CNI News
၂၀၂၃ ခုနှစ်၊ ဒီဇင်ဘာ ၂၉
လာမည့် ၂၀၂၄ ခုနှစ်၊ ဇန်နဝါရီ ၃၁ ရက်နေ့တွင် ၆ လ သက်တမ်းတိုးကာလ ကုန်ဆုံးပြီးနောက်ပိုင်း ညွန့်ပေါင်း အစိုးရဖွဲ့စည်းရန် နစကကို တိုင်းရင်းသားလက်နက်ကိုင် အဖွဲ့အစည်းများ (EAOs)က အကြံပြုထားသည်ဟု ငြိမ်းချမ်းရေး လုပ်ငန်းစဉ်မှာ ပါဝင်နေသူ စဝ်ခွန်းဆိုင်က CNI သတင်းဌာနသို့ ပြောသည်။
ပြီးခဲ့သည့် ၂၀၂၃ ခုနှစ်၊ ဇူလိုင် ၃၁ ရက်နေ့က ကျင်းပသည့် အမျိုးသားကာကွယ်ရေးနှင့် လုံခြုံရေးကောင်စီ အစည်းအဝေးတွင် ဖွဲ့စည်းပုံအခြေခံဥပဒေပုဒ်မ ၄၂၅ အရ ၆ လသက်တမ်း ဒုတိယအကြိမ် တိုးခဲ့သည်။
နစကအနေဖြင့် ဥပဒေအရ အရေးပေါ်ကာလကို သက်တမ်း ၆ လတိုး၍ရကြောင်း၊ ထို့အတူ တိုင်းရင်းသား လက်နက်ကိုင် အဖွဲ့အစည်းများနှင့် နိုင်ငံရေးပါတီတို့က အကြံပြုသည့်ပုဂ္ဂိုလ်များ ပါဝင်အောင် လုပ်ဆောင်ပြီး ညွန့်ပေါင်းအစိုးရဖွဲ့စည်းရန် အကြံပြုခဲ့ခြင်းဖြစ်ကြောင်း စဝ်ခွန်းဆိုင်က CNI သတင်းဌာနသို့ ပြောသည်။
ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်
၎င်းက “အခုလောလောဆယ်က နှစ်မျိုးရှိတာပေါ့၊ တစ်မျိုးကတော့ ဒီဥပဒေပညာရှင်တွေ ပြောတဲ့အရဆိုရင် သက်တမ်းက ၆ လ တိုးချင်သလောက် တိုးနိုင်တာပေါ့၊ ဒါကတစ်ခုပေါ့၊ နောက်တစ်ခုက ဘာလဲဆိုတော့ ၆ လ ပြည့်ပြီးပြီ၊ ဖေဖော်ဝါရီ ပြည့်ပြီဆိုရင် ကာ/လုံ အစည်းအဝေး ခေါ်ပြီးတော့မှ ယာယီသမ္မတကို အာဏာပြန်အပ် ပေးမယ်၊ အဲဒီကနေ ယာယီသမ္မတကနေပြီးတော့မှ အစိုးရအသစ်ဖွဲ့ပြီးတော့မှ အဲဒီအစိုးရ အသစ်ကနေပြီးမှ စီမံခန့်ခွဲသွားမှာပေါ့၊ ဖြစ်နိုင်လို့ရှိရင်တော့ သူတို့က ရွေးကောက်ပွဲ လုပ်ချင်တာပေါ့၊ ရွေးကောက်ပွဲ မလုပ်နိုင်ဘူး ဆိုရင်တော့ သူတို့က နည်းလမ်းရှာရမှာပေါ့၊ ဒါသူတို့ ဘယ်နည်းလမ်းရှာမယ်ဆိုတာ ကျနော်တို့ အပြင်လူတွေက လည်း ခန့်မှန်းလို့ မရဘူးပေါ့ဗျာ။ သို့သော်လည်းပဲ အချို့ EAO တွေကတော့ သူတို့ အကြံပြုတာက ဘာလဲဆိုတော့ နောက် ၆ လပြည့်လို့ရှိရင် ညွန့်ပေါင်းအစိုးရဖွဲ့ပါ။ ညွန့်ပေါင်းအစိုးရဖွဲ့ပြီဆိုလို့ ရှိရင်လည်း နိုင်ငံရေးပါတီတို့ EAO တွေက သူတို့က အကြံပြုတဲ့ ပုဂ္ဂိုလ်တွေ ပါဝင်အောင် လုပ်ပါ၊ ဒီလိုမျိုး လုပ်ပြီးလို့ ရှိရင် ဒီနိုင်ငံကို အုပ်ချုပ်ဖို့ ဖက်ဒရယ်မူတွေကို ချပါ၊ ဖက်ဒရယ်မူကို ချပြီးတဲ့အခါကြတော့မှ အခြေခံဥပဒေ ပြင်ဆင်ရေးတို့ ဖျက်သိမ်းရေးတို့ စသည်ဖြင့် လုပ်ရမယ်၊ လုပ်ပြီးလို့ရှိရင် တကယ်လို့ အားလုံးက သဘောတူတဲ့ အခြေခံဥပဒေတစ်ရပ် ရပြီဆိုရင် အဲဒီအခါကြတော့မှ ရွေးကောက်ပွဲလုပ်ပါ၊ အဲဒီလို ပြောထားတာရှိတယ်” ဟု ပြောသည်။
ညွန့်ပေါင်းအစိုးရ ဖွဲ့စည်းရေး တိုင်းရင်းသားလက်နက်ကိုင် အဖွဲ့အစည်းများ၏ အကြံပြုချက်အား တပ်မတော် ကာကွယ်ရေးဦးစီးချုပ်က မည်ကဲ့သို့ သဘောထားရှိသည်ကို မသိရှိနိုင်ကြောင်း စဝ်ခွန်းဆိုင်က ပြောသည်။
နစကအနေဖြင့် နိုင်ငံတော်အား အရေးပေါ်ကြေညာ၍ အာဏာရယူခဲ့သည်မှ ၃ နှစ် နီးပါးရှိလာပြီ ဖြစ်သော်လည်း တိုင်းပြည်ကို တည်ငြိမ်အောင် လုပ်ဆောင်မှု အားနည်းချက်များ ရှိနေသေးကြောင်း နိုင်ငံရေးသမားတစ်ဦးက ပြော သည်။
လက်ရှိ ပြည်တွင်း လက်နက်ကိုင်ပဋိပက္ခများကြောင့် ပြည်သူလူထုများမှာ အကျပ်အတည်းများဖြင့် ရင်ဆိုင်နေ ရကြောင်း၊ နိုင်ငံရေးပြဿနာကို နိုင်ငံရေးနည်းလမ်းဖြင့် ဖြေရှင်းနိုင်ရေး ပြောင်းလဲလုပ်ဆောင်ရန် လိုအပ်ကြောင်း ရခိုင်အမျိုးသားပါတီ (ANP) မှ ဥက္ကဋ္ဌ ဦးသာထွန်းလှက CNI သတင်းဌာနသို့ ပြောသည်။
ကာ/လုံ အစည်းအဝေး ကျင်းပနေစဉ်
၎င်းက “SAC ကလည်း အခုဆိုရင် ၃ နှစ်ပြည့်တော့မယ်၊ ၃ နှစ်ပြည့်မယ့် အခြေအနေကို ရောက်ပြီ။ ကျနော်တို့ မြန်မာနိုင်ငံကလည်း တည်ငြိမ်ဖို့က ပြည်သူတွေ စိတ်အေးချမ်းသာနဲ့ နေထိုင်နိုင်မှု အခြေအနေကလည်း မရှိတဲ့ အခြေအနေမျိုး ဖြစ်နေတယ်။ အဲဒါကြောင့် SAC အနေနဲ့လည်း မြန်မာပြည်သူတွေ တစ်နိုင်ငံလုံး ခံစားနေရတဲ့ ဒုက္ခတွေကို နားလည်ဖို့လိုတယ်၊ အဲဒါကြောင့် ပြည်သူတွေ ခံစားနေရတဲ့ အခြေအနေတွေကို သဘောပေါက်ပြီး။ အခုမြန်မာနိုင်ငံမှာ ဖြစ်ပျက်နေတယ်ဆိုတာ နိုင်ငံရေးပြဿနာ ဖြစ်တယ်၊ အဲဒါကြောင့် နိုင်ငံရေးပြဿနာ ဖြစ်တဲ့ အတွက်ကြောင့် မြန်မာနိုင်ငံမှာ ဖြစ်ပျက်နေတဲ့ နိုင်ငံရေးပြဿနာတွေကို နိုင်ငံရေး နည်းလမ်းအရ ဖြေရှင်း ဆောင်ရွက်ဖို့ဖက်ကို ပြောင်းလဲလုပ်ဖို့လိုတယ်လို့ ကျနော်တော့ ပြောလိုတယ်” ဟု ပြောသည်။
ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က တပ်မတော်မှ အမျိုးသားဒီမိုကရေစီအဖွဲ့ချုပ်(NLD)အစိုးရကို ၂၀၂၀ အထွေထွေရွေးကောက်ပွဲ မဲစာရင်းအငြင်းပွားမှုကို မဖြေရှင်းပေးဘဲ အစိုးရဖွဲ့စည်းရေး ကြိုးပမ်းသည်ဟု ဆိုကာ ဖြုတ်ချ၍ နိုင်ငံတော်ကို အရေးပေါ် အခြေအနေ ကြေညာကာ တာဝန်ယူလျက်ရှိနေသည်။
ထို့နောက် တစ်နှစ်သက်တမ်းပြည့်၍ ၆ လနှစ်ကြိမ် သက်တမ်းတိုးခဲ့သလို ပုဒ်မ ၄၂၅ အရလည်း ၆ လ နှစ်ကြိမ် သက်တမ်းတိုးမှုသည် ၂၀၂၄ ခုနှစ်၊ ဇန်နဝါရီ ၃၁ ရက်နေ့မှာ ပြည့်မည်ဖြစ်၍ နစက အနေဖြင့် မည်ကဲ့သို့ ဆက် လက် လျှောက်လမ်းမလဲ မသိရသေးပေ။
