- By CNI
- Category: စီးပွားရေး
- Hits: 340
CNI International News
နယူးဒေလီ၊ အောက်တိုဘာ ၁၈
အိန္ဒိယဝန်ကြီးချုပ် မိုဒီ (Narendra Modi) သည် နိုင်ငံ၏ ပင်လယ်ရေကြောင်း ကဏ္ဍအတွက် နှစ်ရှည် အစီအစဉ် တစ်ခု၏ တစ်စိတ်တစ်ပိုင်းအနေနှင့် ရူပီး ၂၃၀ ဘီလျံ (ဒေါ်လာ ၂ ဒသမ ၇ ဘီလျံ)ချီ တန်ဖိုးရှိသည့် ပင်လယ်ရေ ကြောင်း စီမံကိန်းများအတွက် အုတ်မြစ်ချ အခမ်းအနားကို အောက်တိုဘာ ၁၇ ရက်က ပြုလုပ်ခဲ့သည်ဟု အာတီ သတင်းဌာနမှ ဖော်ပြခဲ့သည်။
Covid-19 ကပ်ရောဂါနှင့် အနောက်နိုင်ငံများ၏ ပိတ်ဆို့မှုဆိုင်ရာ မူဝါဒများကြောင့် ထောက်ပံ့ရေး ကွင်းဆက်များ ထိခိုက်ခဲ့ပြီးနောက် အိန္ဒိယသည် ယုံကြည်အားထားရပြီး ရေရှည်တည်တံ့သည့်် ထောက်ပံ့ရေး ကွင်းဆက်တစ်ခုကို ထူထောင်ရန် ရည်ရွယ်လျက်ရှိသည်။
မွမ်ဘိုင်း (Mumbai) မြို့တွင် သုံးရက်ကြာပြုလုပ်သည့် Maritime India Summit 2023 ညီလာခံဖွင့်ပွဲ၌ မိုဒီက ရင်းနှီးမြှုပ်နှံသူများကို အိန္ဒိယသို့ လာရောက်ရန်၊ ဖွံ့ဖြိုးတိုးတက်ရေးအတွက် အတူတကွ လက်တွဲလုပ်ဆောင်ရန် တိုက်တွန်းခဲ့သည်။
Maritime India Summit 2023 ညီလာခံ ကျင်းပနေစဉ်
"ကမ္ဘာ့အခင်းအကျင်းသစ်ဟာ ပေါ်ထွက်လာပြီဖြစ်ပြီး ကမ္ဘာတစ်ခုလုံးဟာလည်း ရည်မှန်းချက် အသစ်တွေနဲ့အတူ အိန္ဒိယနဲ့ လက်တွဲလုပ်ဆောင်ဖို့ စီစဉ်နေပါတယ်။ အိန္ဒိယဟာ ကမ္ဘာ့အင်အားအကြီးဆုံး ထိပ်သီးစီးပွားရေးနိုင်ငံ သုံးနိုင်ငံထဲမှာ ပါဝင်ဖို့ နီးစပ်လာပါပြီ"ဟု မိုဒီက ပြောကြားခဲ့သည်။
ထို့ပြင် အိန္ဒိယ၏ ပင်လယ်ရေကြောင်းဆိုင်ရာ စွမ်းဆောင်ရည်များသည် ယခင်ကတည်းက ကမ္ဘာအတွက် အထောက်အကူ ဖြစ်စေခဲ့ပြီး အိန္ဒိယအစိုးရသည် ပင်လယ်ရေကြောင်းကဏ္ဍကို ပိုမိုခိုင်မာစေရန် ကိုးနှစ်ကျော်ကြာ အားထုတ်ကြိုးပမ်းခဲ့သည်ဟုလည်း မိုဒီက ပြောသည်။
ထိုအားထုတ် ကြိုးပမ်းမှုများအနက် အကြီးစားသင်္ဘောများ ပိုမိုဆိုက်ကပ်နိုင်မည့် ဆိပ်ကမ်းအကြီးစားများ တည်ဆောက်မှုကို နှစ်ဆမြှင့်တင်ရန်၊ ဆိပ်ကမ်းနှင့် ဆက်သွယ်ထားသည့် ကားလမ်းကြောင်းများကို ပိုမို ဖောက်လုပ်ရန်နှင့် ကမ်းရိုးတန်းရှိ အခြေခံ အဆောက်အအုံများကို ပိုမိုတိုးချဲ့ရန် အစီအစဉ်များ ပါဝင်သည်ဟု အိန္ဒိယဝန်ကြီးချုပ်က ပြောသည်။
မိုဒီကို တွေ့ရစဉ်
ထို့ပြင် ယခုနှစ် စက်တင်ဘာလက နယူးဒေလီမြို့တော်တွင် ပြုလုပ်ခဲ့သည့် စက်မှုထိပ်သီးနိုင်ငံ-၂၀ (G-20) ခေါင်းဆောင်များ အစည်းအဝေး၌ အိန္ဒိယက အဆိုပြုခဲ့သော အိန္ဒိယ-အရှေ့အလယ်ပိုင်း-ဥရောပ စီးပွားရေးစင်္ကြန့် (India-Middle East-Europe Economic Corridor- IMEC) အစီအစဉ်၏ သဘောထားကိုလည်း မိုဒီက အလေး ထား ပြောခဲ့သည်။
မိုဒီသည် အိန္ဒိယအနောက်ပိုင်း ဂူဂျာရတ်(Gujarat) ပြည်နယ်ရှိ ဒင်းဒါယဲလ် ဆိပ်ကမ်းအာဏာပိုင်အဖွဲ့ (Deendayal Port Authority) ၏ Tuna Tekra ရေနက်ဆိပ်ကမ်းတွင် ပြုလုပ်သည့် အုတ်မြစ်ချ အခမ်းအနားကို ဦးဆောင် ပြုလုပ်ခဲ့ခြင်း ဖြစ်သည်။
အိန္ဒိယ၏ ဒေါ်လာဘီလျံချီ တန်ကြေးရှိသည့်် ပင်လယ်ရေကြောင်းဆိုင်ရာ စီမံကိန်းများအနက် ဂူဂျာရတ်ပြည်နယ် တွင် ရူပီး ၄၅ ဘီလျံ (ဒေါ်လာ သန်း ၅၄၀) တန်ကြေးရှိသော ဆိပ်ကမ်းတစ်ခုကို တည်ဆောက်မည် ဖြစ်သည်။
Source: အာတီ
- By CNI
- Category: စီးပွားရေး
- Hits: 346
CNI International News
ဆိုးလ်၊ အောက်တိုဘာ ၁၇
တောင်ကိုရီးယား၏ SI Innotec ရေကြောင်း နည်းပညာကုမ္ပဏီကို ကုန်သွယ်ရေး ဥပဒေများ ချိုးဖောက်မှုဖြင့် တရားစွဲ ဆိုခဲ့ပြီးနောက် တောင်ကိုရီးယားအာဏာပိုင်များသည် တရုတ်၏ စီးပွားရေး လက်တုန့်ပြန်မည့် အန္တရာယ် ကို စိုးရိမ်နေကြောင်း ရိုက်တာမှ ဖော်ပြခဲ့သည်။
အဆိုပါ ကုမ္ပဏီသည် တရုတ်က အာရုံစိုက်နေသော ထိုင်ဝမ်နှင့် ပြီးခဲ့သည့်နှစ်က ထိုင်ဝမ်၏ ရေငုပ်သင်္ဘော စီမံကိန်းနှင့်် ပူးပေါင်းဆောင်ရွက်နေခြင်းကြောင့် ဖြစ်သည်။
၂၀၂၂ ခုနှစ်၊ ဖေဖော်ဝါရီ ၁၇ ရက်က တရားသူကြီး တစ်ဦးထံတွင် ကျိန်ဆိုခဲ့သည့် တောင်ကိုရီးယား၏ ကျမ်းကျိန် လွှာ တစ်စောင်ထဲတွင် SI Innotec ကုမ္ပဏီ၏ အမှုဆောင်ညွှန်ကြားရေးမှူး ပါ့ခ် မယ်လ်ဆစ် (Park Mal-sik) ကို ဖမ်းဆီးရန် ကြိုးပမ်းခဲ့သည်။
ထို့ပြင် ၂၀၁၆ ခုနှစ်က အမေရိကန်၏ THAAD ဒုံးခွင်းဒုံးစနစ်ကို တပ်ဆင်ရန် ဆုံးဖြတ်ခဲ့သည့် တောင်ကိုရီးယား အပေါ် တရုတ်က စီးပွားရေး ပိတ်ဆို့မှုများ ပြုလုပ်ခဲ့သည့် အခြေအနေမျိုး နောက်ထပ်တစ်ကြိမ် ဖြစ်လာမည့် အန္တရာယ်အား တောင်ကိုရီးယားအစိုးရက စိုးရိမ်နေကြောင်း တောင်ကိုရီးယားရဲတပ်ဖွဲ့က ပြောကြားခဲ့သည်။
တရုတ်ကိုတွေ့ရစဉ်
ထို့နောက် တရုတ်သည် တောင်ကိုရီးယားအပေါ် ပိတ်ဆို့မှုများကို ၂၀၁၇ ခုနှစ်တွင် ပြန်လည်ရုပ်သိမ်းရန် သဘော တူညီခဲ့သည်။
ထိုကျမ်းကျိန်လွှာထဲတွင် ထိုင်ဝမ်အတွက် ရေငုပ်သင်္ဘော ထုတ်လုပ်ရေး ကုန်ပစ္စည်းများကို ထောက်ပံ့ပေးမည့် SI Innotec ကုမ္ပဏီ၏ သဘောတူညီချက်ကို ဝေဖန်ခဲ့ပြီး ထိုလုပ်ဆောင်မှုသည် တောင်ကိုရီးယား၏ လုံခြုံရေးအပေါ် တိုက်ရိုက် သက်ရောက်မှုရှိကြောင်း ဖော်ပြထားသည်။
ထို့ပြင် THAAD ဒုံးကျည်စနစ် ဖြန့်ကြက်ချထားခဲ့သည့် အချိန်က တရုတ်၏ စီးပွားရေး ပိတ်ဆို့မှုမျိုး နောက် တစ်ကြိမ် ဖြစ်ပွားမည့် အရေးကို စိုးရိမ်ကြောင်း တောင်ကိုရီးယား၏ လက်နက် ရောင်းဝယ်ရေး စည်းကမ်း ထိန်းသိမ်းရေးအဖွဲ့နှင့် ညှိနှိုင်းတိုင်ပင်ခဲ့သည့် တောင်ကိုရီးယားရဲတပ်ဖွဲ့က ပြောကြားခဲ့သည်။
SI Innotec ရေကြောင်း နည်းပညာကုမ္ပဏီကို တွေ့ရစဉ်
တောင်ကိုရီးယား တရားသူကြီး တစ်ဦးသည် ဖေဖော်ဝါရီ ၂၈ ရက်တွင် ပါ့ခ်ကို သက်သေ အထောက်အထားများ ဖျက်ဆီးမှု၊ နိုင်ငံအတွက် အန္တရာယ်ဖြစ်စေမှု အကြောင်းပြချက်များဖြင့် ဖမ်းဆီးရန် အမိန့်ချမှတ်ခဲ့သည်။
တောင်ကိုရီးယားနှင့် အခြားနိုင်ငံ ခြောက်နိုင်ငံမှ ကာကွယ်ရေး ကန်ထရိုက်တာများနှင့် ကျွမ်းကျင်သူများသည် ထိုင်ဝမ်၏ ရေငုပ်သင်္ဘော စီမံကိန်းအတွက် ပူးပေါင်းဆောင်ရွက်နေကြောင်း ၂၀၂၁ ခုနှစ်တွင် ရိုက်တာ သတင်း ဌာနက ဖော်ပြခဲ့ပြီးနောက် တရုတ်က တောင်ကိုရီးယားကို ဒေါသတကြီး တုန့်ပြန်ခဲ့သည်။
ထို့နောက် SI Innotec ကုမ္ပဏီသည် ၂၀၂၂ ခုနှစ်၊ သြဂုတ်လတွင် တောင်ကိုရီးယားတွင် ဒဏ်ငွေချမှတ်ခံခဲ့ရပြီး ပါ့ခ်သည် ဆိုင်းငံ့ထောင်ဒဏ် ချမှတ်ခံခဲ့ရသည်။
ပါ့ခ်ကမူ သူသည် အမှားအယွင်း လုပ်ခဲ့ခြင်း မရှိကြောင်းနှင့် ပြစ်ဒဏ်အတွက် အယူခံဝင်ခဲ့ကာ ထိုအကြောင်းအရာ နှင့်ပတ်သက်ပြီး မှတ်ချက်ပေးရန် ငြင်းဆိုခဲ့သည်။
Source: ရိုက်တာ
- By CNI
- Category: စီးပွားရေး
- Hits: 378
CNI International News
ဝါရှင်တန်၊ အောက်တိုဘာ ၁၁
အမေရိကန်နိုင်ငံ၊ နယူးယောက်စီးတီးမြို့ရှိ ဘဏ္ဍာရေး အချက်အချာဖြစ်သည့် ဝေါလ် စထရိ (Wall Street) လမ်းပေါ်ရှိ လုပ်ငန်းများသည် ဘဏ်တိုးနှုန်းများ မြင့်မားမှုနှင့်ပတ်သက်ပြီး အားပေးအားမြှောက်ပြုသည့် သတင်းများကြောင့် အောက်တိုဘာ ၁၀ ရက်မတိုင်မီ ကမ္ဘာလုံးဆိုင်ရာ ဈေးကွက် မြင့်တက်မှု အရှိန်အတိုင်း လိုက်ပါဆောင်ရွက်နေသည်ဟု အေပီမှ ဖော်ပြခဲ့သည်။
ကြိုရောင်း၊ ကြိုဝယ် ကုန်စည် အစုရှယ်ယာသည် S&P 500 နှင့် Dow Jones Industrial Average စတော့အိတ် ချိန်း ညွှန်းကိန်းများတွင် ဈေးကွက်တန်ဖိုး အစွန်းထွက် ၀ ဒသမ ၁ ရာခိုင်နှုန်း မြင့်တက်လာကြောင်း ဖော်ပြခဲ့ သည်။
အမေရိကန်နိုင်ငံသားများကိုတွေ့ရစဉ်
အမေရိကန်ဗဟိုဘဏ် (Federal Reserve) အရာရှိများကမူ မကြာမီ ပြုလုပ်မည့် မူဝါဒပိုင်းဆိုင်ရာ အစည်းအဝေး မတိုင်မီအထိ အတိုးနှုန်းများသည် တသမတ်တည်း ဆက်လက် တည်ရှိဖွယ်ရှိသည်ဟု ပြောကြားခဲ့ပြီးနောက် S&P 500 ၏ ညွှန်းကိန်းသည် အရှုံးမှ အနိုင်သို့ ရောက်ရှိစေခဲ့သည်။
အဘယ်ကြောင့်ဆိုသော် ရေရည်အတွက် ရင်းနှီးမြှုပ်နှံသူများကို ပြန်လည်ပေးဆပ်ရမည့် ငွေကြေးပမာဏ မြင့်တက်မှုသည် ငွေကြေးဖောင်းပွမှုကို တည်ငြိမ်စေရန် အထောက်အကူ ဖြစ်စေသောကြောင့် ဖြစ်သည်။
စတော့ဈေးကွက်ကိုတွေ့ရစဉ်
ဘဏ်အတိုးနှုန်းများ မြင့်မားခြင်း၊ ယူကရိန်းစစ်ပွဲနှင့် ပထဝီနိုင်ငံရေးဆိုင်ရာ အကွဲအပြဲများနှင့် ရင်ဆိုင်နေရသဖြင့် ကမ္ဘာ့စီးပွားရေး၏ အရှိန်အဟုန်သည် ယုတ်လျော့လာကြောင်း နိုင်ငံတကာ ငွေကြေးရန်ပုံငွေအဖွဲ့ (International Monetary Fund - IMF) က အောက်တိုဘာ ၁၀ ရက်တွင် သတိပေးခဲ့သည်။
သို့သော် ၂၀၂၄ ခုနှစ်အတွက် ကမ္ဘာလုံးဆိုင်ရာ စီးပွားရေး ဖွံ့ဖြိုးတိုးတက်မှု လျော့ကျမှုနှုန်းသည် ၃ ရာခိုင်နှုန်း ရှိနိုင်သည်ဟု ယခုနှစ် အစောပိုင်းက ခန့်မှန်းခဲ့သော်လည်း လက်ရှိတွင် ၂ ဒသမ ၉ ရာခိုင်နှုန်းသာ ရှိနိုင်သည်ဟု IMF က လျှော့ချခန့်မှန်းခဲ့သည်။
ထို့ပြင် လာမည့်နှစ်အတွက် ကမ္ဘာလုံးဆိုင်ရာ စီးပွားရေး ဖွံ့ဖြိုးတိုးတက်မှု အဆင့်သတ်မှတ်ချက်အရ ဇူလိုင်လက ခန့်မှန်းခဲ့သည့် အဆင့်ထက် ၃ ရာခိုင်နှုန်း လျော့ကျနိုင်ဖွယ်ရှိသည်ဟု IMF က ထုတ်ပြန်ခဲ့သည်။
Source: အေပီ
- By CNI
- Category: စီးပွားရေး
- Hits: 619
CNI International News
ဘန်ကောက်၊ အောက်တိုဘာ ၁၀
ဂါဇာကမ်းမြောင်ဒေသမှ ဟားမာ့စ် (Hamas) လက်နက်ကိုင်အဖွဲ့၏ ပြင်းထန်သည့် တိုက်ခိုက်မှုများကြောင့် အစ္စရေးအစိုးရက စစ်ကြေညာခဲ့ပြီးနောက် အောက်တိုဘာ ၉ ရက်တွင် ရေနံစိမ်းဈေးနှုန်းများ မြင့်တက်ခဲ့ပြီး ရှယ်ယာဈေးနှုန်းများ ကျဆင်းသွားခဲ့သည်ဟု အေပီမှ ဖော်ပြခဲ့သည်။
အမေရိကန်၏ ကြိုရောင်း၊ ကြိုဝယ် ကုန်စည်အစုရှယ်ယာ (futures) များ ကျဆင်းခဲ့သည်။
အမေရိကန်၏ ကိုလံဘတ်စ်နေ့ (Columbus Day) အားလပ်ရက်ဖြစ်သည့် အောက်တိုဘာ ၉ ရက်တွင် ငွေတိုက် စာချုပ် ဈေးကွက်ကို ပိတ်ထားသော်လည်း New York စတော့အိတ်ချိန်းနှင့် Nasdaq စတော့အိတ်ချိန်းကို ဆက်ဖွင့်ထားမည် ဖြစ်သည်။
ရေနံဈေးနှုန်းများသည် တစ်စည်ကို ၃ ဒေါ်လာကျော်အထိ မြင့်တက်ခဲ့သည်။
အရှေ့အလယ်ပိုင်းတွင် ပဋိပက္ခများ ဖြစ်ပွားချိန်တွင် ရေနံဈေးနှုန်းများ မြင့်တက်လေ့ရှိပြီး ထောက်ပံ့ရေး ကွင်းဆက် ပြတ်တောက်မည့် အန္တရာယ်နှင့် ရင်ဆိုင်ရလေ့ ရှိသည်။
Nasdaq စတော့အိတ်ချိန်းကို တွေ့ရစဉ်
"ဒေသတွင်း ရေနံထောက်ပံ့မှုတွေ အလျဉ်ပြတ်သွားတာ ဒါမှမဟုတ် ရေနံဈေးတွေ မြင့်တက်တာဟာ စွမ်းအင် ဈေးကွက်တွေ၊ ကမ္ဘာလုံးဆိုင်ရာ ထောက်ပံ့ရေး ကွင်းဆက်တွေနဲ့ ပထဝီနိုင်ငံရေး အခြေအနေတွေကို ပိုမို ရှုပ်ထွေး စေနိုင်ပါတယ်" ဟု ရင်းနှီးမြှုပ်နှံမှုနှင့် ဈေးကွက်အကြံပေးကုမ္ပဏီ SPI Asset Management မှ ကျွမ်းကျင်သူ စတီဖင် အင်းနက်စ် (Stephen Innes) က ပြောကြားခဲ့သည်။
လက်ရှိ ဖြစ်ပွားနေသည့် အစ္စရေး-ဟားမာ့စ် ပဋိပက္ခသည် ရေနံထုတ်လုပ်မှု ပမာဏကို သိသာထင်ရှားစွာ သက်ရောက်မှု မရှိသေးသော်လည်း အရှေ့အလယ်ပိုင်းဒေသတွင် ပထဝီနိုင်ငံရေး တင်းမာမှုအား ပိုမို မြင့်တက် စေခဲ့သည်ဟု အင်းနက်စ်က ပြောသည်။
ရေနံဈေးများသည် ပြီးခဲ့သည့်လက တစ်စည်လျင် ဒေါ်လာ ၉၀ ခန့်မှ အနည်းငယ် ကျဆင်းခဲ့ကာ ပြီးခဲ့သည့် သီတင်းပတ်က သိသာစွာ ကျဆင်းခဲ့သည်။
အောက်တိုဘာ ၈ ရက်က ရေနံစိမ်း ဈေးနှုန်း စံသတ်မှတ်ချက်အရ New York Mercantile Exchange တွင် အီလက်ထရောနစ် ကုန်သွယ်မှုတန်ဖိုးသည် ၃ ဒသမ ၁၂ ဒေါ်လာ မြင့်တက်ခဲ့ပြီး ရေနံတစ်စည်လျှင် ၈၅ ဒသမ ၉၁ ဒေါ်လာ ရှိခဲ့သည်။
အမေရိကန် ပြည်ထောင်စုကိုတွေ့ရစဉ်
နိုင်ငံတကာ ကုန်သွယ်မှု တန်ဖိုးအရ ရေနံတစ်စည်လျှင် ၃ ဒသမ ၁၀ ဒေါ်လာ မြင့်တက်ခဲ့ပြီး ၈၇ ဒသမ ၆၈ ဒေါ်လာ ရှိခဲ့သည်။
ထို့အတူ အောက်တိုဘာ ၈ ရက်တွင် နိုင်ငံတကာ ရွှေဈေးနှုန်းသည်လည်း ၁ ရာခိုင်နှုန်း မြင့်တက်ခဲ့ပြီး ရွှေ တစ်အောင်စလျှင် ၁၈၆၄ ဒသမ ၃၀ ဒေါ်လာ အထိ ရှိခဲ့သည်။
ဟားမာ့စ်အဖွဲ့၏ တိုက်ခိုက်မှုအပြီး အောက်တိုဘာ ၈ ရက်တွင် အစ္စရေး၏ အဓိက စတော့ရှယ်ယာ ဈေးကွက် သည် ၆ ဒသမ ၇ ရာခိုင်နှုန်း ကျဆင်းခဲ့သည်။
အာရှတွင် ရှန်ဟိုင်းစတော့ ဈေးကွက်သည် ၀ ဒသမ ၄ ရာခိုင်နှုန်း၊ ဟောင်ကောင်ရှိ Hang Seng Index တွင် ၀ ဒသမ ၂ ရာခိုင်နှုန်း ကျဆင်းခဲ့သည်။
Source: အေပီ
- By CNI
- Category: စီးပွားရေး
- Hits: 502
CNI International News
ဘန်ကောက်၊ စက်တင်ဘာ ၂၃
ထိုင်းနှင့် အမေရိကန်အကြား သံတမန်ဆက်ဆံရေး ထူထောင်သည့် နှစ်ပေါင်း ၁၉၀ ပြည့် နှစ်ပတ်လည်တွင် ထိုင်းသည် အမေရိကန်နှင့် ကုန်သွယ်မှုဆက်ဆံရေးများကို ထပ်မံတိုးမြှင့််သွားမည်ဟု ထိုင်းဝန်ကြီးချုပ် ဆရီသာ သာဗီဆင် (Srettha Thavisin) က ပြောကြာခဲ့ကြောင်း ဘန်ကောက်ပို့စ်မှ ဖော်ပြခဲ့သည်။
စက်တင်ဘာ ၂၀ ရက်က အမေရိကန် ကုန်သည်ကြီးများအသင်း (US Chamber of Commerce - USCC) နှင့် အမေရိကန်-အာဆီယံ စီးပွားရေးကောင်စီ (US-Asean Business Council - USABC) တို့က တည်ခင်းဧည့်ခံသည့် ညစာစားပွဲတွင် ဆရီသာသည် အမေရိကန်သမ္မတ ဂျိုးဘိုင်ဒန် (Joe Biden) နှင့် အစည်းအဝေး ပြုလုပ်ခဲ့ပြီးနောက် အထက်ပါအတိုင်း ပြောကြားခဲ့ခြင်းဖြစ်သည်။
မစ္စတာဆရီသာ ဦးဆောင်သည့် ထိုင်းကိုယ်စားလှယ်အဖွဲ့သည် အမေရိကန်နိုင်ငံ နယူးယောက်မြို့တွင် စက်တင်ဘာ ၂၄ ရက်အထိ ပြလုပ်မည့် ၇၈ ကြိမ်မြောက် ကုလသမဂ္ဂ အထွေထွေညီလာခံကို တက်ရောက် နေသည်။
ထိုင်းဝန်ကြီးချုပ် ဆရီသာ သာဗီဆင်နဲ့ အမေရိကန် ကိုယ်စားလှယ်အဖွဲ့ကိုတွေ့ရစဉ်
ဘဏ္ဍာရေးဝန်ကြီးလည်းဖြစ်သည့် ဆရီသာက ၎င်း၏ ဝန်ကြီးချုပ် တာဝန်ထမ်းဆောင်မှုကို ဘိုင်ဒန်က ဂုဏ်ပြု ခဲ့ကြောင်းနှင့် ထိုင်းသည် အမေရိကန်၏ တည်ငြိမ်သည့် ကုန်သွယ်ဘက် နိုင်ငံအဖြစ် ဆက်ရှိနေမည့် အကြောင်းကို ဘိုင်ဒန်အား စိတ်ချသေချာစေရန် ပြောကြားခဲ့သည်ဟု ဆိုသည်။
အမေရိကန်နှင့် ထိုင်းသည် ယခုနှစ် နိုဝင်ဘာလတွင် ဆန်ဖရန်စစ္စကို (San Francisco) မြို့တွင် ပြုလုပ်မည့် အာရှ-ပစိဖိတ် စီးပွားရေး ပူးပေါင်းဆောင်ရွက်မှု (APEC) ခေါင်းဆောင်များ အစည်းအဝေး (Asia-Pacific Economic Cooperation (Apec) Leaders' Meeting) တွင်လည်း သီးသန့်တွေ့ဆုံပြီး ဆွေးနွေးမှုများ ပြုလုပ်မည်ဟု ဆရီသာ က ပြောသည်။
ထိုင်းစီးပွားရေးလုပ်ငန်းတစ်ခုကိုတွေ့ရစဉ်
မစ္စတာ ဆရီသာသည် အရှေ့ဥရောပမှ ခေတ်မီသော e-government စနစ်ကို ကျင့်သုံးနေသည့် အက်စတိုးနီးယား ဝန်ကြီးချုပ် အပါအဝင် အခြားပြည်ပ ခေါင်းဆောင်များနှင့်လည်း တွေ့ဆုံခဲ့သည်။
အက်စတိုးနီးယား ဝန်ကြီးချုပ်နှင့် တွေ့ဆုံမှုတွင် e-government စနစ်ကို ထိုင်းပြည်သူများအတွက် အကျိုးရှိ စေရန် မည်သို့ ပြောင်းလဲကျင့်သုံး ရမည်ဆိုသည့်အချက်အား မေးမြန်းခဲ့သည်ဟု ဆရီသာက ပြောကြားခဲ့သည်။
အနာဂတ်တွင် ကာဗွန်ထုတ်လွှတ်မှု ကင်းစင်ရေး ရည်မှန်းချက်ကို ပြည့်ဝစေရန်နှင့် ထိုင်းပြည်သူများအတွက် လေကောင်းလေသန့် ရရှိစေရန် စီမံကိန်း အများအပြား လုပ်ဆောင်နေကြောင်း ထိုင်း၏ ဒုတိယနိုင်ငံခြားရေး ဝန်ကြီး ဂျက်ကာပွန် ဆန်မာနီ (Jakkapong Sangmanee) က ပြောကြားခဲ့သည်။
လက်ရှိတွင် အမေရိကန်သည် ထိုင်းတွင် ရင်းနှီးမြှုပ်နှံမှု အများဆုံး နိုင်ငံစာရင်း၌ နံပါတ် ၃ နေရာမှာရှိနေသည်။ အမေရိကန်တွင် ထိုင်း၏ ရင်းနှီးမြှုပ်နှံမှုများသည်လည်း မြင့်တက်ခဲ့ကာ ၁၃ ဘီလျံအထိ ရှိခဲ့သည်။
Source: ဘန်ကောက်ပို့စ်
- By CNI
- Category: စီးပွားရေး
- Hits: 353
CNI International News
တိုကျို၊ စက်တင်ဘာ ၁၉
ဂျပန်နိုင်ငံတွင် လူ ၁၀ ဦးတွင် ၁ ဦးသည် အသက် ၈၀ နှင့်အထက် အဘိုးအဘွား အရွယ်များဖြစ်ပြီး နိုင်ငံအတွင်း လူဦးရေ အချိုးအရ သက်ကြီးပိုင်းလူဦးရေ စုစုပေါင်း ရာခိုင်နှုန်း အရေအတွက်သည် စံချိန်တင် မြင့်တက်လာခဲ့ သည်ဟု ဘန်ကောက်ပို့စ်မှ ဖော်ပြခဲ့သည်။
ဂျပန် ပြည်တွင်းရေးနှင့် ဆက်သွယ်ရေးဝန်ကြီးဌာန (Ministry of Internal Affairs and Communications)၏ စက်တင်ဘာ ၁၇ ရက်တွင် ထုတ်ပြန်သည့် မှတ်တမ်းများအရ သက်ကြီးပိုင်း လူဦးရေအဖြစ် သတ်မှတ်ခံထားရ သော အသက် ၆၅ နှစ်နှင့် အထက်အရွယ်များသည် လူဦးရေ စုစုပေါင်း၏ ၂၉ ဒသမ ၁ ရာခိုင်နှုန်းအထိ ရှိခဲ့သည်။
ထိုနှုန်းထားသည် စံချိန်တင် ဖြစ်သည်ဟု သိရသည်။
ထို့ကြောင့် ဂျပန်သည် ကမ္ဘာတစ်ဝန်းရှိ နိုင်ငံများနှင့် ဒေသပေါင်း ၂၀၀ အနက် သက်ကြီးပိုင်း လူဦးရေ အရေအတွက်သည် ရာခိုင်နှုန်းအရ အများဆုံးနိုင်ငံ ဖြစ်လာခဲ့သည်။
မည်သို့ပင်ဆိုစေ ၁၉၅၀ ပြည့်နှစ်နှင့် နှိုင်းယှဉ်ပါက သက်ကြီးပိုင်း အရေအတွက်ကို လူဦးရေ စုစုပေါင်း၏ ရာခိုင်နှုန်းဖြင့် မတွက်ဘဲ အရေအတွက်ဖြင့် တွက်ကြည့်မည်ဆိုပါက ပထမဆုံးအကြိမ် လျော့ကျခဲ့ခြင်းလည်း ဖြစ်သည်။
ဂျပန်သက်ကြီးရွယ်အိုများကို တွေ့ရစဉ်
ရာခိုင်နှုန်းအရ မဟုတ်ဘဲ အရေအတွက်အားဖြင့် တွက်ကြည့်မည်ဆိုပါက ပြီးခဲ့သည့်နှစ်က သက်ကြီးပိုင်း လူဦးရေ ၃၆ ဒသမ ၂ သန်းထက် ၁၀၀၀၀ ခန့် လျော့ကျခဲ့ခြင်း ဖြစ်သည်ဟု အချက်အလက်များတွင် ဖော်ပြခဲ့သည်။
ဂျပန်တွင် အသက် ၇၅ နှစ်နှင့် အထက် လူဦးရေ အရေအတွက်သည် ပထမဆုံးအကြိမ်အဖြစ် သန်း ၂၀ ကျော်ခဲ့ သည်။
အသက် ၈၀ နှင့်အထက် လူဦးရေ အရေအတွက်သည်လည်း ပြီးခဲ့သည့်နှစ်ကထက် ၂၇၀,၀၀၀ ဦး မြင့်တက်ခဲ့ပြီး စုစုပေါင်း ၁၂ ဒသမ ၅ သန်းရှိခဲ့ကာ ထိုပမာဏသည် ဂျပန်လူဦးရေ၏ ၁၀ ရာခိုင်နှုန်းကျော် ရှိခဲ့သည်။
သို့သော် ဂျပန်၏ သက်ကြီးပိုင်း လူဦးရေများအကြား အလုပ်အကိုင်ရှိသူ အရေအတွက်သည် ဆက်လက် မြင့်တက် နေသည်။ ၂၀၂၂ ခုနှစ်က အလုပ်အကိုင်ရှိသည့် သက်ကြီးပိုင်း လူဦးရေ စုစုပေါင်းသည် ၉ ဒသမ ၁၂ သန်းရှိခဲ့ပြီး ၁၉ နှစ်ဆက်တိုက် မြင့်တက်ခဲ့သည်။
ဂျပန်သက်ကြီးရွယ်အိုများ လေ့ကျင့်ခန်းလုပ်နေကြစဉ်
ထို့ပြင် အရေအတွက် သာမကဘဲ ရာခိုင်နှုန်းအရ တွက်ရမည်ဆိုလျင်လည်း ဂျပန်တွင် အလုပ်အကိုင်ရှိသည့် သက်ကြီးပိုင် လူဦးရေသည် ၂၅ ဒသမ ၂ ရာခိုင်နှုန်းအထိ မြင့်တက်ခဲ့သည်။
ဂျပန်တွင် အလုပ်အကိုင်ရှိသူ ၇ ဦးတွင် ၁ ဦးသည် သက်ကြီးပိုင်း လူဦးရေအုပ်စုတွင် ပါဝင်သူများဖြစ်သဖြင့် စီးပွားရေးအင်အားကြီး နိုင်ငံများထဲတွင် ဂျပန်၏ သက်ကြီးပိုင်း အလုပ်အကိုင်ရှိသူ နှုန်းထားသည် အမြင့်ဆုံး ဖြစ်သည်ဟုလည်း ယူဆနိုင်သည်။
Source: ဘန်ကောက်ပို့စ်
- By CNI
- Category: စီးပွားရေး
- Hits: 426
CNI International News
ကရာချီ၊ စက်တင်ဘာ ၁၈
အာဖဂန် တာလီဘန်များသည် တရုတ်နှင့် သတ္တုတွင်း တူးဖော်သည့် သဘောတူညီချက် အသစ်များမှတဆင့် နိုင်ငံ့စီးပွားရေးကို တည်ငြိမ်စေရန်နှင့် ၎င်းတို့အဖွဲ့၏ ရပ်တည်ချက်အား တိုးမြှင့်နေသည်ဟု Nikkei Asia မှ ဖော်ပြခဲ့သည်။
နိုင်ငံတကာ၏ ပိတ်ဆို့မှုများ၊ စီးပွားရေးမျှော်လင့်ချက်များ ယိမ်းယိုင်နေသည့် အခြေအနေနှင့် ရင်ဆိုင်နေရသော တာလီဘန် အစိုးရအဖွဲ့သည် နိုင်ငံအတွင်းရှိ ပြည်နယ်အချို့တွင် ရွှေ၊ သံ၊ ခဲနှင့် ဇင့်များ တူးဖော်ရေးအတွက် ဒေါ်လာ ၆ ဒသမ ၅ ဘီလျံတန်ဖိုးရှိ သဘောတူညီချက် ၇ ခုကို ပြီးခဲ့သည့်လကုန်က ကြေညာခဲ့သည်။
ထိုကန်ထရိုက်များကို အာဖဂန်ကုမ္ပဏီများနှင့် ပြည်ပ မိတ်ဖက်များအား ပေးအပ်ခဲ့ခြင်း ဖြစ်သည်ဟု တာလီဘန် အဖွဲ့၏ သတ္တုတွင်းနှင့် ရေနံဝန်ကြီး ရှာဟာဘူဒင် ဒီလာဝါ(Shahabuddin Delawar) က ပြောကြားခဲ့သည်။
ကန်ထရိုက်ပေးခဲ့သည့် အာဖဂန်ကုမ္ပဏီများ၏ အမည်နှင့် မိတ်ဖက်လုပ်ဆောင်မှု သို့မဟုတ် အချိန်ကာလ သတ်မှတ်ချက်များနှင့် ပတ်သက်ပြီး ဒီလာဝါက အသေးစိတ် ထုတ်ပြန်ခဲ့ခြင်း မရှိပေ။
သတ္တုတွင်းနှင့် ရေနံဝန်ကြီး ရှာဟာဘူဒင် ဒီလာဝါကို တွေ့ရစဉ်
တရုတ်နှင့် အခြားနိုင်ငံများသည် ကြီးမားသည့် လုံခြုံရေးအန္တရာယ်များ ရှိနေသည့်တိုင် အာဖဂန်နစ္စတန်၏ သယံဇာတများအပေါ် စိတ်ဝင်စားမှုများ မြင့်တက်နေသော အခြေအနေကို ထိုကန်ထရိုက်များက ဖော်ပြရာ ရောက်နေသည်။
စက်တင်ဘာ ၁၃ ရက်က တရုတ်သည် အာဖဂန်နစ္စတန်ဆိုင်ရာ တရုတ်သံအမတ်သစ် ကျိုးရှင်း (Zhao Sheng) ကို ကဘူး (Kabul) မြို့တော်သို့ စေလွှတ်ခဲ့သည်။
ထို့နောက် ကျိုးရှင်းသည် အာဖဂန်တွင် တာလီဘန်တို့ အာဏာကို ထိန်းချုပ်ခဲ့ပြီးနောက် အာဖဂန်သို့ လာရောက် သည့် ပထမဆုံး သံအမတ် ဖြစ်ခဲ့သည်။
တာလီဘန်အဖွဲ့သည် အာဖဂန်၏ စီးပွားရေးကို မြှင့်တင်ရန်နှင့် ၎င်းတို့၏ အာဏာအား တည်မြဲစေရန်အတွက် မဟာဗျူဟာများကို အလေးထား ဖော်ပြခဲ့သည်။
အာဖဂန်နစ္စတန်ဆိုင်ရာ တရုတ်သံအမတ်သစ် ကျိုးရှင်းကို တွေ့ရစဉ်
ထို့နောက် တရုတ်နှင့် သယံဇာတတူးဖော်ရေး သဘောတူညီချက်များကို ကြေညာခဲ့ပြီးနောက် ယခုကဲ့သို့ သတ္တုတွင်း တူးဖော်ရေး ကန်ထရိုက်များအား ကြေညာခဲ့ခြင်း ဖြစ်သည်။
အာဖဂန်တွင် ၂၀၂၁ ခုနှစ်၊ သြဂုတ်လက အမေရိကန် ဦးဆောင်သည့် နိုင်ငံတကာတပ်ဖွဲ့များ ဆုတ်ခွာသွားခဲ့ပြီး နောက် အနောက်နိုင်ငံများသည် အာဖဂန်ကို ကူညီထောက်ပံ့မှုများ ရပ်နားခဲ့သဖြင့် တာလီဘန်အဖွဲ့သည် စီးပွားရေး အကျပ်အတည်းနှင့် ရင်ဆိုင်ခဲ့ရသည်။
နောက်ဆုံး ကြေညာခဲ့သည့် ဒေါ်လာ ၆ ဒသမ ၅ ဘီလျံ တန်ကြေးရှိ သတ္တုတွင်း တူးဖော်ရေး သဘောတူညီချက် များသည် အာဖဂန်၏ ဂျီဒီပီ စုစုပေါင်း၏ ထက်ဝက်ခန့်ရှိသော ငွေကြေးပမာဏ ဖြစ်သည်။
Source: Nikkei Asia
- By CNI
- Category: စီးပွားရေး
- Hits: 397
CNI International News
ကွာလာလမ်ပူ၊ စက်တင်ဘာ ၁၆
ဒေသတွင်း ကုန်ထုတ်လုပ်မှု ဗဟိုချက်နှင့် ကုန်စည်တင်ပို့သည့် နိုင်ငံဖြစ်သော မလေးရှားတွင် ပြည်ပဝယ်လိုအား များ နှေးကွေးနေသဖြင့် စီးပွားရေးလှိုင်းလေထန်သည့် အခြေအနေကို မလေးရှားဝန်ကြီးချုပ် အန်ဝါ အီဘရာဟင်မ် (Anwar Ibrahim) ရင်ဆိုင်နေရသည်ဟု Asia Nikkei မှ ဖော်ပြခဲ့သည်။
အီဘရာဟင်မ်သည် ၂၀၂၅ ခုနှစ်အထိ ရေးဆွဲထားသည့် ၅ နှစ်ကြာ စီးပွားရေး ဖွံ့ဖြိုးတိုးတက်ရေး အစီအစဉ်၏ သက်တမ်းဝက်ကာလ စိစစ်သုံးသပ်မှုကို ယခုသီတင်းပတ် အစောပိုင်းက လွှတ်တော်သို့ တင်သွင်းခဲ့သည်။
ထို့ပြင် အီဘရာဟင်မ်က ၎င်း၏ အစိုးရသည် စီးပွားရေးဖွံ့ဖြိုးတိုးတက်မှုကို တိုးတက်စေရန် တန်ဖိုးကြီးမားသည့် ဒစ်ဂျစ်တယ် နည်းပညာ၊ မြေရှားသတ္တုနှင့် အခြားကဏ္ဍများကို အရှိန်မြှင့် လုပ်ဆောင်သွားမည်ဟု အလေးထား ပြောဆိုခဲ့သည်။
"မလေးရှားနိုင်ငံမှာ ဈေးကွက်ယှဉ်ပြိုင်မှုကို တိုးမြှင့်ခြင်းအားဖြင့် ရင်းနှီးမြှုပ်နှံသူတွေကို ဆွဲဆောင်ဖို့ အစိုးရအဖွဲ့က ရည်ရွယ်ထားပါတယ်။ ပြည်ပက တိုက်ရိုက်ရင်းနှီးမြှုပ်နှံမှုတွေကို ပိုမိုဆွဲဆောင်ဖို့အတွက် ပြည်တွင်းက တိုက်ရိုက် ရင်းနှီးမြှုပ်နှံမှုတွေရဲ့ ပူးပေါင်းဆောင်ရွက်မှုတွေကို အရှိန်မြှင့်တင်ပြီး စီးပွားရေးလုပ်ငန်းတွေကို အဆင်ပြေ ချော မွေ့စွာ တိုးမြှင့်လုပ်ဆောင်နိုင်ဖို့က အဓိကကျပါတယ်"ဟု ၎င်းက ပြောသည်။
မလေးရှားမြို့အတွင်း တစ်နေရာကိုတွေ့ရစဉ်
စီးပွားရေးအစီအစဉ်ကို သုံးသပ်ထားသည့် အချက်အလက်များတွင် မလေးရှား၏ နှစ်စဉ် ဂျီဒီပီ ဖွံ့ဖြိုးတိုးတက်မှု အား ၂၀၂၅ ခုနှစ်မတိုင်မီ ၅ ရာခိုင်နှုန်းမှ ၅ ဒသမ ၅ ရာခိုင်နှုန်းအထိ ရောက်ရှိစေရန် မျှော်မှန်းထားသည်။
ထိုမျှော်မှန်းချက် ရာခိုင်နှုန်းသည် ကပ်ရောဂါ မတိုင်မီက ရာခိုင်နှုန်းနှင့် ပျမ်းမျှ တူညီမှုရှိနေသည်။
စီးပွားရေး ဖွံ့ဖြိုးတိုးတက်မှုကို မြှင့်တင်ရာတွင် အထောက်အကူ ဖြစ်စေရန်အတွက် ငါးနှစ်ကြာ စီးပွားရေး ဖွံ့ဖြိုးတိုးတက်ရေး အစီအစဉ်အောက်တွင် အစိုးရအဖွဲ့၏ အသုံးစရိတ်ကို နောက်ထပ် ရင်းဂစ် ၁၅ ဘီလျံအထိ တိုးမြှင့်ခဲ့သဖြင့် ငါးနှစ်သက်တမ်း၌ အသုံးစရိတ်စုစုပေါင်း ရင်းဂစ် ၄၁၅ ဘီလျံ (ဒေါ်လာ ၈၈ ဘီလျံ) အထိရှိခဲ့သည်။
မလေးရှားရှိ လက်အိတ်စက်ရုံကိုတွေ့ရစဉ်
အရှေ့တောင်အာရှနိုင်ငံဖြစ်သည့် မလေးရှားတွင် စီးပွားရေး နှေးကွေးနေချိန်၌ သက်တမ်းဝက် စိစစ်သုံးသပ်မှု ထွက်ပေါ်လာခြင်း ဖြစ်သည်။
ယခုနှစ် ဒုတိယ သုံးလပတ်ကာလ၏ ဂျီဒီပီသည် ၂ ဒသမ ၉ ရာခိုင်နှုန်းသာ ရှိခဲ့ပြီး ထိုနှုန်းထားသည် နှစ်အလိုက် မျှော်မှန်းထားသည့် ပမာဏထက် နိမ့်ကျခဲ့သည်။
ယခုနှစ် ပထမသုံးလပတ် ကာလ၏ ဂျီဒီပီမှာ ၅ ဒသမ ၆ ရာခိုင်နှုန်း ရှိခဲ့သည်။
ပြီးခဲ့သည့်နှစ်က မလေးရှားနိုင်ငံသည် ကပ်ရောဂါမှ နာလန်ထူနိုင်ခဲ့ပြီး စီးပွားရေး ဖွံ့ဖြိုးတိုးတက်မှုနှုန်း ၈ ဒသမ ၇ ရာခိုင်နှုန်း ရှိခဲ့သည်။
သြဂုတ်လကလည်း မလေးရှားဗဟိုဘဏ်သည် နိုင်ငံ၏ စီးပွားရေးဖွံ့ဖြိုးတိုးတက်မှု မျှော်မှန်းချက်ကို ပြန်လည် သုံးသပ်ခဲ့ပြီး လက်ရှိ အခြေအနေများအရ စီးပွားရေးဖွံ့ဖြိုးတိုးတက်မှု မျှော်မှန်းချက် နှုန်းထားကို ၄ ရာခိုင်နှုန်းမှ ၅ ရာခိုင်နှုန်းအကြား လျှော့ချခဲ့သည်။
Source: Asia Nikkei
- By CNI
- Category: စီးပွားရေး
- Hits: 272
CNI International News
ဘန်ကောက်၊ စက်တင်ဘာ ၁၆
ထိုင်းတွင် ဝန်ကြီးချုပ် ဆရီသာ သာဗီဆင် (Srettha Thavisin) ဦးဆောင်သည့် အစိုးရအဖွဲ့သည် လျာထားသည့် အသုံးစရိတ်ထက် ပိုမိုသုံးစွဲနေသည်ဟု Move Forward(MFP)ပါတီ၏ ဒုတိယခေါင်းဆောင် သီရိကန်ယာ တန်ဆာ ကူလ် (Sirikanya Tansakul) က စွပ်စွဲခဲ့သည်ဟု Thai PBS World မှ ဖော်ပြခဲ့သည်။
ဆရီသာ အစိုးရအဖွဲ့သည် ထိုင်းပြည်သူများကို အွန်လိုင်းမှ ငွေကြေးထောက်ပံ့ပေးမည့် ဘတ် ၅၆၀ ဘီလျံ စီမံကိန်းအတွက် ဘတ် ၁၃၀ ဘီလျံကို ချေးယူနေသည်ဟု သီရိကန်ယာက ပြောသည်။
၂၀၂၄ ခုနှစ် အစိုးရဘတ်ဂျက်ကို မူလက ၃ ဒသမ ၃၅ ထရီလျံသာ သတ်မှတ်ထားခဲ့သော်လည်း အစိုးရအဖွဲ့သစ် သည် ၃ ဒသမ ၄၈ ဘီလျံအထိ တိုးမြှင့်ခဲ့ကြောင်း၊ ထိုသို့ တိုးမြှင့်ခြင်းကြောင့် အစိုးရအဖွဲ့၏ ချေးငွေသည် ဘတ် ၅၉၃ ဘီလျံမှ ဘတ် ၆၉၃ ဘီလျံအထိ မြင့်တက်လာခဲ့သည်ဟု ၎င်းက ဆိုသည်။
အစိုးရအဖွဲ့၏ ချေးငွေတိုးမြှင့်ခြင်းသည် ပြည်သူ့ ကြွေးမြီကို ဘတ် ၁၂ ထရီလျံအထိ မြင့်တက်စေပြီး တစ်နည်းအား ဖြင့် နိုင်ငံ ဂျီဒီပီ၏ ၆၄ ရာခိုင်နှုန်း အထိရှိခဲ့ကာ ယခင်နှစ်က ၆၃ ရာခိုင်နှုန်းသာ ရှိခဲ့သည်။
ထိုင်းဝန်ကြီးချုပ် ဆရီသာ သာဗီဆင်ကို တွေ့ရစဉ်
၂၀၂၄ ခုနှစ် ဘဏ္ဍာနှစ်အတွက် ထိုင်းအစိုးရ၏ အသားတင် ဝင်ငွေသည် ဘတ် ၃၀ သာ မြင့်တက်လိမ့်မည်ဟု ခန့်မှန်းခဲ့သဖြင့် စုစုပေါင်း ဘတ် ၂ ဒသမ ၇၈၇ ဘီလျံသာ ရှိမည်ဖြစ်သည်။
ပြည်သူ့ကဏ္ဍ၏ ချေးငွေပမာဏကို နိုင်ငံ့ ဂျီဒီပီ၏ ၆၄ ရာခိုင်နှုန်းအထိ ရောက်ရှိစေနိုင်သည့် အစိုးရ၏ ချေးငွေတိုးမြှင့်မှုကို ပြည်သူများအား အွန်လိုင်းမှ ငွေကြေး ထောက်ပံ့မည့်် အစီအစဉ်တွင် တစ်စိတ်တစ်ပိုင်း အသုံးပြုမည် ဟုတ်/မဟုတ်ကို သံသယရှိကြောင်း သီရိကန်ယာက ပြောသည်။
ထိုကဲ့သို့ ချေးငွေတိုးမြှင့်ခြင်းသည် လာမည့် ၇ နှစ်အတွင်း ဘတ်ဂျက်သုံးစွဲမှု ဟန်ချက်ညီမှုရှိစေရန် အောင်မြင်စွာ လုပ်ဆောင်မည်ဟု ပြောကြားခဲ့သည့် အစိုးရအဖွဲ့၏ ရည်မှန်းချက်ကို အကောင်အထည် ပေါ်စေမည် မဟုတ် ကြောင်းလည်း သီရိကန်ယာက ပြောကြားခဲ့သည်။
Source: Thai PBS World
- By CNI
- Category: စီးပွားရေး
- Hits: 405
CNI International News
ပေကျင်း၊ စက်တင်ဘာ ၁၅
တရုတ်၏ ယွမ်ငွေကြေးအပေါ် ကျရောက်နေသည့် ဖိအားများကို လျော့ပါးသက်သာစေရန်အတွက် ဈေးကွက် အတွင်း နိုင်ငံခြားငွေလဲလှယ်မှု အခြေအနေကို ချက်ချင်းပိတ်မပစ်ရန်နှင့် ဆက်ဖွင့်ထားရန် တရုတ်ဗဟိုဘဏ်က နိုင်ငံအတွင်း အကြီးဆုံးဘဏ်များကို တိုက်တွန်းခဲ့သည်ဟု ရိုက်တာမှ ဖော်ပြခဲ့သည်။
ဘဏ်များအနေဖြင့် အမေရိကန်ဒေါ်လာများကို ဝယ်သူများထံ ရောင်းချပြီးနောက် နိုင်ငံခြားငွေ လဲလှယ်မှု အခြေအနေမှာ တိကျသည့် သတ်မှတ်ချက်အဆင့် တစ်ခုအထိ မရောက်မီအချိန်အတွင်း ဘဏ်အချင်းချင်း နိုင်ငံခြားငွေလဲလှယ်မှု ဈေးကွက်ကို ပိတ်မပစ်ရန် တောင်းဆိုခံခဲ့ရခြင်း ဖြစ်သည်ဟု သတင်းရင်းမြစ်များက ပြောသည်။
ဘဏ်အများစုသည် အတိအကျ ပြဋ္ဌာန်းထားသည့် ကန့်သတ်ချက်များအတွင်း ဒေါ်လာ-ယွမ် ဈေးကွက်တွင် ရေတိုနှင့် ရေရှည် နိုင်ငံခြားငွေလဲလှယ်မှု အခြေအနေကို ဆက်လက် လည်ပတ်ခွင့် ရရှိထားသည်။
တရုတ်ဗဟိုဘဏ်၏ အစီအစဉ်သည် ထိရောက်မှုရှိမည်ဖြစ်ပြီး ကုမ္ပဏီများ၏ ဒေါ်လာ အများအပြားဝယ်ယူမှု တချို့တစ်ဝက်သည် ဘဏ်များကို အကျိုးရှိစေလိမ့်မည်ဖြစ်ကာ ထိုဒေါ်လာများအား တစ်စိတ်တစ်ပိုင်း အနေဖြင့် ယာယီထိန်းချုပ်ထားနိုင်သည်။
တရုတ် ပြည်သူ့ဘဏ်ကို တွေ့ရစဉ်
ထို့နောက် တန်ဖိုးကျဆင်းနေသည့် ယွမ်ငွေကြေးအပေါ် သက်ရောက်နေသော ဖိအားများကို အနည်းငယ် လျှော့ချနိုင်မည် ဖြစ်သည်။
ယခုသီတင်းပတ် အစောပိုင်းက တရုတ်၏ ဗဟိုဘဏ်ဖြစ်သည့် တရုတ် ပြည်သူ့ဘဏ် (People's Bank of China-PBOC) သည် စီးပွားရေးဘဏ်အချို့နှင့် အစည်းအဝေး ပြုလုပ်ခဲ့ပြီးနောက် အထက်ပါ ညွှန်ကြားချက် ထွက်ပေါ် ခဲ့ခြင်း ဖြစ်သည်။
ထို့ပြင် ဒေါ်လာ သန်း ၅၀ သို့မဟုတ် ထိုပမာဏထက်ပိုသည့် ဒေါ်လာများကို ဝယ်ယူလိုသော ကုမ္ပဏီများအနေဖြင့် ဗဟိုဘဏ်၏ ထောက်ခံချက် ရယူရန် လိုအပ်လိမ့်မည်ဟု ဘဏ်များကို ပြောကြားခဲ့ကြောင်း ရိုက်တာမှ ဖော်ပြခဲ့သည်။
ယခုနှစ်အတွင်း တရုတ်၏ ယွမ်ငွေကြေး တန်ဖိုးသည် ဒေါ်လာနှင့် နှိုင်းယှဉ်ပါက ၅ ရာခိုင်နှုန်းကျော် ကျဆင်းခဲ့ပြီး စက်တင်ဘာ ၁၄ ရက်က တစ်ဒေါ်လာလျှင် ၇ ဒသမ ၂၇၃၅ ယွမ်ရှိခဲ့သဖြင့် ၂၀၂၃ ခုနှစ်အတွင်း အာရှ၏ အဆိုးရွား ဆုံး ငွေကြေးများထဲတွင် တစ်ခု အပါအဝင် ဖြစ်ခဲ့သည်။
ထိုအကြောင်းအရာနှင့် ပတ်သက်ပြီး ရိုက်တာ သတင်းဌာန၏ မှတ်ချက်ပေးရန် တောင်းဆိုမှုကို တရုတ်ဗဟိုဘဏ် က ချက်ချင်းတုံ့ပြန်ခြင်း မရှိခဲ့ပေ။
Source: ရိုက်တာ