CNI News
၂၀၂၄ ခုနှစ်၊ မေလ ၁၃
သန်လျင်နှင့် သာကေတမြို့နယ်ကို ဆက်သွယ်တည်ဆောက်နေသော တံတားပြီးစီးတော့မည်ဖြစ်၍ ရန်ကုန်တိုင်း ဒေသကြီး၊ သန်လျင်မြို့နယ်ရှိ အိမ်ခြံမြေဈေးသည် လက်ရှိတွင် ယခင်ကထက် ထပ်မံမြင့်တက်လာနေကြောင်း အိမ်ခြံမြေ ရောင်းဝယ်သူများထံမှ သိရသည်။
အိမ်ခြံမြေဈေးနှုန်းသည် ယခင်ကထက် ၃ ပုံ ၁ ပုံခန့် မြင့်တက်လာနေသည်ဟု အိမ်ခြံမြေအကျိုးဆောင် မဂျူးဂျူး က CNI သတင်းဌာနသို့ ပြောသည်။
၎င်းက “အခု အဝယ်လေးတော့ လိုက်လာတာတယ်၊ ဟုတ်ပါတယ် မြင့်တက်လာတာလည်း မှန်ပါတယ်။ ထက်ဝက်တော့ မဟုတ်ပါဘူး။ ၃ ပုံ ၁ ပုံလောက်ပေါ့။ အရင်တုန်းက ၉၀၀ ဆိုရင် အခုက ၁၃၀၀ လောက် ဖြစ်နေတယ်။ မြောက်ဒဂုံတို့ဘက်တော့ အေးတယ်လို့ ကြားတာပဲ။ သန်လျင်မှာကျတော့ အဲဒီလို မဟုတ်ဘူး။ သူ့ဟာနဲ့သူ ရောင်းနေရတာပေါ့နော်။ သန်လျင်က တခြားနေရာထက်စာရင် သန်လျင်က နည်းနည်း ဈေးသက်သာ သေးတယ်လေ သန်လျင် ဈေးတက်တယ်ဆိုတာက။ နောက်ပြီးတော့ သန်လျင်မှာက ၃၀၀ လောက်ဆို ဝယ်လို့ရ သေးတာကိုး။ ၂၀ - ၆၀ တို့၊ ၄၀ - ၆၀ တို့။ သန်လျင်က နည်းနည်း အဝယ်လိုက်တာပေါ့။ တံတားကလည်း ပြီးတော့မယ်၊ ၇ လပိုင်းကုန် ဖွင့်မယ်လို့တော့ ကြားတာပဲ၊ တံတားကြောင့်လည်းပါမယ်၊ ဈေးကလည်း တခြား မြောက်ဒဂုံ တို့ထက်စာရင် ဈေးက သက်သာသေးတယ်ဆိုပြီးတော့ သန်လျင်ကတော့ အဝယ်လိုက်တာပေါ့” ဟု ပြောသည်။
သန်လျင်တံတားကိုတွေ့ရစဉ်
ယခင်က သန်လျင်တွင် အိမ်ခြံမြေ အရောင်းအဝယ် လုပ်ကိုင်သူများသာ ဝယ်ယူမှုများ ရှိသော်လည်း လက်ရှိတွင် နေထိုင်ရန်အတွက် လာရောက်ဝယ်ယူမှု ပိုများနေကြောင်း၊ သန်လျင်အိမ်ခြံမြေဈေးကွက်အတွင်း ယခင်က ပေ ၂၀ - ၆၀ တစ်ကွက်လျှင် ငွေကျပ် သိန်း ၉၀၀ ကျော် ရှိသော်လည်း လက်ရှိတွင် ငွေကျပ် သိန်း ၁၃၀၀ အထိ ရှိနေသည်။
မိုးတွင်းကာလတွင် အိမ်ခြံမြေ အရောင်းအဝယ် ဈေးကွက်နှေးသည့်သဘော ရှိသော်လည်း လက်ရှိတွင် သန်လျင် မြို့နယ်အတွင်း ရောင်းချရန် မြေကွက် မရှိသလောက် နည်းပါးနေခြင်းကြောင့် ဈေးနှုန်းကျဆင်းရန် မရှိကြောင်း အိမ်ခြံမြေ အကျိုးဆောင်တစ်ဦးဖြစ်သည့် မထက်မွန်က CNI သတင်းဌာနသို့ ပြောသည်။
၎င်းက “မနှစ်က မိုးတွင်းမှာလည်း အစ်မတို့ ရောင်းရတာပဲ။ မိုးတွင်းမှာလည်း အစ်မတို့ အရောင်းအဝယ် ဖြစ်နေ တာပဲ။ မိုးတွင်းဆို နည်းနည်းလေးတော့ ဒါပေမယ့် မိုးတွင်းမှာ လုံးလုံးကြီး ဈေးကျသွားပြီးတော့ ဈေးတမျိုး ပြောင်းသွားမယ်ဆိုတာ မရှိဘူး။ ခြံကလည်း အဲဒီလောက်ကြီးတောင် သိပ်မကျန်တော့ဘူး အခုဟာက။ လူတွေ ကလေ ခြံတွေ၊ မြေတွေပဲ စုဝယ်နေကြတာ အဲဒီလို ဖြစ်နေတယ်” ဟု ပြောသည်။
သန်လျင်မြို့အ၀င်ဆိုင်းဘုတ်ကိုတွေ့ရစဉ်
ယခင်က သန်လျင်မြို့နယ်အတွင်းတွင် ဂရန်မြေများကိုသာ အများအပြား ဝယ်ယူကြသော်လည်း လက်ရှိတွင် ပါမစ်မြေ၊ စလစ်မြေ၊ လယ်မြေနှင့် ဥယျာဉ်ခြံမြေများလည်း ဝယ်ယူမှု မြင့်တက်လျက်ရှိနေကြောင်း၊ တချို့သော ရပ်ကွက်များတွင် ရောင်းချရန် မြေကွက်များ မရှိသလောက် နည်းပါးနေပြီဖြစ်ကြောင်း သန်လျင်ရှိ အိမ်ခြံမြေ အကျိုးဆောင်များက ပြောသည်။
သန်လျင်တံတား အမှတ် ၃ ပြီးစီးသွားပါက လက်ရှိ တံတားအမှတ် ၁ တွင် ဖြစ်ပေါ်နေသည့် ယာဉ်ကြောပိတ်ဆို့မှု များလည်း ပြေလည်သွားမည်ဖြစ်သည့်အပြင် ရန်ကုန်မြို့လယ်ခေါင်နှင့်လည်း အချိန်တိုအတွင်း ရောက်ရှိသွားမည် ဖြစ်သည်။
ထို့အပြင် သီလဝါ အထူးစီးပွားရေးဇုန် ရှိသည့်အတွက် သန်လျင်မြို့နယ်သည် စီးပွားရေး လုပ်ဆောင်ရန် အကောင်းဆုံးသောမြို့ ဖြစ်လာမည့်အပြင် သန်လျင်နှင့် ဆက်စပ်လျက်ရှိနေသည့် ကျောက်တန်းမြို့နယ်၊ သုံးခွမြို့နယ်နှင့် ခရမ်းမြို့နယ်များ၏ အိမ်ခြံမြေ ဈေးသည်လည်း မြင့်တက်လာနိုင်သည်ဟု သုံးသပ်နေကြသည်။
