- By CNI
- Category: လူမှုဘဝ
- Hits: 466
CNI News
၂၀၂၃ ခုနှစ်၊ ဖေဖော်ဝါရီ ၁၃
ထိုင်းနိုင်ငံရှိ မြန်မာရွှေ့ပြောင်းလုပ်သားများအနေဖြင့် မိမိတို့၏အချက်အလက်များ အသုံးပြု၍ ဖွင့်ထားသော ဘဏ်အကောင့်များအား အခြားသူထံ ရောင်းချခြင်းများ မပြုလုပ်ရန်နှင့် အထူးသတိထားရန် ထိုင်းရှိ အလုပ်သမား အရေးဆောင်ရွက်သူများက CNI သတင်းဌာနသို့ ပြောသည်။
မိမိတို့၏ ဘဏ်အကောင့်အား အခြားသူမှ ဝယ်ယူရန် ကမ်းလှမ်းသည့်အခါတွင် ရောင်းချလိုက်ပါက ထို အလုပ်သမားတစ်ယောက်၏ သတ်မှတ်လုပ်ခလစာထက် ပိုမို၍ ငွေအဝင်၊ အထွက် များပြားနေသည်ကို တွေ့ရှိ ရလျှင် ဖမ်းဆီးခေါ်ယူကာ စစ်ဆေးမေးမြန်းခြင်း ခံရနိုင်ကြောင်း ထိုင်းရှိ အလုပ်သမားအရေး ဆောင်ရွက်သူများက CNI သတင်းဌာနသို့ ပြောသည်။
အလုပ်သမားအရေး ကူညီဆောင်ရွက်ပေးနေသူ ကိုသားကြီးက “အဓိကကတော့ ဒီအလုပ်သမားရဲ့ ဘဏ် အကောင့်ကို လုပ်ငန်းရှင်တွေက ငွေမည်းအဖြစ် အသုံးချပြီးတော့မှ ငွေ အပြောင်းအလွှဲလုပ်တာမျိုး မလုပ်ရင် တော့ ပြဿနာမရှိဘူး။ ကိုယ့်ရဲ့ ဘဏ်အကောင့်ကို တခြားလုပ်ငန်းရှင်ကနေ သုံးပြီးတော့မှ ငွေ အပြောင်းအလွှဲ လုပ်တဲ့နေရာမှာ ငွေဖြူ၊ ငွေမည်းတွေ ပါလာနိုင်တယ်ဆိုရင်တော့ ဥပဒေက ပေးတဲ့အပြစ်ကို ခံရမယ်။ ဒီ ဘဏ် အကောင့်ဖွင့်ထားတဲ့ အလုပ်သမားက ဘဏ်ပိတ်ခြင်းခံရသလို ခေါ်ယူစစ်ဆေးခြင်းတွေ ခံရမှာပေါ့။ တကယ်တမ်း ကျရင် ဥပဒေက ဘယ်သူ့ကိုမှ နားမလည်ဘူးဆိုတာကို ကျနော်တို့မြန်မာတွေသိထားဖို့ လိုအပ်တယ်။ ပတ်စပို့ ကိုပါ black list လုပ်နိုင်တယ်။ တကယ်လို့ အဲဒီ ဘဏ်အကောင့်ထဲမှာ ငွေမည်းဝင်လာမယ်၊ သတ်မှတ်ထားတဲ့ နှုန်းထားထက် ငွေ amount ပိုမို ဝင်လာမယ်ဆိုရင် အဲဒီအလုပ်သမားဟာ ပတ်စပို့ကိုပါ black list လုပ်ခြင်း ခံရမယ်။ ကိုယ်ရောင်းလိုက်တဲ့အကောင့်မှာ ကိုယ့်နာမည်ရှိနေမှာပဲ။ ပြီးတော့ အင်မတန်ပဲ အန္တရာယ်ကြီးတယ် ငွေမည်းဝင်လာရင်” ဟု ပြောသည်။
ထိုင်းငွေကြေး
ထိုင်းနိုင်ငံမှ ချမှတ်ထားသည့် ဥပဒေများအရ ယခုကဲ့သို့ မိမိ၏ဘဏ်အကောင့်အား အခြားသူသို့ ရောင်းချခြင်းအား ခွင့်မပြုထားသော်လည်း နားလည်မှုအရ အချင်းချင်း အရောင်းအဝယ် ပြုလုပ်နေကြခြင်း ဖြစ်ကြောင်း သိရသည်။
မြန်မာရွှေ့ပြောင်းလုပ်သားများအနေဖြင့် ၎င်းတို့၏ ဘဏ်အကောင့်အား ရောင်းချရာတွင် ဘတ်ငွေ ၁၅၀၀ မှ စတင်ကာ တစ်သောင်းဝန်းကျင် နှစ်သောင်းခန့်အထိ ဈေးရရှိကြောင်းလည်း သိရသည်။
ပြီးခဲ့သည့်ရက်ပိုင်းက ထိုသို့ ဘဏ်အကောင့်ရောင်းချလိုက်သည့် မြန်မာရွှေ့ပြောင်းလုပ်သားတစ်ဦးသည် ၎င်း၏ ဘဏ်အကောင့်မှ ငွေအဝင်၊ အထွက် ပမာဏများပြားကာ ငွေလွှဲပြောင်းမှုများ မြန်ဆန်သည့်အတွက် ဖမ်းဆီး ထိန်းသိမ်းခံထားရသည်။
FED မှ အလုပ်သမားတာဝန်ခံ ဦးမင်းဦးက “အထူးသဖြင့်ဆိုရင်တော့ သုံးသိန်း(ဘတ်ငွေ)နဲ့ အထက်ဆိုရင်တော့ လိုက်ပြီ။ တစ်သိန်းဆိုရင်တောင်မှပဲ ဒီလူရဲ့ အချက်အလက်ကို လှမ်းပြီးတော့ တောင်းလို့ရတယ်။ အကုန်လုံး ဘဏ်တွေမှာ စာရင်းရှိပြီးသားပဲ။ အဲဒီတော့ ဒီဘဏ်တွေနဲ့ အာဏာပိုင်တွေနဲ့က အာဏာပိုင်တွေက လှမ်းစစ်တာနဲ့ ဒီအချက်အလက်ကို ဘဏ်တွေက မပေးလို့ မရဘူး ပေးရတယ်။ တကယ့်တကယ်ကတော့ အကောင့်ဆိုတာ ရောင်းခွင့်မရှိဘူး။ ရောင်းလို့လည်း မရဘူး။ သူ့အကောင့်နဲ့သူ ဖွင့်ထားတာ။ ကိုယ့်မောင်နှမချင်း ဒါမှမဟုတ်ရင် သူငယ်ချင်းအချင်းချင်းဆိုရင် အကောင့် ဖွင့်ပေးထားပြီးတော့ သူ့ကိုပေးထားတယ်ပေါ့။ ဒါပေမယ့် အဲဒီမှာ ပြဿနာတက်ပြီဆိုရင် အကောင့်ဖွင့်ထားတဲ့ သူက ပြဿနာတက်ပြီ။ ဘာလို့ဆို ကိုယ့်နာမည်ကြီးနဲ့ဖြစ်နေတာ။ ကိုယ့်ရဲ့ အထောက်အထားတွေနဲ့လေ”ဟု ပြောသည်။
ပြီးခဲ့သည့် ဒီဇင်ဘာလ ၉ ရက်နေ့က အလုပ်အကိုင်များမရရှိသည့်အတွက် အလုပ်သမားများ ဆန္ဒပြနေကြစဉ်
ရွှေ့ပြောင်းလုပ်သားတစ်ဦးအနေဖြင့် ဘဏ်အကောင့်ဖွင့်ရာတွင် တရားဝင် အထောက်အထားစာရွက်စာတမ်းများ ရှိမှသာ ဖွင့်လှစ်ရန် လွယ်ကူသည်။
ထို့ကြောင့် အထောက်အထားမရှိသည့် မိမိ၏ ဆွေမျိုးမိတ်ဆွေများအတွက် ဖွင့်ပေးမည်ဆိုပါက ပြဿနာ မရှိသော်လည်း ထိုသူမှ သတ်မှတ်ငွေပမာဏထက် အလွှဲအပြောင်းများပြားနေပါက ပြဿနာရှိကြောင်း ထိုင်းရှိ အလုပ်သမားအရေး ဆောင်ရွက်သူများက ပြောသည်။
မြန်မာရွှေ့ပြောင်းလုပ်သားများအနေဖြင့် မိမိကိုယ်ပိုင် ဘဏ်အကောင့်အား နှစ်ခုထက်ပို၍ အများအပြား မဖွင့်ကြရန်နှင့် အခြားသူများသို့ မိမိဘဏ်အကောင့်အား အသုံးပြုခိုင်းမည်ဆိုပါကလည်း အထူးသတိထားကြရန် ၎င်းတို့က အကြံပြုသည်။
- By CNI
- Category: လူမှုဘဝ
- Hits: 400
CNI International News
ဘန်ကောက်၊ဖေဖော်ဝါရီ ၉
ဘတ်ငွေ ၃၆ သန်းတန် ချက်လက်မှတ်များကို လိမ်လည်ရယူမှုဖြင့် ဘန်ကောက်မြို့ ရတ်ချာသီဝီ (Ratchathewi) ခရိုင်မှ ဘဏ်ဝန်ထမ်းဟောင်း တစ်ဦးနှင့် သူမ၏ ခင်ပွန်းဖြစ်သူတို့ကို ဖမ်းဆီးခဲ့သည်ဟု ဘန်ကောက်ပို့စ် သတင်း တွင် ဖော်ပြထားသည်။
စီးပွားရေးဆိုင်ရာ ရာဇဝတ်မှု နှိမ်နင်းရေးဌာနခွဲ (ECD)မှ ရဲတပ်ဖွဲ့ဝင်များသည် ဗုဒ္ဓဟူးနေ့တွင် ဒင်းဒိုင်း (Din Daeng) လမ်းမှ ကွန်ဒိုတစ်ခုကို ဝင်ရောက်စီးနင်းကာ ဖမ်းဆီးမှုများ လုပ်ဆောင်ခဲ့သည်။
အသက် ၃၃ နှစ်အရွယ် လာတာ (Lata) ဟုသာ ဖော်ပြထားသော အမျိုးသမီးတစ်ဦးကို ခိုးယူမှုကျူးလွန်ခြင်း၊ ဘဏ္ဍာရေး အဖွဲ့အစည်းတစ်ခု၏ ဝန်ထမ်းတစ်ဦးအနေဖြင့် ပုဂ္ဂိုလ်ရေးဆိုင်ရာ အကျိုးအမြတ် တရားမဝင် ရယူ ခြင်းတို့ဖြင့် ဖမ်းဆီးခဲ့သည်။
သူမ၏ ခင်ပွန်းဖြစ်သူ အသက် ၃၆ နှစ်အရွယ် ဖာရန်ယု (Pharanyu) ကိုလည်း ခိုးယူမှုဖြင့် ဖမ်းဆီးခဲ့သည်ဟု ECD အရာရှိတစ်ဦးက ပြောသည်။ ဖမ်းဆီးထားသော သံသယရှိသူ နှစ်ဦး၏ မိသားစု နာမည်များနှင့် အလုပ်လုပ်ခဲ့သော ဘဏ်နာမည်များကိုတော့ ထုတ်ဖော်ပြောဆိုခဲ့ခြင်း မရှိပေ။
ယခုဖြစ်စဉ်သည် ဆောက်လုပ်ရေးကုမ္ပဏီနှစ်ခုမှ ကိုယ်စားလှယ်များက လာတာ(လူနာမည်) အလုပ်လုပ်သော ဘဏ်ကို ချေးငွေ ပြန်ပေးရန်အတွက် စုစုပေါင်း ဘတ် ၃၆ ဒသမ ၂ သန်းတန်ကြေးရှိ ချက်လက်မှတ်များကို အပ်နှံ ခဲ့ချိန်တွင် စတင်ခဲ့သည်။
ဘဏ်ကနေ ငွေလိမ်ထုတ်မှုဖြင့် ဖမ်းခံရတဲ့ ဇနီးမောင်နှံနှစ်ဦးကိုတွေ့ရစဉ်
ထိုငွေများသည် ဘဏ်သို့ ဝင်ရောက်လာခဲ့ခြင်း မရှိခဲ့ဘဲ အတွင်းပိုင် စုံစမ်းစစ်ဆေးမှုများ လုပ်ဆောင်ခဲ့ရာတွင် ငွေများသည် လာတာ၏ ခင်ပွန်းဖြစ်သူ အကောင့်တွင်းသို့ ရောက်ရှိသွားသည်ကို တွေ့ခဲ့ရသည်။ ယင်းကြောင့် ECD ကို တိုင်ကြားခဲ့ခြင်း ဖြစ်သည်။
စစ်ဆေး မေးမြန်းမှုများအတွင်း သံသယရှိသူများက စွပ်စွဲချက်များ အားလုံးကို ငြင်းဆိုခဲ့သည်။ ထို့ကြောင့် ၎င်းတို့ အား နောက်ထပ် တရားစီရင်မှုများ လုပ်ဆောင်ရန် ရဲတပ်ဖွဲ့မှ စုံစမ်းစစ်ဆေးသူများထံ လွဲပြောင်းပေးခဲ့ပြီလည်း ဖြစ်သည်။
သံသယရှိသူ တစ်ဦးသည် ဘဏ်လုပ်ငန်းများ မည်သို့ လုပ်ဆောင်လည်ပတ်သည်ကို ကောင်းစွာ သဘောပေါက် ထားကြောင်းနှင့် ချက်လက်မှတ် ရှင်းလင်းရေးစနစ်၏ ယိုပေါက်ကို အသုံးချကာ ငွေများကို ရယူသွားခဲ့ကြောင်း ECD ၏ ညွှန်ကြားရေးမှူးက ပြောသည်။
ရဲတပ်ဖွဲ့သည် ထိုစုံတွဲနှင့် ပတ်သက်သည့် သက်သေ အထောက်အထားများအားလုံးကို ရရှိထားပြီးလည်း ဖြစ် သည်။
Source: ဘန်ကောက်ပို့စ်
- By CNI
- Category: လူမှုဘဝ
- Hits: 407
CNI International News
ဘန်ကောက်၊ ဖေဖော်ဝါရီ ၇
ထိုင်းစစ်သား ၃၆၀၀ ကျော်သည် နှုတ်ဆက်အရိုအသေပေးသည့် မွေထိုင်းရိုးရာဟန်ရေးပြအက ဝိုင်ခရူ(wai kru) ကို ပြုလုပ်ခဲ့သည်ဟု Bangkok Post သတင်းတွင် ဖော်ပြသည်။
ယင်းကို တနင်္လာနေ့ညနေပိုင်း ပရာချု့ခီရီခန်း (Prachuap Khiri Khan) တွင် ပြုလုပ်ခဲ့ခြင်းဖြစ်ကာ ၎င်းဖြင့် ကမ္ဘာ့ ဂင်းနစ်မှတ်တမ်း စံချိန်သစ်ရရှိဖို့ရန် ရည်မှန်းထားခြင်းလည်း ဖြစ်သည်။
ဟွာအင် (Hua Hin) ခရိုင်ရှိ ရာဂျက်ဟက်တီ (Rajabhakti) ပန်းခြံတွင် ပြုလုပ်ခဲ့သော ဝိုင်ခရူအခမ်းအနားကို နာမည်ကျော်မွေထိုင်းတိုက်ခိုက်ရေးသမား ဗူကော ဘန်ချာမစ်ခ် (Buakaw Banchamek) က ဦးဆောင်ခဲ့သည်။
ထိုင်းစစ်သား ၃၆၀၀ ကျော်မှ မွေထိုင်းရိုးရာဟန်ရေးပြအက ဝိုင်ခရူ ဖြင့် သရုပ်ဖော်ပြသနေစဉ်(ဓါတ်ပုံ-အေအက်ဖ်ပီ)
အဆိုပါအခမ်းအနားကို ဝန်ကြီး ချုပ် ပရာယွတ်ချန်အိုချာ (Prayut Chan-o-cha) နှင့် စစ်တပ်အကြီးအကဲ ဗိုလ်ချုပ်ကြီး နာရွန်ပန် ဂျစ်ကာသီ (Naronpan Jtkaethae) က တက်ရောက်ခဲ့သည်။
ယခုအခမ်းအနားသည် ပထမဆုံးသော Amazing Muay Thai Festival ၏ အစိတ်အပိုင်းတစ်ခုဖြစ်သည်။ ဖေဖော်ဝါရီ ၆ ရက်နေ့သည် ထိုင်းနိုင်ငံ၏ မွေထိုင်းအမျိုးသားနေ့ ဖြစ်သည်။
အစောပိုင်းတွင် ယင်းအခမ်းအနားကို စစ်သားပေါင်း ၅၀၀၀ နှင့် ကျင်းပပြုလုပ်ရန် စီစဉ်ထားခြင်း ဖြစ်သော်လည်း နေရာအခက်အခဲကြောင့် စစ်သား ၃၆၅၀ ဖြင့် လုပ်ဆောင်ခဲ့ရသည်။ အဆိုပါ တနင်္လာနေ့ အခမ်းအနားတွင် မွေထိုင်းတိုက်ခိုက်ရေးပုံစံများကို သရုပ်ပြခြင်းတစ်ခုလည်း ပါဝင်သည်ဟု သိရသည်။
Source:Bangkokpost
- By CNI
- Category: လူမှုဘဝ
- Hits: 503
CNI News
၂၀၂၃ ခုနှစ်၊ ဖေဖော်ဝါရီ ၄
စစ်ကိုင်းတိုင်းဒေသကြီး၊ နာဂကိုယ်ပိုင်အုပ်ချုပ်ခွင့်ရဒေသ၊ လဟယ်မြို့နယ်၊ ဆော်လော်နောက်ကုန်း ကျေးရွာတွင် ဖေဖော်ဝါရီ ၂ ရက်နေ့က ဆိုလာပြား ရှော့ဖြစ်ကာ လူနေအိမ် ၇၃ လုံး မီးလောင်သွားခဲ့သည်။
အဆိုပါ မီးလောင်မှုကြောင့် ဆိုင်ကယ် ခြောက်စီး၊ ကားတစ်စီး ဆုံးရှုံးခဲ့သလို တိရစ္ဆာန်များအနေဖြင့် ကြက် အကောင်ရေ ၃၀၀ နှင့် ဝက်အကောင်ရေ ၅၀ ခန့်လည်း မီးလောင်သွားခဲ့ကြောင်း ဒေသခံများက ပြောသည်။
ဆော်လော်နောက်ကုန်းရွာ မီးလောင်သွားမှုကို မြင်တွေ့ရစဉ်
ထို့နောက် ဒေသခံများသည် မီးသင့်သွားသော နေအိမ်များ ပြန်လည် လုပ်ဆောင်ရန် အခက်အခဲများ ဖြစ်နေသလို စားစရာ အကူအညီများလည်း လိုအပ်နေကြောင်း သိရသည်။
ဆော်လော်နောက်ကုန်းရွာတွင် လူဦးရေ ၁၀၀၀ ကျော် နေထိုင်ပြီး အိမ်ခြေပေါင်း ၂၀၀ နီးပါးရှိကြောင်း သိရသည်။
- By CNI
- Category: လူမှုဘဝ
- Hits: 404
CNI International News
တိုကျို၊ ဇန်နဝါရီ ၂၅
ကလေးမွေးဖွားမှုနှုန်း ကျဆင်းနေခြင်းကြောင့် ဂျပန်နိုင်ငံသည် ဂျပန်လူ့အဖွဲ့အစည်းတစ်ခုအဖြစ် လုပ်ဆောင်နိုင် ခြင်း မရှိသော အခြေအနေသို့ ရောက်ရန် နီးစပ်နေပြီဟု ဝန်ကြီးချုပ်က ပြောကြောင်း ဘီဘီစီ အဂ်လိပ်ပိုင်း သတင်းတွင် ဖော်ပြသည်။
ထိုကိစ္စကို အမြန်ဆုံး ဆောင်ရွက်ရမည်ဟုလည်း ဝန်ကြီးချုပ် ဖူမီယို ကီရှီဒါ (Fumio Kishida)က ပြောသည်။
လူဦးရေ ၁၂၅ သန်းရှိသော ဂျပန်တွင် ပြီးခဲ့သည့်နှစ်၌ ကလေးမွေးဖွားနှုန်းမှာ ၈၀၀,၀၀၀ အောက် ကျဆင်းခဲ့သည်။
၁၉၇၀ နှစ်များတွင် နှစ်သန်းကျော်အထိ ရှိခဲ့သည်။ ဂျပန်နှင့်အိမ်နီးချင်း နိုင်ငံများတွင်လည်း ကလေးမွေးဖွားနှုန်း မှာ နှေးကွေးလျက်ရှိသည်။ သို့သော် ပြီးခဲ့သည့် ဆယ်စုနှစ်များအတွင်း လူ့သက်တမ်း မြင့်တက်လာခြင်းကြောင့် ထိုကိစ္စမှာ ဂျပန်နိုင်ငံအတွက် အရေးကြီးသော ကိစ္စတစ်ရပ် ဖြစ်လာသည်။
သက်ကြီးရွယ်အို များပြားကာ ၎င်းတို့ကို ထောက်ပံ့ပေးမည့် အလုပ်သမား အရေအတွက် နည်းပါးလာသည့် အဓိပ္ပါယ် ဖြစ်သည်။ ကမ္ဘာ့ဘဏ်၏ ထုတ်ပြန်ချက်၌ ဂျပန်သည် မိုနာကို ပြီးနောက် အသက် ၆၅ နှင့်အထက် လူဦးရေ ဒုတိယအများဆုံးနိုင်ငံ ဖြစ်လာသည်ဟု သိရသည်။
ဂျပန် ဝန်ကြီးချုပ် ဖူမီယို ကီရှီဒါကိုတွေ့ရစဉ် (GETTY IMAGES)
လူ့အဖွဲ့အစည်း တစ်ရပ်အဖြစ် ဆက်လက် ဆောင်ရွက် နိုင်ပါ့မည်လားဆိုသည့် အခြေအနေသို့ ရောက်ရှိနေပြီဟု ဂျပန်ဝန်ကြီးချုပ် ကီရှီဒါက လွှတ်တော်အမတ်များကို ပြောခဲ့သည်။
ကလေးများ၊ ကလေး မွေးဖွားခြင်း စသည်တို့နှင့် ပတ်သက်သော မူဝါဒများတွင် အလေးအနက်ထား ဆောင်ရွက် ခြင်းသည် အချိန်ဆွဲခြင်း၊ ရွှေ့ဆိုင်းခြင်း လုပ်ဆောင်၍ မရသောကိစ္စ ဖြစ်လာကြောင်းလည်း ၎င်းက ပြောသည်။
ကလေးများနှင့် ပတ်သက်သည့် ဂရိုဂရမ်များတွင် အသုံးစရိတ်ကို နှစ်ဆမြှင့်တင်လိုကြောင်း၊ ထိုကိစ္စနှင့် ပတ်သက် ၍ ဆောင်ရွက်ရန် အစိုးရအေဂျင်စီအသစ် တစ်ခုကိုလည်း လာမည့် ဧပြီလတွင် ဖွဲ့စည်းသွားမည်ဖြစ်ကြောင်း ကီရှီဒါက ပြောသည်။
ဂျပန်အစိုးရသည် ယခင်က အလားတူ မဟာဗျူဟာများ ချမှတ် ဆောင်ရွက်ခဲ့ဖူးသော်လည်း အောင်မြင်ခဲ့ခြင်း မရှိပေ။ ၂၀၂၀ ခုနှစ်တွင် လေ့လာသူများက ဂျပန်နိုင်ငံ၏ အမြင့်ဆုံး လူဦးရေဖြစ်သော ၂၀၁၇ ခုနှစ်က ၁၂၈ သန်းကို ရာစုနှစ် ကုန်ဆုံးချိန်တွင် ၅၃ သန်းအောက် ရောက်ရှိစေရေး စီမံကိန်းချ ဆောင်ရွက်ခဲ့သည်။
ဂျပန် ကလေးငယ်တစ်ဦးကိုတွေ့ရစဉ် (GETTY IMAGES)
လက်ရှိ လူဦးရေမှာ ၁၂၅ သန်းရှိသည်ဟု တရားဝင် ထုတ်ပြန်ထားသော အချက်အလက်များတွင် ဖော်ပြထား သည်။ ဂျပန်တွင် တချို့သော ဖြေလျော့မှုများ လုပ်ဆောင်ခဲ့သော်လည်း လူဝင်မှုနှင့် ပတ်သက်ပြီး တင်းကြပ်သော ဥပဒေများကို ကျင့်သုံးနေဆဲဖြစ်သည်။
ထို့ကြောင့် နိုင်ငံ၏ သက်ကြီး လူ့အဖွဲ့အစည်းကို ကိုင်တွယ်ရေး အကူအညီ ဖြစ်စေရန် အချို့သော သတ်မှတ်ချက် များကို လျှော့ပေါ့သင့်သည်ဟုလည်း ကျွမ်းကျင်သူများက ပြောသည်။
နိုင်ငံ၏ ကလေးမွေးဖွားမှုနှုန်း ကျဆင်းခြင်းသည် လူနေမှု ကုန်ကျစရိတ်မြင့်ခြင်း၊ ပညာရေးနှင့် လုပ်ငန်းခွင်တွင် အမျိုးသမီးများ ပါဝင်လာခြင်း၊ သန္ဓေတားဆေး ပိုမိုလွယ်ကူလာခြင်းတို့ အပါအဝင် အကြောင်းအရာများစွာတို့ ကြောင့်ဖြစ်သည်။
ထိုအခြေအနေများက ဂျပန်အမျိုးသမီးများကို ကလေးအနည်းငယ်သာ ယူရန်ဖြစ်စေခဲ့သည်။
Source: BBC
- By CNI
- Category: လူမှုဘဝ
- Hits: 588
CNI International News
ဘန်ကောက်၊ဇန်နဝါရီ ၁၇
ဆူဖန်ဘူရီ(Suphan Buri) ပြည်နယ်ရှိ နိုင်ငံခြားသားများကို ကုသပေးနေသော အလှအပရေးရာ ဆေးခန်းတစ်ခု နှင့် ဆန်စက်အဟောင်းတစ်ခုတို့ကို ဝင်ရောက်စီးနင်းမှု လုပ်ဆောင်ခဲ့ရာ ဘတ် ၉ ဒသမ ၅ သန်း တန်ကြေးရှိ တရားမဝင် ဆေးဝါးများနှင့် စားသောက်ကုန်များအပြင် ဆီလီကွန်များကို သိမ်းဆီးရမိခဲ့သည်ဟု ဘန်ကောက်ပို့စ် သတင်းတွင် ဖော်ပြထားသည်။
ဘန်ကောက်မြို့ ပသွမ်ဝမ် (Pahtumwan) ခရိုင်ရှိ ဂေဆွန်တာဝါမှ အလှအပဆေးခန်းကို သောကြာနေ့တွင် ဝင်ရောက် စီးနင်းခဲ့သည်ဟု ထိုင်းရဲအရာရှိတစ်ဦးဖြစ်သူ နီတီဝေါင်ကူလတ် (Neti Wongkularp) က ပြောသည်။
ထိုဆေးခန်းသည် ကျန်းမာရေး ဝန်ဆောင်မှုများ၊ ကုထုံးများနှင့် ထိုင်းရေးရာ ဆေးကုသမှုများကို နိုင်ငံခြားသားများ သို့ အဓိကထား ဆောင်ရွက်ကြောင်း၊ သို့သော် ယင်းတွင် မှတ်ပုံတင်မရှိသော ဆေးဝါးများကို တင်သွင်းကာ အန္တရာယ်ရှိသော ဆေးဝါးပစ္စည်းများ ပါဝင်သည့် စားသောက်ကုန်များကို ရောင်းချနေကြောင်း ၎င်းက ပြောသည်။
ထို့နောက် အဆိုပါ ဆေးခန်းသည် လူနာများ၏ အိုမင်းရင့်ရော်မှုကို တားဆီးပေးရန် သွေးစစ်၍ အဆိပ်ထုတ်ခြင်း၊ အိုမင်းရင့်ရော်မှု ကာကွယ်ပေးခြင်းတို့ အပြင် အသည်းနှင့်ဦးနှောက်ဆိုင်ရာ ကုထုံးများကိုပါ လုပ်ဆောင်ပေးကာ ထိုကုသမှုများသည် အနည်းဆုံး ဘတ် ၁၀၀၀ မှ ဘတ် ၂ သန်းအထိ တန်ကြေးရှိသည်ဟု သိရသည်။
တရားမ၀င် ဆီလီကွန်များကို ထုတ်လုပ်သည့် အမျိုးသမီးကို ဖမ်းဆီးစဉ်
ထိုဆေးခန်းအား ရှာဖွေရာတွင် ဘတ် ၅ ဒသမ ၉၈ သန်းဖိုးရှိ မှတ်ပုံတင်မရှိသော ဆေးဝါးများနှင့် အစားအသောက် အထုပ်ပေါင်း ၂၅၂ ထုပ်ကို တွေ့ခဲ့ရသည်ဟုလည်း သိရသည်။
ထို့ကြောင့် ထိုဆေးခန်း၏ ဒါရိုက်တာများကို တရားမဝင် ဆေးဝါးများနှင့် အစားအစာများ ရောင်းချခြင်းဖြင့် တရား ဆွဲဆိုထားပြီး ဆရာဝန်များကို ဆေးခန်းတွင် လိုအပ်သော အသုံးအဆောင်၊ ပစ္စည်းကိရိယာနှင့် ဆေးဝါးများ ထောက်ပံ့ရန် ပျက်ကွက်မှုဖြင့် တရားဆွဲဆိုခဲ့သည်။
သံသယရှိသူများကို စုံစမ်းစစ်ဆေးမှုများ လုပ်ဆောင် ရမည်ဖြစ်သောကြောင့် ထိုသူများ၏ အမည်များကို ထိုင်းရဲ တပ်ဖွဲ့က ထုတ်ပြန်ခြင်း မရှိပေ။
ဆူဖန်ဘူရီပြည်နယ်၊ သီရိပရာချန်ခရိုင်ရှိ ဆန်စက်ဟောင်း တစ်ခုကိုလည်း ထိုင်းရဲတပ်ဖွဲ့နှင့် FDA တို့မှ ရှာဖွေမှုလုပ် ဆောင်ခဲ့ရာ တခြားပြည်နယ်များရှိ ဆေးခန်းများသို့ ဖြန့်ဖြူးနေသည့် ဆီလီကွန် ထိုးသွင်းပစ္စည်းများကို တရားမဝင် ထုတ်လုပ်နေကြောင်း တွေ့ခဲ့ရသည်။
ယင်းတွင် ဘတ် ၃ ဒသမ ၅၀ သန်း တန်ကြေးရှိ နှာခေါင်းနှင့်နဖူးတွင် အသုံးပြုသော ဆီလီကွန်ထုတ်စက်များ၊ ဆီလီကွန်မိုလ်များကို သိမ်းဆည်းရမိခဲ့သည်။
ထိုဖြစ်ရပ်အတွက် အသက် ၃၃ နှစ်အရွယ် အမျိုးသမီးတစ်ဦးကို တရားမဝင် ထုတ်လုပ်ဖြန့်ဖြူးမှုဖြင့် တရားဆွဲဆို ထားပြီး ထိုစက်ရုံတွင် လွန်ခဲ့သည့် နှစ်နှစ်ခန့် ကတည်းက ဆီလီကွန် ထုတ်လုပ်မှုများကို လုပ်ဆောင်နေသည်ဟု သိရသည်။
တရားမ၀င် ဆီလီကွန်များကိုတွေ့ရစဉ်
ထို့ကြောင့် တခြားပြည်နယ်များရှိ ဆေးခန်း ၃၀ ခန့်ကို ဝင်ရောက်ရှာဖွေခဲ့ရာ ဆန်စက် အဟောင်းစက် ရုံမှ ဝယ်ယူထားသော ဘတ် ၂ ဒသမ ၉၃ သန်း တန်ဖိုးရှိ ဆီလီကွန်နှင့် ဆက်စပ်ပစ္စည်းများကို တွေ့ခဲ့ရသည်။
အဆိုပါ ဆီလီကွန်များသည် ထုတ်လုပ်ရန် ဘတ် ၆၀ မှ ၈၀ ကြားသာ ကုန်ကျသော်လည်း ယင်းတို့ကို ဆေးခန်း များတွင် ဘတ် ၄၉၀၀ မှ ၅၀၀၀ အထိ ဈေးတင်ရောင်းချသည်။ ပြီးခဲ့သည့် နှစ်မှစ၍ ထိုဆေးခန်းများတွင် အလှအပ ဆိုင်ရာ ခွဲစိတ်မှုပေါင်း ၁၆၂၁ ခု ပြုလုပ်ခဲ့ပြီး ဆေးခန်းများမှ ဝန်ထမ်းများကို တရားမဝင်၊ ဘေးမကင်း၊ မှတ်ပုံတင် ထားခြင်း မရှိသော ဆေးဝါးပစ္စည်းများ ရောင်းချမှုနှင့် တရားစွဲဆိုသွားမည်ဟု သိရသည်။
Source: ဘန်ကောက်ပို့စ်
- By CNI
- Category: လူမှုဘဝ
- Hits: 320
CNI International News
အက်ရာ၊ဇန်နဝါရီ ၁၄
၂၀၂၃ ခုနှစ်တွင် အစိုးရဝန်ထမ်းအားလုံး၏ လစာကို ၃၀ ရာခိုင်နှုန်းတိုးမြှင့်ရန် ဂါနာအစိုးရနှင့် ကုန်သွယ်ရေး သမဂ္ဂတို့အကြား သဘောတူညီချက် ရရှိခဲ့သည်ဟု ပူးတွဲထုတ်ပြန် ကြေညာခဲ့သည်ဟု အယ်ဂျာဇီးယား သတင်း တွင် ဖော်ပြထားသည်။
ပြည်သူ့ဝန်ထမ်းများကို ကိုယ်စားပြုသော ကုန်သွယ်ရေးသမဂ္ဂများသည် လစာ တိုးပေးရန်အတွက် နိုဝင်ဘာလ တွင် စတင်ညှိနှိုင်းခဲ့သည်။ ခက်ခဲမှုများကြောင့် လမ်းပေါ်ထွက် ဆန္ဒပြမှုများ ပေါ်ပေါက်လာခဲ့ပြီး လအနည်းငယ် အကြာတွင် ဖြစ်သည်။
ထိုဆန္ဒပြပွဲများကြောင့် ဂါနာအစိုးရသည် အပြည်ပြည်ဆိုင်ရာ ငွေကြေးရံပုံငွေအဖွဲ့(IMF)ထံမှ အကူအညီ တောင်းခဲ့ ရသည်။ အစိုးရနှင့် ကုန်သွယ်ရေးသမဂ္ဂများ၏ သဘောတူညီချက်အရ လစာတိုးမြှင့်မှုသည် ဇန်နဝါရီ ၁ ရက်နေ့မှ စတင် အကျုံးဝင်မည် ဖြစ်သည်။
ရွှေ၊ ရေနံနှင့် ကိုကိုးထုတ်ကုန် နိုင်ငံတစ်ခုဖြစ်သော ဂါနာသည် အာဖရိကဒေသကို တက်သစ်စ ကြယ်ပွင့်နိုင်ငံဟု ကမ္ဘာဘဏ်က သတ်မှတ်ခဲ့သော်လည်း လက်ရှိအချိန်တွင် အနောက်အာဖရိကနိုင်ငံ၌ မျိုးဆက်တစ်ခုအတွင်း အဆိုးရွားဆုံး စီးပွားရေး ပဋိပက္ခတစ်ခု ဖြစ်ပေါ်နေသည်။
ဂါနာအစိုးရဝန်ထမ်းများကိုတွေ့ရစဉ်
အလားတူ ငွေကြေးဖောင်းပွမှုလည်း ၂၁ နှစ်အတွင်း အမြင့်ဆုံးအဖြစ် ၅၀ ဒသမ ၃ ရာခိုင်နှုန်းသို့ စံချိန်တင် မြင့်တက်နေသည်။
အစိုးရ၏ အသုံးစရိတ် လျော့ချခြင်း၊ ငွေကြေးဖောင်းပွမှု နည်းပါးစေရေး ဗဟိုဘဏ်၏ အတိုးနှုန်း မြှင့်တင်မှု မအောင်မြင်ခြင်းတို့ကြောင့် ပြီးခဲ့သည့် နှစ်တွင် ဂါနာနိုင်ငံသုံးငွေကြေး စီဒီ (cedi)၏ တန်ဖိုးသည် ဒေါ်လာဈေး ထက် သိသိသာသာ ကျဆင်းခဲ့သည်။
ထို့နောက် ပြီးခဲ့သည့်လတွင် ငွေကြေးဖောင်းပွမှုလည်း အမြင့်ဆုံးအဖြစ် ၅၄ ရာခိုင် နှုန်းအထိ ရှိခဲ့သည်။
ဂါနာအစိုးရသည် လိုငွေလျော့ရန်၊ ငွေကြေးဖောင်းပွမှုကို ထိန်းရန်နှင့် ငွေကြေးတန်ဖိုး ကျဆင်းမှုကို လျော့နည်း စေရန်အတွက် ဝန်ကြီးများ၏ လစာဖြတ်တောက်ခြင်း အပါအဝင် ပြီးခဲ့သည့် မတ်လတွင် အသုံးစရိတ် လျော့ချမှု များ လုပ်ဆောင်ခဲ့သည်။
ဂါနာပြည်သူများကိုတွေ့ရစဉ်
သို့သော် အစိုးရသည် နိုင်ငံသားများအပေါ် ကမ္ဘာလုံးဆိုင်ရာ စိန်ခေါ်မှုများ၏ သက်ရောက်မှုများ အတွက်ကြောင့် ဟုဆိုကာ ပြီးခဲ့သည့် ဇူလိုင်လတွင် ဝန်ထမ်းများအတွက် လူနေမှုစရိတ်ကို ၁၅ ရာခိုင်နှုန်း တိုးမြှင့်ပေးခဲ့သည်။
ထိုအပြင် အစိုးရသည် သုံးနှစ်ကြာ ထောက်ပံ့ရေး စီမံကိန်းအဖြစ် ပြီးခဲ့သည့် ဒီဇင်ဘာလတွင် IMF နှင့် ဒေါ်လာ ၃ ဘီလီယံတန် ဝန်ထမ်းအဆင့် သဘောတူညီမှုတစ်ခုကို ရရှိခဲ့သည်။
သို့သော် ထိုရံပုံငွေကို ရရှိရေးအတွက် အကြွေးများနှင့်ပတ်သက်၍ ပြန်လည် တည်ဆောက်ရန် လိုအပ်နေဆဲ ဖြစ်သည်။ အစိုးရသည် ပြီးခဲ့သည့်လတွင် ပြည်တွင်း အကြွေးပြောင်းလဲရေး အစီစဉ်ကို စတင်ခဲ့ကာ နောက်ပိုင်း တွင် ပြည်ပအကြွေး ဒေါ်လာ ၂၈ ဒသမ ၄ ဘီလီယံကို ပေးဆောင်ရန် ပျက်ကွက်ခဲ့သည်ဟု ပြောသည်။
G20 ဘုံအခြေခံ မူဘောင်အရ ၎င်းတို့၏ နှစ်ဦးနှစ်ဖက် အကြွေးများကို ပြန်လည် ဖွဲ့စည်းရန်လည်း ဂါနာအစိုးရက ယခု သီတင်းပတ်တွင် တောင်းဆိုခဲ့သည်။
Source: အယ်ဂျာဇီးယား
- By CNI
- Category: လူမှုဘဝ
- Hits: 319
CNI International News
ဘန်ကောက်၊ ဇန်နဝါရီ ၆
နှစ်သစ်ကူးပိတ်ရက် အစိုးရ၏ သီတင်းပတ်ကြာ လမ်းအန္တရာယ်ကင်းရှင်းရေး ကမ်ပိန်းအတွင်း ထိုင်းနိုင်ငံ တစ်ဝန်း လုံး၌ ယာဉ်မတော်တဆမှုပေါင်း ၂၄၄၀ ခုဖြစ်ပွားခဲ့ပြီး လူပေါင်း ၃၁၇ ဦးသေဆုံးကာ ၂၄၃၇ ဦးဒဏ်ရာရရှိခဲ့သည်ဟု ဘန်ကောက်စ်ပို့စ် သတင်းတွင် ဖော်ပြထားသည်။
ကမ်ပိန်းကို ၂၀၂၂ ခုနှစ်၊ ဒီဇင်ဘာ ၂၉ ရက်မှ ၂၀၂၃ ခုနှစ်၊ ဇန်နဝါရီ ၄ ရက်အထိ သီတင်းပတ် တစ်ပတ်ကြာ လုပ် ဆောင်ခဲ့ခြင်း ဖြစ်သည်။ ပြည်ထဲရေးဌာန၏ ဒုတိယအမြဲတမ်းအတွင်းဝန် ချိုတီနာရင် ကတ်ဆွမ် (Choternarin Kerdsom) က ထိုအချက်အလက်များကို ကြာသပတေးနေ့တွင် ထုတ်ပြန်ခဲ့ခြင်းဖြစ်သည်။
ခုနစ်ရက်ကြာ ကာလအတွင်း နိုင်ငံတောင်ပိုင်းရှိ ဆုရတ်ဌာနီ (Surat Thani) ပြည်နယ်သည် မတော်တဆမှု အများဆုံးအဖြစ် ၇၉ ခု ဖြစ်ခဲ့သည်။ မြောက်ပိုင်းရှိ ချင်းရိုင်(Chaing Rai) ပြည်နယ်သည် လူသေဆုံးမှု အများဆုံး ဖြစ်ကာ ၁၅ ဦး သေဆုံးခဲ့ပြီး အနောက်ပိုင်းရှိ ကန်ချနာဘူရီ (Kanchanaburi) သည် ဒဏ်ရာရသူ အများဆုံးအဖြစ် ၉၁ ဦး ရှိခဲ့သည်။
ထို့နောက် ဘန်ကန် (Bung Kan)၊ နာရာသီဝပ်(Narathiwat)၊ ဖန်းင(Phangnga)၊ ဆာတွန်(Satun)နှင့် ဆူခိုထိုင်း (Sukhothai) ပြည်နယ် ငါးခုတွင် လမ်းမတော်တဆမှုကြောင့် လူသေဆုံးမှု မရှိခဲ့ပေ။
ထိုင်းနိုင်ငံမှာ ယာဉ်တိုက်မှုဖြစ်ပွားစဉ်
မူး၍ မောင်းနှင်ခြင်းသည် ယာဉ်မတော်တဆမှု ဖြစ်စေသည့် အဓိကအကြောင်းအရာ တစ်ခုဖြစ်ကာ အရှိန်မြှင့် မောင်းခြင်းနှင့် ဘေးကင်းရေး ကန့်သတ်ချက်များကို မလိုက်နာခြင်းက ထိခိုက်သေဆုံးမှု ဖြစ်စေသည့် အဓိက အကြောင်းအရင်းဟု ချိုတီနာရင်က ပြောသည်။
ခုနစ်ရက်တာ ကာလအတွင်း မတော်တဆမှု အများစုသည် မော်တော် ဆိုင်ကယ်နှင့် ပတ်သက်၍ ဖြစ်ပွားခဲ့ခြင်း ဖြစ်ကာ ထိခိုက်သေဆုံးသူ ၇၀ ရာခိုင်နှုန်းမှာ ဦးထုပ်ဆောင်ခြင်းမရှိဟု ၎င်းက ပြောသည်။
သို့သော် ယခင်နှစ်နှင့် နှိုင်းယှဉ်လျှင် ယာဉ်မတော်တဆမှုကြောင့် ထိခိုက်သေဆုံးသူ အရေအတွက်မှာ ကျဆင်း သွားသည်။ ၂၀၂၁-၂၂ ကမ်ပိန်းတွင် မတော်တဆမှု ၂၇၀၇ ခု၊ သေဆုံးသူ ၃၃၃ ဦးနှင့် ဒဏ်ရာရသူ ၂၆၇၂ ဦး ရှိခဲ့ပြီး ၂၀၂၀-၂၁ ကမ်ပိန်းတွင် မတော်တဆမှု ၃၃၃၃ခု၊ သေဆုံးသူ ၃၉၂ ဦးနှင့် ဒဏ်ရာရသူ ၃၃၂၆ ဦး ရှိခဲ့သည်။
ဒီဇင်ဘာ ၂၉ ရက်မှ ဇန်နဝါရီ ၄ ရက်အတွင်း တရားရုံးမှ မူး၍မောင်းနှင်မှု ၈၅၆၇ မှု၊ မဆင်မခြင် မောင်းနှင်မှု ၂၁ မှု နှင့် မူးယစ်ဆေးဝါး သုံးစွဲမောင်းနှင်မှု ၃၃၅ မူတို့အတွက် ယာဉ်မောင်းများကို ခံဝန်ဖြင့် စောင့်ကြည့်ကာလတွင် ထားရန် အမိန့်ချမှတ်ခဲ့သည်ဟု စောင့်ကြည့်ဌာနမှ အရာရှိက ပြောသည်။
ရွိုင်အတ် (Roi Et) ပြည်နယ်တွင် အရက်သောက် မောင်းနှင်မှု အများဆုံးဖြစ်ကာ ၄၆၉ ခု ဖြစ်ခဲ့သည်။ ပြီးခဲ့သည့် နှစ်နှင့်နှိုင်းယှဉ်လျှင် ယခုနှစ်တွင် အရက်သောက် မောင်းနှင်မှု အရေအတွက်မှာ ၈ ဒသမ ၈၈ ရာခိုင်နှုန်းအထိ မြင့်တက်လာခြင်း ဖြစ်သည်ဟုလည်း သိရသည်။
Source: ဘန်ကောက်စ်ပို့စ်