CNI International News
တိုကျို၊ ဇွန်လ ၂၁
ဂျပန်နိုင်ငံတွင် ပြည်ပခရီးသွားများ အများအပြား ဝင်ရောက်နေသဖြင့် လူများ ပြည့်ကျပ်ကာ ခရီးသွားများ၏ မကောင်းသည့် အပြုအမူများကြောင့် ဝေဖန်မှုများ ထွက်ပေါ်နေ၍ ထိုအရေးကိစ္စကို အာဏာပိုင်များက ဖြေရှင်းရန် စီစဉ်နေကြောင်း ဘန်ကောက်ပို့စ်မှ ဖော်ပြခဲ့သည်။
ထိုသို့ ဖြေရှင်းမည့် အစီအစဉ်များတွင် ပြည်ပခရီးသွားများအတွက် အခကြေးငွေ ပိုမိုကောက်ခံမှု အပါအဝင် ခရီးသွားကဏ္ဍမှ ရရှိသည့်ဝင်ငွေကို မထိခိုက်စေရန် လုပ်ဆောင်ရမည့် နည်းလမ်းများကို ရှာဖွေလျက်ရှိသည်။
ယခုနှစ် မေလက ဂျပန်သို့ ပြည်ပခရီးသွားဝင်ရောက်မှု ၃ ဒသမ ၀၄ သန်းရှိခဲ့သည်။ ထိုပမာဏသည် ၂၀၁၉ ခုနှစ်၊ မေလကထက် ပြည်ပခရီးသွားဝင်ရောက်မှု ၉ ဒသမ ၆ ရာခိုင်နှုန်း မြင့်တက်ခဲ့သည်ဟု ဂျပန်အမျိုးသား ခရီးသွား လုပ်ငန်းအဖွဲ့က ဇွန်လ ၁၉ ရက်တွင် ပြောကြားခဲ့သည်။
ဂျပန်၏ ယန်းငွေတန်ဖိုး ကျဆင်းနေမှုက ခရီသွားများ ပိုမိုဝင်ရောက်လာစေသည့် အကြောင်းရင်းတစ်ခု ဖြစ်နေသည်ဟု တာဝန်ရှိသူများက ပြောသည်။
သက်ကြီးပိုင်း လူဦးရေ များပြားလာပြီး နိုင်ငံ့လူဦးရေ လျော့နည်းလာသည့် ဂျပန်တွင် ခရီးသွားများ၏ ငွေကြေး သုံးစွဲမှုများက စီးပွားရေးလုပ်ငန်း အများအပြားကို အကျိုးအမြတ်များ ရရှိစေခဲ့သော်လည်း ဒေသခံများကမူ ဂျပန်၏ လှပသည့်နေရာများတွင် ခရီးသွားများ ပြည့်နှက်နေမှုနှင့် ဘတ်စ်ကားများပေါ်တွင်လည်း ခရီးသွားများ ပြည့်နှက်နေသဖြင့် အလုပ်သွားရန်ပင် အခက်တွေ့နေမှုတို့ကြောင့် စောဒကတက်မှုများလည်း ရှိလာခဲ့သည်။
ဂျပန်ခရီးသွားများကို တွေ့ရစဉ်
ထို့ကြောင့် ဂျပန်သည် ပြည်ပခရီးသွားများအတွက် အထင်ကရ နေရာများတွင် ဝင်ကြေးကောက်ခံမှုများကို တိုးမြှင့်ရန် စီစဉ်ပြီး ခရီးသွားအရေအတွက်အား လျှော့ချကာ အခကြေးငွေ ပိုမိုကောက်ခံခြင်းဖြင့် ဝင်ငွေလျော့ကျ မသွားစေရန် စီစဉ်လျက်ရှိသည်။
ဂျပန်တွင် ကမ္ဘာ့အမွေအနှစ် စာရင်းဝင်သည့် နှစ်သက်တမ်း ၄၀၀ ကျော်ရှိပြီဖြစ်သည့် Himeji ရဲတိုက်တွင် ဒေသခံများကို ဝင်ကြေး ၅ ဒေါ်လာ သတ်မှတ်ထားပြီး ပြည်ပခရီးသွားများကို ဒေါ်လာ ၃၀ သတ်မှတ်ထားသည်။
သို့သော် အိန္ဒိယတွင် တာ့ဂျ် မဟာ (Taj Mahal) အဆောက်အအုံ ဝင်ကြေးသည် ပြည်ပခရီးသွားများက ဒေသခံ များထက် အဆ ၂၀ ပိုမို ပေးဆောင်နေရသဖြင့် ထိုအစီအစဉ်အတိုင်း ဝင်ကြေးများကို ပိုမိုကောက်ခံရန် ဂျပန် တာဝန်ရှိသူများက ပြင်ဆင်လျက်ရှိသည်။
ဂျပန်တွင် ၁၆၉၀ ပြည့်နှစ်က တည်ဆောက်ပြီးစီးခဲ့သည့် Himeji ရဲတိုက်သို့ လာရောက်သည့် ပြည်ပခရီးသွား အရေအတွက်သည် ပြီးခဲ့သည့်နှစ်က ၄၀၀,၀၀၀ အထိ စံချိန်တင် မြင့်တက်ခဲ့ပြီး ထိုရဲတိုက်သို့ လာရောက်သူ စုစုပေါင်း၏ ၃၀ ရာခိုင်နှုန်းရှိခဲ့သည်။
Source: ဘန်ကောက်ပို့စ်
