်ခါစက်မှုဇုန်မှာ နယ်ကနေ တက်လာပြီးတော့ information အတိအကျ မရနေဘူးဆိုတဲ့ လူတွေကို ပစ်မှတ်ထားတယ်။ နောက်တစ်ခါ ကျမတို့ကိုင်တဲ့ case တော်တော်များ များမှာ ဒေသခံပေါ့ နယ်ခံ အဲဒီနယ်ခံ တစ်ယောက်က ထိုင်းကိုရောက်နေမယ်၊ တရုတ်ကို ရောက်နေမယ်၊ မလေး ကို ရောက်နေမယ်၊ အဲဒီကနေ တစ်ရွာလုံးကို အချိတ်အဆက် ပေးလိုက်တာပေါ့။ ဒီမှာလုပ်ခလစာ ၃ သိန်းဆိုရင် ဟိုမှာ ၁၀ သိန်းတို့ ဟိုမှာက ၅ သိန်းတို့ ဟိုမှာက ၇ သိန်းတို့၊ သွားမယ့်သူတွေကို အမြဲတမ်းပြောတယ် ဟိုမှာက ၁၀ သိန်းဆိုရင် နေမှုစရိတ်နဲ့ သွားမယ့်ဟာတွေက ဘယ်လိုလဲ။ ကိုယ်ကသွားဖို့အတွက်ကို ဘာတွေရောင်းချ ပေါင်နှံ သွားရမှာလဲ။ သွားတဲ့လူတွေက အဲဒီလိုအသေးစိတ် analyst လုပ်ပြီး ချိန်ထိုးပြီးတော့ ဒါမျိုးမစဉ်းစားတော့ဘူး။ နိုင်ငံခြားသွားရင် အဆင်ပြေတယ်ဆိုတဲ့ စိတ်နဲ့သွားတာ” ဟု ပြောသည်။
မြန်မာများကို စစ်ဆေးနေစဉ်
လူကုန်ကူးခံရသည့် ဖြစ်စဉ်များတွင် စင်္ကာပူ၊ မကာအို စသည့် နိုင်ငံများ၌ အလုပ်ရရှိမည်ဟုဆိုကာ လူခေါ် စုဆောင်းပြီးနောက် ဒူဘိုင်း၊ အိုမန်၊ တိဘက်၊ ဆော်ဒီ အစရှိသည့် နိုင်ငံများသို့ အိမ်အကူအဖြစ် လုပ်ကိုင်ရန် ပို့ဆောင်ကြခြင်းဖြစ်ကြောင်း လူကုန်ကူးခံရသူများအား ကူညီဆောင်ရွက်ပေးနေသူများထံက သိရသည်။
ထိုသို့ အိမ်အကူအဖြစ် လုပ်ကိုင်ကြရာတွင် အိမ်ရှင်များ၏ လိင်ပိုင်းဆိုင်ရာ စော်ကားမှုဖြင့်လည်း ကြုံတွေ့ကြရ ကြောင်း၊ လူကုန်ကူးခံရသည့် ဖြစ်စဉ်များနှင့်ပတ်သက်၍ သက်ဆိုင်ရာ၊ ဌာနဆိုင်ရာများဘက်မှ လိုက်ပါ ပူးပေါင်း ဆောင်ရွက်ပေးမှုသည် မရှိသလောက် နည်းပါးကြောင်းလည်း ၎င်းတို့က ပြောသည်။
လူကုန်ကူးခံရမှု ကြုံတွေ့ရသူများမှာ ကျေးလက်ဒေသနှင့် တိုင်းရင်းသားလူမျိုးများ အဓိကအများဆုံးဖြစ်ကြောင်း လူကုန်ကူးခံရသူများအား ကူညီဆောင်ရွက်ပေးနေသူ ကိုစိုင်းယုမောင်က CNI သတင်းဌာနသို့ ပြောသည်။
တရုတ်ပြည်သို့ သွားရောက် အလုပ်လုပ်ကြမည့်သူများကိုတွေ့ရစဉ်
၎င်းက “တရုတ်ဘက်တွေကိုလည်း သွားကြတယ်။ တော်တော်များများ တရုတ်ဘက်သွားကြတာလည်း ရှိကြ တယ်။ တရုတ်ဘက်ကတော့ အခုနောက်ပိုင်း မြန်မာပြည်တစ်ဝန်းလုံးက မြန်မာမိန်းကလေးတွေကို အသွား၊ အပြန် လေယာဉ်ခ ခံပေးတယ်ပေါ့နော်။ သိန်း ၇၀ မိသားစုကိုပေးမယ်။ လောလောဆယ် မိသားစုစားဝတ်နေရေး အတွက် ၁၀ သိန်းပေးခဲ့မယ်။ ကျန်တဲ့ပိုက်ဆံကိုကြတော့ တရုတ်ပြည်ရောက်တာနဲ့ပေးမယ်။ ဒီလိုမျိုးတွေပေါ့ ရောင်းစားတဲ့ပုံစံ လုပ်နေကြတယ်အခု။ အဲဒါမြန်မာနိုင်ငံက လူတွေလည်းပါတယ်။ ဟိုဘက်က တရုတ်တွေလည်း ပါတယ်။ အဲဒီတော့ ဟိုဘက်မှာ ဘာလုပ်ရမယ်ဆိုတာမျိုး မပြောဘူး။ တရုတ်မယားလုပ်ရမယ် အဲဒီလိုလည်း ကြားတယ်။ တရုတ်နဲ့နေရမယ်။ ဘယ်လောက်နေရမယ်ဆိုတာ မသိဘူး” ဟု ပြောသည်။
မြန်မာနိုင်ငံတွင် ဖြစ်ပွားသည့် လူကုန်ကူးခံရမှု အမျိုးအစားများမှာ အဓမ္မထိမ်းမြား လက်ထပ်ခြင်း၊ အဓမ္မ ပြည့်တန်ဆာပြုခြင်း၊ အဓမ္မစေခိုင်းခြင်း၊ ကလေးသူငယ် လူကုန်ကူးခြင်း၊ ကြွေးမြီနှင့် နှောင်ဖွဲ့ခံရခြင်းဟူ၍ တွေ့ရပြီး ၂၀၁၈ ခုနှစ်တွင် အငှားကိုယ်ဝန်ဆောင်သည့် လူကုန်ကူးမှုပုံစံသစ်ကို တွေ့ရှိရကြောင်း ၂၀၂၀ ခုနှစ် လူကုန်ကူးမှု တိုက်ဖျက်ရေးနေ့ဆောင်းပါးတွင် ဖော်ပြထားသည်။
ထို့အပြင် ၂၀၂၂ ခုနှစ် လူကုန်ကူးမှု တိုက်ဖျက်ရေးနေ့တွင် ပြည်ထဲရေးဝန်ကြီးဟောင်း ဦးစိုးထွဋ်က ပြည်ပသို့ လူကုန်ကူးမှုများမှာ ၈ဝ ဒသမ ၃၂ ရာခိုင်နှုန်းရှိပြီး လူကုန်ကူးခံရသူများ၏ ၅ဝ ရာခိုင်နှုန်းမှာ အမျိုးသမီးနှင့် ကလေးများဖြစ်ကြောင်း ပြောဆိုထားသည်။
![](/images/447182671_779123787726880_9082133704017378147_n.jpg#joomlaImage://local-images/447182671_779123787726880_9082133704017378147_n.jpg)
- By CNI
- Category: လူမှုဘဝ
- Hits: 1196
CNI News
၂၀၂၄ ခုနှစ်၊ မေလ ၃၁၁
နိုင်ငံတော်သြဝါဒစရိယ ရွှေကျင်နိကာယ သာသနာပိုင် အဘိဓဇမဟာရဋ္ဌဂုရု သီတဂူဆရာတော် ဒေါက်တာဘဒ္ဒန္တ ဉာဏိဿရအား အိန္ဒိယနိုင်ငံက International Award for Promotion of Buddhism (အပြည်ပြည်ဆိုင်ရာ ဗုဒ္ဓဘာသာထွန်းကားရေးဆု)ဘွဲ့တံဆိပ်ကို ၂၀၂၄ ခုနှစ်၊ မေလ ၃၁ ရက်နေ့က ဆက်ကပ်အပ်နှင်းခဲ့သည်။
အဆိုပါ ဘွဲ့တံဆိပ် ဆက်ကပ်အပ်နှင်းပွဲကို ရန်ကုန်မြို့၊ ပန်းဘဲတန်းမြို့နယ်၊ ရွှေဘုံသာလမ်းရှိ အိန္ဒိယစင်တာမှာ ကျင်းပခဲ့ခြင်း ဖြစ်သည်။
ထိုအခမ်းအနားသို့ သီတဂူဆရာတော် ဒေါက်တာဘဒ္ဒန္တဉာဏိဿရ၊စစ်ကိုင်းတိုင်းဒေသကြီး အပြည်ပြည်ဆိုင် ရာ ဗုဒ္ဓဘာသာပညာရေးစင်တာ ကျောင်းတိုက်ဆရာတော် ဦးသောဘိတ၊ ရခိုင်ပြည်နယ် အလိုတော်ပြည့်ဝိပ ဿနာ စင်တာနှင့် ကျောင်းတိုက်ဆရာတော် ဦးပညာဇောတနှင့် ဆရာတော်သံဃာတော်များ တက်ရောက်ခဲ့ ကြသည်။
နစကအစိုးရဖွဲ့တွေနဲ့ အိန္ဒိယသံအမတ်ကိုတွေ့ရစဉ်
ထို့အပြင် ပြန်ကြားရေးဝန်ကြီး ဦးမောင်မောင်အုန်း၊ သာသနာရေးနှင့်ယဉ်ကျေးမှုဝန်ကြီး ဦးတင်ဦးလွင်၊ ရန်ကုန် တိုင်းဒေသကြီးဝန်ကြီးချုပ် ဦးစိုးသိန်း၊ ရန်ကုန်မြို့တော်ဝန် ဦးဗိုလ်ဋ္ဌေး၊ မြန်မာနိုင်ငံဆိုင်ရာ အိန္ဒိယသံအမတ်ကြီး H.E.Mr.Abjay Thaku၊ Indian Council for Cultural Relations(ICCR)မှ ညွှန်ကြားရေးမှူးချုပ် H.E.Mr. Kumar Tuhin၊ ဦးနု-ဒေါ်မြရီဖောင်ဒေးရှင်းဥက္ကဋ္ဌ ဒေါ်သန်းသန်းနု၊ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ (USDP) ဥက္ကဋ္ဌ ဦးခင်ရီတို့ တက်ရောက်ခဲ့ကြသည်။
အိန္ဒိယနိုင်ငံ ယဉ်ကျေးမှုဆက်ဆံရေးကောင်စီသည် ဗုဒ္ဓဘာသာထွန်းကားရေးအတွက် ဆောင်ရွက်ကြသော နိုင်ငံခြားတိုင်းပြည်များမှ ပညာရှင်များ၊ တစ်သီးပုဂ္ဂလပုဂ္ဂိုလ်များနှင့် အဖွဲ့အစည်းများအား အသိအမှတ်ပြု ဂုဏ် ပြုခြင်းနှင့် ဗုဒ္ဓဘာသာထွန်းကားပြန့်ပွားရေးအတွက် နိုင်ငံတကာဆုကို ၂၀၂၁ ခုနှစ်တွင် စတင်ချီးမြှင့်ခဲ့သည်။
အဆိုပါ ဆုကို Otani University(Japan),Dr.Duong Thi Thanh Huong(Vietnum)နှင့် Mr. Choijamts Demberel(Mongolia)တို့အား ပေးအပ်ချီးမြှင့်ထားသည်။
![](/images/uytrterhtjyfdrsdgsd.jpg#joomlaImage://local-images/uytrterhtjyfdrsdgsd.jpg)
- By CNI
- Category: လူမှုဘဝ
- Hits: 2119
CNI International News
အစ္စလာမ်မာဘက်၊ မေလ ၃၀
ပါကစ္စတန်နိုင်ငံတွင် ဝန်ကြီးချုပ် ရှာဘက်ဇ် ရှရစ်ဖ် (Shehbaz Sharif) ဦးဆောင်သည့် အစိုးရအဖွဲ့ကို ဆောင်ကျဉ်းပေးခဲ့သည့် ရွေးကောက်ပွဲကို ပြုလုပ်ခဲ့သော်လည်း လူနည်းစု အသိုင်းအဝိုင်းများ၏ ကံကြမ္မာများသည် အလွန်ဆိုးရွားနေဆဲဖြစ်သည်ဟု Afghan Diaspora သတင်းဝက်ဘ်ဆိုက်မှ ဖော်ပြခဲ့သည်။
ဆာဂိုဒါ (Sargodha) မြို့တွင် မကြာသေးမီက ခရစ်ယာန်မိသားစုနှစ်စု တိုက်ခိုက်ခံရမှု ဖြစ်စဉ်များက ဒီမိုကရေစီ အသွင်းကူးပြောင်းပြီးနောက်မှာပင် လူနည်းစုများအတွက် လုံခြုံမှု ကင်းမဲ့နေသည့် အခြေအနေကို မီးမောင်းထိုး ပြသရာ ရောက်ခဲ့သည်။
ဆိုရှယ်ပလပ်ဖောင်းနှင့် လူမှုမီဒီယာများတွင် ပျံ့နှံ့ခဲ့သည့် ဗွီဒီယိုများထဲတွင် ဒေါသထွက်နေသည့် လူအုပ်ကြီးသည် သွေးစွန်းနေသော အမျိုးသားတစ်ဦးနှင့် အခြားသူများကို ဝိုင်းထားပြီး ပရိဘောဂများအား ရိုက်နှက်ဖျက်စီးနေသည့် မြင်ကွင်းများကိုတွေ့ရကြောင်း ပါကစ္စတန်၏ Dawn သတင်းစာက ဖော်ပြခဲ့သည်။
နောက်ထပ် ဗွီဒီယိုထဲတွင်လည်း အိမ်အပြင်ဘက်၌ ကြီးမားသည့် မီးလောင်ကျွမ်းမှုကို မြင်တွေ့ခဲ့ရသည်။
ပါကစ္စတန်အလံကို လွှင့်ကိုင်ထားစဉ်
သို့သော် ရဲတပ်ဖွဲ့ အကြီးအကဲတစ်ဦးကမူ ထိုဗွီဒီယိုများသည် အတုများဖြစ်ပြီး မည်သူမျှ ဒဏ်ရာမရခဲ့ကြောင်း ပြောကြားခဲ့သည်။
ရဲတပ်ဖွဲ့က ထိုဗွီဒီယိုများကို အတုဟု ပြောကြားနေချိန်တွင် နစ်နာသူများ၏ မိသားစုဝင်များက ၎င်းတို့မိသားစုဝင် တစ်ဦးသည် လူအုပ်ကြီး၏ တိုက်ခိုက်မှုကို ခံခဲ့ရကြောင်း ထွက်ဆိုခဲ့ကြသည်။
မေလ ၂၅ ရက် နံနက်ပိုင်းက ဆာဂိုဒါမြို့၏ မူဂျာဟစ် ကိုလိုနီ (Mujahid Colony) ရပ်ကွက်ရှိ ခရစ်ယာန် မိသားစု နှစ်စု၏ နေအိမ်များ တိုက်ခိုက်ခံရမှုတွင် မိသားစုဝင်များကို ဘေးလွတ်ရာ ကယ်တင်နိုင်ခဲ့ပြီး အမျိုးသား ၁၅ ဦး ဖမ်းဆီးခံခဲ့ရသည်ဟု Dawn သတင်းစာက ဖော်ပြခဲ့သည်။
ထိုဖြစ်စဉ်ကြောင့် ထိုဒေသတွင်နေထိုင်သည့် ခရစ်ယာန် ဘာသာဝင်များအကြား စိုးရိမ်ထိတ်လန့်မှုများ မြင့်တက်ခဲ့သည်။
ဆာဂိုဒါခရိုင် ရဲအရှိ (DPO) အာဆစ် အီဂျက် မာလီ (Asad Ejaz Malhi) ကမူ ထိုဖြစ်စဉ်များသည် ဘာသာရေးအရ အလေးအမြတ်ထားသည့် နေရာများကို မလေးမစား ပြုလုပ်သည်ဆိုသည့် စွဲချက်များကြောင့် အုံကြွခဲ့ခြင်းဖြစ်ပြီး ရဲတပ်ဖွဲ့ဝင်များကို တပ်ဖြန့်ထားသည်ဟု ဆိုသည်။
ပါကစ္စတန်ခရစ်ယာန် ဘာသာဝင်ကို တွေ့ရစဉ်
မည်သို့ပင်ဆိုစေ ပါကစ္စတန်တွင် ခရစ်ယာန်ဘာသာဝင် အသိုင်းအဝိုင်းအပေါ် ယင်းကဲ့သို့ တိုက်ခိုက်မှုများသည် ယခုအကြိမ်သည် ပထမဆုံးအကြိမ်တော့ မဟုတ်ပေ။
ပါကစ္စတန်၏ ရာဝယ်ပင်ဒီ (Rawalpindi) ဒေသတွင် အီစတာ (Easter) ပွဲတော် မတိုင်မီကလည်း ခရစ်ယာန် ဘုရားကျောင်းတစ်ကျောင်း မီးရှို့ခံခဲ့ရသည်။
"ပါကစ္စတန်ဝန်ကြီးချုပ် ရှရစ်ဖ်ရဲ့ အစိုးရအဖွဲ့သည်ဟာ လူ့အခွင့်အရေးကို ထိန်းသိမ်းပြီး ကိုင်တွယ်ဖြေရှင်းဖို့ လိုအပ်တဲ့ စိန်ခေါ်မှုတွေနဲ့ ရင်ဆိုင်နေရပါတယ်" ဟု လူ့အခွင့်အရေး စောင့်ကြည့်ရေးအဖွဲ့ (HRW) ၏ အာရှရေးရာ တွဲဖက်ညွှန်ကြားရေးမှူး ပက်ထရစ်စီယာ ဂေါ့စ်မန်း (Patricia Gossman) က ပြောကြားခဲ့သည်။
Source: Afghan Diaspora
![](/images/uiiuiuyiuiuiuiu.jpg#joomlaImage://local-images/uiiuiuyiuiuiuiu.jpg)
- By CNI
- Category: လူမှုဘဝ
- Hits: 1225
CNI International News
ဝါရှင်တန်၊ မေလ ၂၇
တရုတ်သည် ၂၀၂၅ ခုနှစ်တွင် ကျေးလက်ဒေသနေ တိဘက်လူမျိုး ၁ သန်းနီးပါးကို နေရာရွှေ့ပြောင်းပေးရန် တင်းကျပ်သည့် အစီအစဉ်များကို အသုံးပြုနေသည်ဟု နယူးယောက်အခြေစိုက် လူ့အခွင့်အရေး စောင့်ကြည့်ရေး အဖွဲ့ (HRW) က ပြောကြားခဲ့ကြောင်း phayul သတင်းဝက်ဘ်ဆိုက်မှ ဖော်ပြခဲ့သည်။
HRW ၏ “Educate the Masses to Change Their Minds: China’s Coercive Relocation of Rural Tibetans.” အမည်ရှိခေါင်းစဉ်ဖြင့် ထုတ်ပြန်ချက်တွင် တရုတ်အာဏာပိုင်များသည် ၂၀၀၀ ပြည့်နှစ်မှ ၂၀၂၅ ခုနှစ်အကြား ကျေးလက်နေ တိဘက်လူမျိုး ၉,၉၃၀,၀၀၀(၉ သန်းကျော်)ကျော်ကို နေရာရွှေ့ပြောင်း ပေးလိမ့် မည်ဟု ဖော်ပြထားသည်။
ထိုကဲ့သို့ နေရာရွှေ့ပြောင်းပေးမည့်သူ စုစုပေါင်း၏ ၇၆ ရာခိုင်နှုန်းဖြစ်သည့် တိဘက်လူမျိုး ၇၀၉,၀၀၀ ကျော်သည် ၂၀၁၆ ခုနှစ်နောက်ပိုင်း ရွှေ့ပြောင်းခံခဲ့ရသည်။
ထိုအချိန်သည် တရုတ်၏ ၁၃ ကြိမ်မြောက် ၅ နှစ်ကြာ နေရာရွှေ့ပြောင်းရေး အစီအစဉ် စတင်ချိန်နှင့် တိုက်ဆိုင် နေသည်။
နေရာရွှေ့ပြောင်းရန် လက်မှတ်ထိုးခိုင်းနေစဉ်
၂၀၁၆ ခုနှစ်နှင့် ၂၀၂၀ ပြည့်နှစ်အကြား နေရာရွှေ့ပြောင်းခံရသည့် အုပ်စုထဲတွင် လူပေါင်း ၁၄၀,၀၀၀ ခန့်သည့် ကျေးရွာအလိုက် ရွှေ့ပြောင်းမှု အစီအစဉ်၊ လူပေါင်း ၅၆၇,၀၀၀ သည် အိမ်ထောင်စုအလိုက် ရွှေ့ပြောင်းမှု အစီအစဉ်ထဲတွင် ပါဝင်ခဲ့သည်ဟု ဆိုသည်။
လက်ရှိတွင် တရုတ်အာဏာပိုင်များသည် ကျေးရွာ ၅၀၀ ခန့်မှ ဒေသခံများကို ရွှေ့ပြောင်းပေးနေသဖြင့် လူပေါင်း ၁၄၀,၀၀၀ ကျော်ကို သက်ရောက်စေခဲ့သည်ဟု ဆိုသည်။
စာမျက်နှာ ၇၁ မျက်နှာပါရှိသည့် HRW ၏ ထုတ်ပြန်ချက်တွင် မဖြစ်မနေ ကျေးရွာအလိုက် နေရာရွှေ့ပြောင်းခံခဲ့ရ သည့် တိဘက်လူမျိုးများ၏ အခြေအနေကို ဖော်ပြထားသည်။
ဥပမာတစ်ခုအနေဖြင့် နက်ဂ်ချူ (Nagchu) မြို့ရှိ ကျေးရွာတစ်ခုတွင် အိမ်ထောင်စုပေါင်း ၂၆၂ စုအနက် အိမ်ထောင်စု ၂၀၀ သည် ၎င်းတို့နေထိုင်သည့် နေရာနှင့် ကီလိုမီတာ ၁၀၀၀ (မိုင် ၆၂၀ ကျော်) ကွာဝေးသည့် နေရာသို့ ရွှေ့ပြောင်းခံခဲ့ရသည်။
ကျေးရွာသားများသည် ၎င်းတို့ သဘောဆန္ဒအလျောက် နေရာရွှေ့ပြောင်းမှုကို လက်ခံခဲ့သည်ဟု တရုတ်အစိုးရက ပြောကြားခဲ့သော်လည်း ခြိမ်းခြောက် အကျပ်ကိုင်သည့် ပုံစံများဖြင့် နေရာရွှေ့ပြောင်းခံခဲ့ရသည့် ဖြစ်စဉ်မှတ်တမ်း များကို ရရှိခဲ့ကြောင်း HRW က ပြောကြားခဲ့သည်။
HRW က တိဘက်လူမျိုးကို တွေ့ရစဉ်
ထိုကဲ့သို့ ခြိမ်းခြောက် အကျပ်ကိုင်သည့် နည်းဗျူဟာများထဲတွင် နေရာရွှေ့ပြောင်းရန် သဘောမတူသည့် ကျေးရွာ သားများကို ခြိမ်းခြောက်မှုများ၊ အဆိုပါကျေးရွာသားများအား ကောလာဟလ ဖြန့်သူများအဖြစ် စွပ်စွဲမှုများ၊ ရာဇဝတ်မှုဆိုင်ရာ ပြစ်ဒဏ်များဖြင့် ခြိမ်းခြောက်မှုများ ပါဝင်သည်ဟု ဆိုသည်။
ထို့ကြောင့် အတင်းအဓမ္မ နေရာရွှေ့ပြောင်းရေး အစီအစဉ်တွင် ပါဝင်သည့် တရုတ်အာဏာပိုင်များအနေဖြင့် နိုင်ငံတကာ စံချိန်စံနှုန်းများကို လိုက်နာပြီး နေရာရွှေ့ပြောင်းမှုကို သင့်တင့်မျှတစွာ လုပ်ဆောင်ရန် HRW က အကြံပြု တိုက်တွန်းခဲ့သည်။
Source: phayul
![](/images/hfdsfghjjhgfdsfgh.jpg#joomlaImage://local-images/hfdsfghjjhgfdsfgh.jpg)
- By CNI
- Category: လူမှုဘဝ
- Hits: 1303
CNI News
၂၀၂၄ ခုနှစ်၊ မေလ ၁၆
မြန်မာ-တရုတ်နယ်စပ်တွင် အလုပ်အကိုင် ရရှိမည်ဟုဆိုကာ မက်လုံးပေး၍ တရုတ်ဇနီးမယားအဖြစ် လုပ်ကိုင် ရန် လိမ်လည်ခေါ်ယူသည့် ဈေးကွက်မှာ ပိုမိုများပြားလာကြောင်း မူဆယ်မြို့ရှိ ပရဟိတအသင်းအဖွဲ့များက CNI သတင်းဌာနသို့ ပြောသည်။
မူဆယ်တွင် တရုတ်သို့ တစ်ခါသုံးကဒ်၊ စာအုပ်အနီတို့ဖြင့် တစ်ရက်လျှင် ပျမ်းမျှ လူဦးရေ ၃၀၀ ခန့်အထိ ထွက်ခွာ နေကြခြင်းဖြစ်သည်။
တရုတ် ဇနီးမယားအဖြစ် လုပ်ကိုင်ရန် လူကုန်ကူးသည့် ဈေးကွက်သည် ယခင်ကတည်းက ရှိနေခြင်းဖြစ်သော် လည်း ယခုကာလတွင် အလုပ်အကိုင် ရှားပါးမှုကြောင့် ပိုမိုများပြားလာခြင်း ဖြစ်ကြောင်း ကမ်းလက်ကူညီ ပရဟိတအသင်းမှ ဒုဥက္ကဋ္ဌ ဦးစိန်လှအောင်က CNI သတင်းဌာနသို့ ပြောသည်။
တရုတ်သွားမည့် မြန်မာများကိုတွေ့ရစဉ်
၎င်းက “အဲဒါကတော့ ဆိုက်ဘာပေါ့။ ဆိုက်ဘာ အားနည်းချက်ရှိတဲ့ အခါကြတော့ လူယုတ်မာတွေ၊ လူလိမ်တွေက တရားဝင် ပြောလာနေကြတာပဲလေ။ အဲဒါတွေကတော့ ရှိနေတာပဲ။ စာအုပ်အနီ ကိစ္စတွေရော၊ တစ်ပတ်ကဒ် ကိစ္စ တွေရော၊ UID ကိစ္စတွေရော အကုန်လုံးက အတုအလိမ်တွေချည်းပဲ။ များလာတယ်။ အခုထိကို သွားတာ၊ လာတာ လုပ်နေကြတုန်းပဲ။ လူကုန်ကူးကတော့ ဒီလိုပေါ့။ ဒီတိုင်းကတော့ လူကုန်ကူးတယ်လို့ မသိဘူးပေါ့။ တချို့ကလည်း လူကုန်ကူးမှန်း သိရဲ့နဲ့ သက်သက်မဲ့ သွားတယ်။ တချို့ကြတော့လည်း ဟိုကြမှ လူကုန်ကူး ခံရမှန်းသိတယ် အဲဒီလို တွေလည်း ရှိတယ်။ ဖြစ်နိုင်ရင်တော့ တရုတ်က ဘယ်လောက်ပဲ အာမခံခံ တစ်ခါသုံးကဒ်နဲ့၊ စာအုပ်အနီရှိတဲ့ လူတွေကတော့ အချိန်မရွေး ပြန်ထွက်လို့ရတယ်ပေါ့။ ပြန်ဝင်လို့ရတယ်။ တစ်ပတ်ကဒ်နဲ့ကတော့ တရုတ်ကို ယုံစားလို့မရဘူး။ ပြောရင်တော့ မလာတာ အကောင်းဆုံးပဲ။ UID ကဒ် မပါရင်လည်း တက်မလာကြနဲ့။ တရုတ်ကို ယုံစားပြီးတော့လည်း မလာကြပါနဲ့လို့ message စကား ပေးချင်တယ်” ဟု ပြောသည်။
တရုတ်ဇနီးမယားအဖြစ် လုပ်ကိုင်ရန်အတွက် လူခေါ်ကြသည့်အခါတွင် ဆိုရှယ်မီဒီယာ ပလက်ဖောင်းများ ဖြစ်သည့် Facebook နှင့် ဝီချက် (WeChat) တို့ အသုံးပြု၍ ခေါ်ယူကြခြင်းဖြစ်ကြောင်း သိရသည်။
ထိုသို့ တရုတ်ဇနီးမယားအဖြစ် လူကုန်ကူးကြရာတွင် တရုတ်နိုင်ငံ၊ ယူနန်ပြည်နယ်အထိသို့ ရောင်းစားခံရကြောင်း၊ အမျိုးသမီးတစ်ဦးလျှင် ယွမ်ငွေ သောင်းကဏန်းအထိ ပေါက်ဈေးများ ရှိနေကြောင်းလည်း သိရသည်။
လူကုန်ကူးသည့် ဈေးကွက်မှာ ယခင်ကတည်းက ရှိနေခြင်းဖြစ်ပြီး ထိုခေတ် ကာလကတည်းက အာဏာပိုင် အဖွဲ့အစည်းများအနေဖြင့် ထိရောက်သည့် အရေးယူ လှုပ်ရှားမှုများ အားနည်းခဲ့ကြောင်း လူကုန်ကူးမှုနှင့် ပတ်သက်၍ ဆွေးနွေးမှုများ ဆောင်ရွက်နေသူများက သုံးသပ်ကြသည်။
တရုတ်သွားမည့် မြန်မာများကိုတွေ့ရစဉ်
လူကုန်ကူးခြင်းခံရသည့် ကိစ္စများတွင် အခြားအဖွဲ့အစည်းများမှ ကူညီဆောင်ရွက်ပေးခြင်းထက် သက်ဆိုင်ရာ အာဏာပိုင်များ၏ စိစစ်အရေးယူမှုသည် အဓိက အရေးပါသော်လည်း လူကုန်ကူး မခံရစေရန် ကာယကံရှင် လူပုဂ္ဂိုလ်က ပိုမိုအရေးကြီးကြောင်း Arakan Workers Organization မှ ဒါရိုက်တာ ကိုနိုင်အောင်အောင်က CNI သတင်းဌာနသို့ ပြောသည်။
၎င်းက “လူကုန်ကူးမှုလို့ ပြောလာတဲ့ အခါကြတော့ လူကုန်ကူးမှုမှာ နိုင်ငံတစ်နိုင်ငံနဲ့ တစ်နိုင်ငံ ကိုင်တွယ်တဲ့အခါ မှာ မူဝါဒ မတူတဲ့ဟာတွေ တွေ့ရတယ်။ တချို့အရာတွေကို ထိုင်းက လက်ခံပေမယ့် မြန်မာဘက်က လက်မခံဘူး။ တရုတ်က လက်ခံပေမယ့် မြန်မာဘက်က လက်မခံဘူး။ မြန်မာဘက်က လက်ခံပေမယ့် တရုတ်က လက်မခံဘူး၊ ထိုင်းက လက်မခံဘူး ဒီလိုပုံစံမျိုးတွေက ရှိတယ်။ လူကုန်ကူးမှုထက် ပိုပြီးကျူးလွန်လာရင်တော့ ရာဇဝတ်မှု ဖြစ်လာနိုင်တယ်။ လုပ်ဆောင်ချက်အပေါ်မှာ အခြေခံပြီးမှ ဥပဒေအရ တိုင်းတာရတာကို။ ဥပမာ လူတွေကို တစ်နေရာက တစ်နေရာ ရောင်းစားတယ်။ ရောင်းတော့ ရောင်းစားတယ် လူတွေကို နှိပ်စက်တာမရှိဘူး။ သတ်ဖြတ်တာ၊ အကြမ်းဖက်တာတွေ မရှိဘူးဆို လူကုန်ကူးမှုက တစ်မျိုးဖြစ်သွားတာပေါ့။ လူကုန်ကူးမှုခံရတယ်၊ အတင်းအဓမ္မ ပြုကျင့်တာတွေရှိတယ်၊ နှိပ်စက်ခံရတာ၊ ကိုယ်လက်အင်္ဂါ ဖြတ်တောက်ခံရတာတွေရှိတယ်။ သူ့ကို ကြ လူကုန်ကူးမှုဥပဒေ တစ်ခုတည်း ရှုထောင့်က သွားကြည့်လို့ မရပြန်ဘူး။ တခြားရာဇဝတ်မှုအရ အရေးယူလို့ရ တဲ့ နေရာတွေကနေအစ စဉ်းစားရမယ့် အရာတွေဖြစ်တယ်” ဟု ပြောသည်။
လူကုန်ကူးသည့် ဖြစ်စဉ်တွင် အများစုသည် မိမိနှင့်ရင်းနှီးကျွမ်းဝင်သူများ၏ မက်လုံးပေး စည်းရုံးမှုများကြောင့် အဓိက အများဆုံးဖြစ်ကြောင်း၊ မြန်မာ-တရုတ် နယ်စပ်ဒေသက ဒေသခံအမျိုးသမီးများ အပါအဝင် ရန်ကုန်၊ ပဲခူး၊ မကွေး စသည့် အနယ်နယ်အရပ်ရပ်မှ အမျိုးသမီးများ လူကုန်ကူးခံနေရခြင်း ဖြစ်ကြောင်း သိရသည်။
![](/images/xbxfbfddg.jpg#joomlaImage://local-images/xbxfbfddg.jpg)
- By CNI
- Category: လူမှုဘဝ
- Hits: 357
CNI International News
ဘန်ကောက်၊ ဧပြီ ၁၂
ထိုင်းနိုင်ငံတွင် ဧပြီ ၁၂ ရက်မှ ဧပြီ ၁၆ ရက်အထိ ကျင်းပမည့် ဆွန်ခရန် ရေကစားပွဲတော် မတိုင်မီ တစ်ရက် အလိုတွင် ဘန်ကောက်မြို့တော်မှ နိုင်ငံမြောက်ပိုင်းနှင့် အရှေ့မြောက်ပိုင်း ပြည်နယ်များသို့ သွားရောက်သည့် အဓိကယာဥ်လမ်းကြောင်းများသည် အသွားအလာ များပြားနေသည်ဟု Thai PBS World မှ ဖော်ပြခဲ့သည်။
ဘန်ကောက်တွင် လာရောက် အလုပ်လုပ်နေသူများသည် ဆွန်ခရန်မတိုင်မီ ၎င်းတို့၏ ဇာတိမြေများဖြစ်သည့် မြောက်ပိုင်းနှင့် အရှေ့မြောက်ပိုင်း ပြည်နယ်များသို့ ပြန်လည်သွားရောက် နေကြခြင်းဖြစ်သည်။
ဝန်ကြီးချုပ် ဆရီသာ သာဗီဆင် (Srettha Thavisin) သည် အစိုးရအိမ်တော်တွင် ဗြမ္မာကြီး ဂူဗိမ္မာန်ကို ဂါရဝပြု ခြင်းအားဖြင့် ဆွန်ခရန်ပွဲတော်မတိုင်မီ ကုသိုလ်ပြု အခမ်းအနားကို ကြီးမှူးကျင်းပခဲ့သည်။
ထို့နောက် ဘာသာရေး အခမ်းအနားကို တက်ရောက်ခဲ့ပြီး ထေကြီးဝါကြီး ဘုန်းတော်ကြီးများ၏ ကောင်းချီးပေးမှု အား ခံယူခဲ့သည်။
ထိုင်းဆွန်ခရန်ပွဲတော် ကျင်းပရန် ပြင်ဆင်ထားစဉ်
ထို့နောက် ဆရီသာက အစိုးရအဖွဲ့ဝင် ဝန်ကြီးများ၊ အရာရှိများကို ဆုမွန်ကောင်း တောင်းပေးခဲ့ပြီး ၎င်း၏ လက်ဝါး များပေါ်သို့ ရေလောင်းခံခြင်းဖြင့် ဝန်ကြီးများ၊ အရာရှိများနှင့် သတင်းထောက်များအား ရေလောင်းသည့် ထုံးတမ်း ဓလေ့ကို ပြုလုပ်ခွင့်ပေးခဲ့သည်။
ထို့နောက် ဆရီသာသည် အရာရှိများနှင့် သတင်းထောက်များကို ဗုဒ္ဓ၏ အဆောင်များကို လက်ဆောင်ပေးအပ်ခဲ့ သည်။
ဆွန်ခရန် အားလပ်ရက် ကာလအတွင်း ဘန်ကောက်မြို့တော်မှ ဒေသအားလုံးသို့ သွားရောက်သည့် အဓိက အဝေးပြေး လမ်းမများနှင့် အခြားလမ်းကြောင်းများပေါ်မှ သတင်းအချက်အလက်များကို အဝေးပြေးလမ်းမများ ဆိုင်ရာ ဦးစီးဌာနက ထုတ်ပြန်ပေးခဲ့သည်။
မော်တော်ယာဥ် အသုံးပြုသူများ အနေဖြင့် ထိုဌာန၏ အရေးပေါ် ဖုန်းနံပါတ်ဖြစ်သည့် ၁၅၈၆ နှင့် အဝေးပြေးလမ်း ရဲတပ်ဖွဲ့၏ ဖုန်းနံပါတ် ၁၁၉၃ ကို အချိန်မရွေး ဆက်သွယ်နိုင်ပြီး ယာဥ်လမ်းကြော အခြေအနေများကို မေးမြန်း နိုင်ကြောင်းနှင့် မတော်တဆမှုများကို သတင်းပို့နိုင်ကြောင်း ထုတ်ပြန်ခဲ့သည်။
Source: Thai PBS World
![](/images/hgjghjfgjfgjf.jpg#joomlaImage://local-images/hgjghjfgjfgjf.jpg)
- By CNI
- Category: လူမှုဘဝ
- Hits: 197
CNI International News
ဝါရှင်တန်၊ ဧပြီ ၁
အမေရိကန်သမ္မတ ဂျိုးဘိုင်ဒန် (Joe Biden) နှင့် ၎င်း၏ ပြိုင်ဘက် ရီပတ်လစ်ကန်ပါတီမှ သမ္မတဟောင်း ဒေါ်နယ်ထရမ့် (Donald Trump) တို့သည် အီစတာ (Easter) ပွဲတော်နေ့တွင် ကျရောက်နေသည့် လိင်ပြောင်းလဲ ထားသူများ အောင်ပွဲခံနေ့နှင့်ပတ်သက်ပြီး အပြန်အလှန် ဝေဖန်တိုက်ခိုက်ခဲ့ကြသည်ဟု အယ်လ်ဂျာဇီးယားမှ ဖော်ပြခဲ့သည်။
လိင်ပြောင်းထားသည့် အမေရိကန်များ၏ ရဲဝံ့မှုနှင့် ဆောင်ရွက်မှုတို့ကို ဂုဏ်ပြုရန် ဘိုင်ဒန်က မတ်လ ၃၁ ရက်နေ့ ကို လိင်ပြောင်းလဲထားသူများ မြင်ကွင်းနေ့ (Transgender Day of Visibility)အဖြစ် မတ်လ ၃၀ ရက်က ကြေညာ ခဲ့သည်။
ဘိုင်ဒန်သည် မတ်လ ၃၁ ရက်နေ့ကို လိင်ပြောင်းသူများ မြင်ကွင်းနေ့အဖြစ် ၂၀၂၁ ခုနှစ်က ပထမဆုံးအကြိမ် ကြေညာခဲ့သော်လည်း ယခုနှစ် မတ်လ ၃၁ ရက်သည် ခရစ်ယာန်ဘာသာဝင်များ အထွဋ်အမြတ်ထားသည့် အီစတာပွဲတော်နေ့နှင့် တိုက်ဆိုင်ခဲ့သည်။
ထရမ့်၏ မဲဆွယ်စည်းရုံးရေးအဖွဲ့ကမူ ဘိုင်ဒန်၏ ကြေညာချက်သည် စိတ်ပျက်စရာကောင်းပြီး ခရစ်ယာန်တို့၏ ယုံကြည်မှုကို နှစ်ကာလကြာရှည် တိုက်ခိုက်မှုဖြစ်ကြောင်း တံဆိပ်ကပ်ခဲ့သည်။
လိင်ပြောင်းသူများနေ့ အခမ်းအနားကိုတွေ့ရစဉ်
"ဘိုင်ဒန်ရဲ့ ကျရှုံးနေတဲ့ မဲဆွယ်စည်းရုံးမှုနဲ့ အိမ်ဖြူတော်အနေနဲ့ ဒီအကြောင်းအရာနဲ့ပတ်သက်ပြီး အမေရိကန် တစ်ဝန်းက သန်းနဲ့ချီတဲ့ ကက်သလစ်နဲ့ ခရစ်ယာန် ဘာသာဝင်တွေကို ပြန်လည်တောင်းပန်ဖို့ ကျမတို့ တောင်းဆို ပါတယ်"ဟု ထရမ့်၏ မဲဆွယ်စည်းရုံးရေးအဖွဲ့၏ ပြောရေးဆိုခွင့်ရှိသူ ကာရိုလိုင်း လီယာဗစ် (Karoline Leavitt) က ပြောကြားခဲ့သည်။
ရီပတ်ဘလစ်ကန် အောက်လွှတ်တော်ဥက္ကဋ္ဌဖြစ်သည့် မိုက်ဂျွန်ဆင် (Mike Johnson) ကလည်း ဘိုင်ဒန်၏ ကြေညာချက်သည် အီစကာပွဲတော်ကို သစ္စာဖောက်ဖျက်မှုဖြစ်ပြီး လက်ခံနိုင်ဖွယ်မရှိဘဲ ရွံစရာကောင်းကြောင်း ပြောကြားခဲ့သည်။
အိမ်ဖြူတော် ပြောရေးဆိုခွင့်ရှိသူ အန်ဒရူး ဘိတ်စ် (Andrew Bates) ကမူ ရီပတ်ဘလစ်ကန်များသည် ရက်စက်မှု၊ မုန်းတီးမှုနှင့် ရိုးသားမှု မရှိသည့် လေလုံးထွား ပြောဆိုမှုများနှင့်အတူ မိမိတို့နိုင်ငံကို သဘောထားကွဲစေပြီး အားနည်းစေရန် ကြိုးပမ်းနေသည်ဟု တုန့်ပြန်ခဲ့သည်။
"မိသားစုနဲ့အတူ အီစတာပွဲတော်ကို ဆင်နွှဲတဲ့ ခရစ်ယာန်ဘာသာဝင် တစ်ဦးအနေနဲ့ သမ္မတဘိုင်ဒန်ဟာ အမေရိကန်နိုင်ငံသားအားလုံးရဲ့ ဂုဏ်သိက္ခာနဲ့ လွတ်လပ်ခွင့်တွေကို ထိန်းသိမ်းပြီး လူတွေကို စည်းလုံးစေအောင် လုပ်ဆောင်ခဲ့ပါတယ်" ဟု ဘိတ်စ်က ပြောကြားခဲ့သည်။
ထို့ပြင် ဘိုင်ဒန်သည် နိုင်ငံရေးဆိုင်ရာ ရည်ရွယ်ချက်များ သို့မဟုတ် အကျိုးအမြတ်အတွက် ၎င်း၏ ယုံကြည်မှုကို အလွဲသုံးစားပြုလုပ်မည် မဟုတ်ကြောင်း ဘိတ်စ်က ထပ်လောင်း ပြောကြားခဲ့သည်။
Source: အယ်လ်ဂျာဇီးယား