- By CNI
- Category: စီးပွားရေး
- Hits: 256
CNI International News
ဆိုးလ်၊ ဇန်နဝါရီ ၁၆
တောင်ကိုရီးယားသမ္မတ ယွန်းဆော့ရွဲ(Yoon Suk Yeol)က အလုပ်အကိုင် အခွင့်အလမ်းများနှင့် အရည်အချင်း ရှိသူများကို ဆွဲဆောင်းနိုင်စေရန် ပြည်တွင်း တစ်ပိုင်းလျှပ်ကူးပစ္စည်း(semiconductor)များ ထုတ်လုပ်သည့် ကဏ္ဍတွင် ရင်းနှီးမြှုပ်နှံမှုများအပေါ် အခွန်ဆိုင်းငံ့ခွင့်ကို သက်တမ်းတိုးသွားမည်ဟု ဇန်နဝါရီ ၁၆ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။
ကမ္ဘာ့ထိပ်သီး မန်မိုရီချစ်ပြားများ ထုတ်လုပ်သည့် Samsung Electronics ကုမ္ပဏီကြီး တည်ရှိသည့် တောင် ကိုရီးယားသည် ချစ်ပြားများ၊ display များနှင့် ဘက္ကထရီများ ထုပ်လုပ်မှု အပါအဝင် အဆင့်မြင့် နည်းပညာကဏ္ဍ တွင် ပြိုင်ဆိုင်မှုများကို မြင့်တက်စေရန် ထောက်ပံ့ပေးပြီး အခွန်းဆိုင်းငံ့ခွင့်ကာလကို ထပ်မံတိုးချဲ့ပေးရန် ရည်ရွယ် ခဲ့ခြင်းဖြစ်သည်။
"နိုင်ငံခေါင်းဆောင် တစ်ယောက်အနေနဲ့ စကားပြောရမယ်ဆိုရင် တောင်ကိုရီးယားနှင့် ပတ်သက်ပြီး ကျနော် အများဆုံး ပြောတာကတော့ BTS ( K-pop အမျိုးသား အဆိုတော်အဖွဲ့)နဲ့ တစ်ပိုင်းလျှပ်ကူးပစ္စည်းတွေ အကြောင်း ပဲ ဖြစ်ပါတယ်" ဟု ယွန်းက ချစ်ပြားထုတ်လုပ်မှုနယ်ပယ်မှ အရာရှိများ၊ ကျောင်းသားများနှင့် အစည်းအဝေး ပြုလုပ်ချိန်တွင် ပြောကြားခဲ့သည်။
ချစ်ပြားထုတ်လုပ်မှုကို တွေ့ရစဉ်
တောင်ကိုရီးယားသည် ဆိုးလ်မြို့တော် တောင်ဘက် ယွန်ဂျင်း (Yongin) မြို့တွင် ချစ်ပြားထုတ်လုပ်သည့် အကြီး စားစက်ရုံ တစ်ရုံကိုလည်း တည်ဆောက်လျက်ရှိသည်။
ထိုစက်ရုံသည် ကမ္ဘာ့အကြီးဆုံး နည်းပညာမြင့် ချစ်ပြားများ ထုတ်လုပ်သည့် စက်ရုံကြီးဖြစ်လာနိုင်ကြောင်း အမွှမ်းတင် ဖော်ပြခဲ့သည်။
အဆိုပါ စက်ရုံ တည်ဆောက်ပြီးစီး သွားပြီဆိုပါက လာမည့် နှစ်ပေါင်း ၂၀ အတွင်း အလုပ်အကိုင်ပေါင်း ၃ သန်းခန့် ဖန်တီးပေးနိုင်မည်ဖြစ်သည်။
ကနဦး ရင်းနှီးမြှုပ်နှံမှုသည် ဝမ် ၆၂၂ ထရီလျံ (ဒေါ်လာ ၄၇၀ ဒသမ ၈၂ ဘီလျံ) ရှိလာလိမ့်မည်ဟု မျှော်မှန်းထား ကြောင်း ယွန်းက ပြောကြားခဲ့သည်။
ဆမ်ဆောင်းရုံးကို တွေ့ရစဉ်
၂၀၂၃ ခုနှစ်၊ ဇန်နဝါရီလက တောင်ကိုရီးယားအစိုးရသည် ပြည်တွင်း ရင်းနှီးမြှုပ်နှံမှုရှိသည့် တစ်ပိုင်းလျှပ်ကူးပစ္စည်း များ ထုတ်လုပ်သည့် ကုမ္ပဏီများအပေါ် အခွန်ဆိုင်းငံ့ခွင့်ပေးသည့် အစီအစဉ်ကို စတင်အကောင်အထည်ဖော်ခဲ့ သည်။
ထိုအစီအစဉ်သည် ယခုနှစ်ကုန်ပိုင်းတွင် သက်တမ်းကုန်ဆုံးမည် ဖြစ်သည်။
"တစ်ပိုင်းလျှပ်ကူးပစ္စည်းနယ်ပယ်မှာ အခွန်ဆိုင်းငံ့ခွင့် ပေးထားတဲ့ အစီအစဉ်ဟာ ဒီနှစ်ကုန်မှာ သက်တမ်းကုန်မှာ ဖြစ်ပေမယ့် အဲဒီအစီအစဉ်ကို သက်တမ်းတိုးသွားမှာ ဖြစ်ပါတယ်" ဟု ယွန်းက ပြောကြားခဲ့သည်။
တောင်ကိုရီးယား၏ ထိပ်သီး နည်းပညာကုမ္ပဏီကြီးဖြစ်သည့် Samsung Electronics ကလည်း တောင်ကိုရီးယား ၏ ချစ်ပြားထုတ်လုပ်မှု ပမာဏကို မြှင့်တင်ရန်အတွက် ၂၀၄၂ ခုနှစ်အထိ ဒေါ်လာ ၂၃၀ ဘီလျံ ရင်းနှီးမြှုပ်နှံရန် စီစဉ် ထားကြောင်း ပြောကြားခဲ့သည်။
Source: ရိုက်တာ
- By CNI
- Category: စီးပွားရေး
- Hits: 182
CNI International News
ဘန်ကောက်၊ ဇန်နဝါရီ ၁၅
ထိုင်းအစိုးရသည် ပါဝါအပျော့ သို့မဟုတ် အာဏာအပျော့ (soft power) ဟု လူသိများသည့် နိုင်ငံရေးမူဝါဒ တစ်ခု ကို ပိုမိုချဲ့ထွင်သည့်အနေဖြင့် ဟန်ဂေရီနိုင်ငံအား ထိုင်းနိုင်ငံအတွင်း ရင်းနှီးမြှုပ်နှံမှုများပြုလုပ်ရန် ဖိတ်ကြားခဲ့သည် ဟု ဘန်ကောက်ပို့စ်မှ ဖော်ပြခဲ့သည်။
ထိုင်းတွင် soft power ကို ချဲ့ထွင်ရန် အခွင့်အလမ်းများနှင့်ပတ်သက်ပြီး မကြာသေးမီက ထိုင်းနိုင်ငံဆိုင်ရာ ဟန်ဂေရီသံအမတ် ဆန်ဒါ ဆစ်ပို့စ် (Sandor Sipos) နှင့် ဆွေးနွေးမှုများ ပြုလုပ်ခဲ့သည်ဟု ထိုင်းဒုတိယဝန်ကြီးချုပ် ဖွမ်သမ် ဝီချာယာချိုင်း (Phumtham Wechayachai) က ဇန်နဝါရီ ၁၅ ရက်တွင် ပြောကြားခဲ့သည်။
၂၀၂၄ ခုနှစ်သည် ထိုင်းနှင့် ဟန်ဂေရီအကြား သံတမန်ဆက်ဆံရေး ထူထောင်သည့်် နှစ်ပေါင်း ၅၀ ပြည့််နှစ်ဖြစ်ပြီး မစ္စတာဆစ်ပို့စ်သည် မစ္စတာဖွမ်သမ်ကို နှစ်ပတ်လည် အထိန်းအမှတ် ဂုဏ်ပြုဆုတံဆိပ် ပေးအပ်ခဲ့သည်။
၎င်းတို့နှစ်ဦး၏ ဆွေးနွေးမှုများအပြီးတွင် မစ္စတာဖွမ်သမ်က နှစ်နိုင်ငံအကြား ဝင်ငွေရရှိနိုင်မည့် အခွင့်အလမ်းများ၊ ပို့ကုန်ကဏ္ဍ မြှင့်တင်ရေး အပါအဝင် စီးပွားရေး ပူးပေါင်းဆောင်ရွက်မှုများကို အဓိကထား လုပ်ဆောင်မည်ဖြစ် ကြောင်း ပြောကြားခဲ့သည်။
ဈေးကွက်တန်ဖိုး ဒေါ်လာ သန်း ၇၉၁ ဒသမ ၂၀ ရှိမှုနှင့်အတူ ဟန်ဂေရီသည် ပြီးခဲ့သည့်နှစ် ဇန်နဝါရီလမှ နိုဝင်ဘာလအထိ ထိုင်း၏ ထိပ်သီးစီးပွားရေး မိတ်ဖက်နိုင်ငံစာရင်းတွင် နံပါတ် ၁၁ နေရာတွင် ရှိခဲ့သည်။
ဟန်ဂေရီသံအမတ် ဆန်ဒါဆစ်ပို့စ်နဲ့ ဖွမ်သမ် ဝီချာယာချိုင်းကို တွေ့ရစဉ်
ထိုင်းနိုင်ငံသည် ဟန်ဂေရီနိုင်ငံသို့ ကားများ၊ ကားနှင့်ဆက်စပ်ပစ္စည်းများ၊ ကွန်ပျူတာများ၊ ရေဒီယိုလှိုင်း လက်ခံပစ္စည်းများ၊ ရုပ်မြင်သံကြားများ၊ ရေပိုက်ခေါင်းများနှင့် ဆားကစ်ပြားများ တင်ပို့ရောင်းချခဲ့ပြီး ဟန်ဂေရီ နိုင်ငံထံမှ အီလက်ထရောနစ် ယန္တရားများ၊ ကားအစိတ်အပိုင်းများ၊ သိပ္ပံပစ္စည်းကိရိယာများနှင့် ဆေးဝါးပစ္စည်း ကိရိယာများကို တင်သွင်းဝယ်ယူခဲ့သည်။
ထို့ပြင် ထိုင်းနှင့် ဟန်ဂေရီ နှစ်နိုင်ငံစလုံးသည် ပါဝါအပျော့မူဝါဒ ဈေးကွက်ချဲ့ထွင်ရေးကို ဆွေးနွေးခဲ့ကြသည်။
ဟန်ဂေရီသည် ထိုင်း၏ စားသောက်ဖွယ်ရာများနှင့် ဝတ်စားဆင်ယင်မှုများကို မြှင့်တင်ရန် စီစဉ်နေသည်ဟုလည်း ဖွမ်သမ်က ပြောကြားခဲ့သည်။
လယ်ယာစိုက်ပျိုးရေး ကုန်ပစ္စည်းများ၊ ရာဘာထွက်ကုန်များ၊ ဆေးဝါးများ၊ ဆောက်လုပ်ရေး လုပ်ငန်းသုံးပစ္စည်း များ အပါအဝင် ထိုင်းနိုင်ငံလုပ် ထုတ်ကုန်များကို ဟန်ဂေရီသို့ တင်ပို့ရောင်းချရန်လည်း အဆိုပြုခဲ့သည်ဟု ဖွမ်သမ် က ပြောသည်။
ထို့ပြင် ထိုင်းနိုင်ငံတွင် ရင်းနှီးမြှုပ်နှံရေး အခွင့်အလမ်းများ၊ အထူးသဖြင့် အရှေ့တိုင်း စီးပွားရေး စင်္ကြံတွင် ဆက်ဆံ ရေးများကို မြှင့်တင်ရန်လည်း ဟန်ဂေရီနိုင်ငံကို ဖိတ်ကြားခဲ့သည်ဟု ထိုင်းဒုတိယဝန်ကြီးချုပ်လည်းဖြစ် ကုန်သွယ် ရေးဝန်ကြီးလည်းဖြစ်သူ ဖွမ်သမ်က ပြောကြားခဲ့သည်။
Source: ဘန်ကောက်ပို့စ်
- By CNI
- Category: စီးပွားရေး
- Hits: 337
CNI International News
တိုင်ပေ၊ ဒီဇင်ဘာ ၂၂
တရုတ်သည် ထိုင်ဝမ်တွင် လာမည့်လ၌ ကျင်းပမည့် ရွေးကောက်ပွဲများမတိုင်မီ မိမိတို့အပေါ် စီးပွားရေးအရ အကျပ်ကိုင်မှုများ ပြုလုပ်နေသည်ဟု ထိုင်ဝမ်က စွပ်စွဲပြောကြားခဲ့သည်ဟု ရိုက်တာမှ ဖော်ပြခဲ့သည်။
ထိုင်ဝမ်သည် ကုန်သွယ်ရေး သဘောတူညီချက်ကို ချိုးဖောက်သည်ဟုဆိုကာ တရုတ်က ထိုင်ဝမ်ထံမှ ဝယ်ယူ တင်သွင်းသည့်် ဓာတုသွင်းကုန်အချို့အပေါ် ကောက်ခံသည့် အခွန်နှုန်းထားများအား လျှော့ချမှုကို အဆုံးသတ် ကြောင်း ကြေညာခဲ့ပြီးနောက် ထိုင်ဝမ်က တရုတ်ကို အထက်ပါအတိုင်း စွပ်စွဲခဲ့ခြင်း ဖြစ်သည်။
တရုတ်က ၎င်း၏ နယ်နိမိတ်တစ်ခုဖြစ်သည်ဟု ကြေညာထားသည့် ထိုင်ဝမ်တွင် ၂၀၂၄ ခုနှစ်၊ ဇန်နဝါရီ ၁၃ ရက်၌ သမ္မတရွေးကောက်ပွဲနှင့် လွှတ်တော်ရွေးကောက်ပွဲများ ကျင်းပရန် စီစဉ်ထားသည်။
တရုတ်သည် ထိုရွေးကောက်ပွဲများကို စစ်ရေးဖြင့်သော်လည်းကောင်း၊ နိုင်ငံရေးဖြင့်သော်လည်းကောင်း ဝင်ရောက် စွက်ဖက်ရန် ကြိုးပမ်းနေသည်ဟု ထိုင်ဝမ်အစိုးရနှင့် ထိုင်ဝမ်အာဏာရပါတီ DPP တို့က ပြောကြားခဲ့သည်။
ထိုင်ဝမ်ကုန်သွယ်ရေးကိုတွေ့ရစဉ်
တရုတ်ဘဏ္ဍာရေးဝန်ကြီးဌာန၏ ထုတ်ပြန်ချက်တွင် ဇန်နဝါရီ ၁ ရက်မှစပြီး ထိုင်ဝမ်မှ တင်သွင်းသည့် ဓာတု ပစ္စည်း သွင်းကုန် ၁၂ မျိုးအပေါ် အခွန်လျှော့ချ ကောက်ခံမှုအား ဆိုင်းငံ့မည်ဟု ဖော်ပြခဲ့သည်။
ထိုသို့ ပြုလုပ်ခြင်းဖြင့် ထိုင်ဝမ်သည် တရုတ်သွင်းကုန်များအပေါ် ချမှတ်ခဲ့သည့် တားမြစ်ကန့်သတ်ချက်များကို ပြန်လည်ရုပ်သိမ်းနိုင်မည်ဟု မျှော်လင့်ကြောင်း တရုတ်ဘဏ္ဍာရေးဝန်ကြီးဌာန၏ ထုတ်ပြန်ချက်တွင် ဖော်ပြခဲ့ သည်။
တရုတ်ကမူ ထိုင်ဝမ်သည် ၂၀၁၀ ပြည့်နှစ် ကုန်သွယ်ရေး သဘောတူစာချုပ်နှင့် ကမ္ဘာ့ကုန်သွယ်ရေးအဖွဲ့ (WTO) ၏ စည်းကမ်းများကို ချိုးဖောက်ပြီး ကုန်သွယ်ရေးဆိုင်ရာ တားမြစ်ကန့်သတ်မှုများ ပြုလုပ်ခဲ့ကြောင်း ပြောကြားခဲ့ သည်။
Source: ရိုက်တာ
- By CNI
- Category: စီးပွားရေး
- Hits: 360
CNI News
၂၀၂၃ ခုနှစ်၊ ဒီဇင်ဘာ ၂၁
ပြည်ပအလုပ်အကိုင်အေဂျင်စီများအနေဖြင့် မြဝတီ-မဲဆောက် လမ်းကြောင်းဖြင့် MOU လုပ်သားများ စေလွှတ်ရန် တင်ပြခြင်းများအား ဒီဇင်ဘာ ၁၉ ရက်နေ့မှစတင်ကာ အလုပ်သမားဝန်ကြီးဌာနမှ ယာယီရပ်ဆိုင်းထားကြောင်း အေဂျင်စီများက CNI သတင်းဌာနသို့ ပြောသည်။
ရန်ကုန်-မြဝတီ-မဲဆောက် လမ်းကြောင်းသည် လမ်းခရီးအခြေအနေအရ လက်ရှိတွင် စေလွှတ်၍ မရသည့်အတွက် ယခုကဲ့သို့ MOU လုပ်သားအသစ်များကို စေလွှတ်ရန် တင်ပြခြင်းကို ယာယီရပ်ဆိုင်းလိုက်ခြင်းဖြစ်ပြီး ရန်ကုန်-ကော့သောင်း-ရနောင်း လမ်းကြောင်းဖြင့် စေလွှတ်ရန်တင်ပြခြင်းအား ပုံမှန်အတိုင်း ဆောင်ရွက်ပေးနေကြောင်း သိရသည်။
ရန်ကုန်-ကော့သောင်း-ရနောင်း လမ်းကြောင်းသည် ယခင်ကတည်းက လေကြောင်းလိုင်းဖြင့်သာ စေလွှတ်ရခြင်း ဖြစ်သည့်အတွက် MOU လုပ်သားတစ်ဦးလျှင် ကုန်ကျစရိတ် ၅ သိန်းဝန်းကျင် ထပ်မံကုန်ကျသွားမည်ဟု ပွင့်ဖူးအောင် ပြည်ပအလုပ်အကိုင်အေဂျင်စီမှ မန်နေးဂျင်းဒါရိုက်တာ ဒေါ်မြတ်ဟေမာန်လင်းက CNI သတင်းဌာန သို့ ပြောသည်။
၎င်းက “ရနောင်းလမ်းကြတော့ လေယာဉ်နဲ့သွားပြီဆိုရင် စာထွက်ထားပြီးသား MOU စပြန်ဖွင့်ကတည်းက။ အဲဒီ ကော့သောင်းလမ်းကနေ သွားပြီ လေယာဉ်နဲ့ စစေလွှတ်ပြီဆိုတာနဲ့ လေယာဉ်စရိတ်က ကလေးတွေ ကျခံရမယ်။ ၅ သိန်းဝန်းကျင်လောက်တော့ ထပ်ပြီးကုန်ကျသွားမယ်ပေါ့။ အစ/အဆုံးတွေ ပြန်ပြီး စီစဉ်ရတာဖြစ်တော့ အစ်မတို့ နောက်ဟာတွေတောင် လေယာဉ်လက်မှတ်ဝယ်ဖို့ အခက်အခဲဖြစ်တယ်။ အခုက တစ်နေ့ကို တစ်စီးတောင် ရှိရဲ့ လား မသိဘူး။ လေယာဉ်က ကိုယ်သွားချင်တယ်ဆိုရင်တောင်မှ လေယာဉ် မလုံလောက်တာ ဖြစ်တဲ့အတွက် ကြောင့် အများကြီး သွားလို့မရဘူး။ သွားလို့ရမယ်ဆိုရင် တစ်နေ့ကို လူ ၇၀ ကျော်ထက် ပိုသွားလို့မရဘူး။ လူ ၁၀၀ အထိတောင်မရဘူး။ ဘာလို့ဆို သူက တစ်နေ့ကို တစ်ကြောင်းပဲ ရှိတယ်ဆိုရင် ကျန်တဲ့ တခြား ခရီးသည်တွေ အတွက်က ပေးရဦးမယ်။ ၁၂၀ ဆန့်တယ်ဆိုရင်တောင်မှ ၅၀ လောက်က ပေးရတာဖြစ်တဲ့အတွက် ကျန်တာကမှ MOU အတွက် group ဘိုကင်ရတယ်” ဟု ပြောသည်။
MOU ရွှေ့ပြောင်းမြန်မာလုပ်သားများကိုတွေ့ရစဉ်
လက်ရှိတွင် အာရှလမ်းသစ် အသုံးပြု၍ မရသေးသဖြင့် ထို့ကော်ကိုး - ကျော်ခို့လမ်းအား ဒီဇင်ဘာ ၁၈ ရက်နေ့ မှ စတင်ကာ အတက်အဆင်း တစ်ရက်စီ သွားခွင့်ပြုထားသည့်အတွက် တချို့အေဂျင်စီများသည် MOU လုပ်သားများ ကို ထိုလမ်းကြောင်းဖြင့် စေလွှတ်နေမှုများရှိကြောင်း သိရသည်။
ထို့ကော်ကိုး - ကျော်ခို့လမ်းမှ စေလွှတ်ရာတွင် မော်တော်ယာဉ် အကြီးများကို သွားလာခွင့် မပြုထားဘဲ အိမ်စီးကား အသေးကိုသာ သွားလာခွင့် ပေးထားသည့်အတွက် အံစာတုံးကားများဖြင့် တစ်စီးလျှင် MOU လုပ်သား ၁၅ ဦးခန့် တင်ဆောင်၍ သွားနေကြကြောင်း မြန်မာပြည်ပအလုပ်အကိုင်ဝန်ဆောင်မှု လုပ်ငန်းရှင်များ အဖွဲ့ချုပ် (MOEAF) မှ သိရသည်။
မြဝတီ-မဲဆောက် လမ်းကြောင်းဖြင့် MOU လုပ်သားများ စေလွှတ်ရန် တင်ပြခြင်းများအား ဒီဇင်ဘာ ၁၉ ရက်နေ့ မှစတင်ကာ ယာယီရပ်ဆိုင်းထားခြင်းဖြစ်သော်လည်း ထို ၁၉ ရက်နေ့ မတိုင်ခင်အထိ စေလွှတ်ရန် ကျထားသည့် ကာလမှာ ဇန်နဝါရီလအထိ ရှိကြောင်း MOEAF မှ အထွေထွေအတွင်းရေးမှူး ဦးမြတ်သူက CNI သတင်းဌာနသို့ ပြောသည်။
၎င်းက “သူက နှစ်ပိုင်းရှိတယ်။ နှစ်သစ်ကူးမတိုင်မီကို ဝင်ရမယ့်သူတွေရှိတယ်။ နှစ်သစ်ကူးပြီးမှ ခေါ်မယ့်သူတွေ ရှိတယ်။ အဲဒီတော့ အဓိကကတော့ ဒီဘက်မှာ နှစ်သစ်ကူး မတိုင်ခင် ခေါ်မယ့်လူတွေ ကုန်သွားဖို့ အရေးကြီးတာ။ နှစ်သစ်ကူးပြီးမှ ခေါ်တဲ့လူတွေက ပြဿနာမရှိဘူးလေ။ မတိုင်ခင် ခေါ်မယ့်လူတွေကို အကယ်၍သာ နှစ်သစ်ကူး ပြီးမှသာ သွားလို့ရမယ်ဆိုရင် ဟိုဘက်မှာ အလုပ်လိုတဲ့ သူဌေးတွေကကြတော့ ဘယ်လိုဖြစ်သွားနိုင်လဲဆိုတော့ သူက အလုပ်လိုတဲ့အချိန်မှာ ဒီဘက်အလုပ်သမားပို့ရမယ့် တာဝန်ရှိတယ်လေ။ တကယ်လို့ အဲဒီလိုမပို့နိုင်ဘူး ဆိုရင်သူက အစားထိုးလိုက်ရင် ဒီဟာတွေက ဒုက္ခရောက်သွားမှာပေါ့။ ဟိုမှာရှိပြီးသား အလုပ်သမားတွေနဲ့ အစား ထိုးတာတို့၊ demand ဖျက်လိုက်တာတို့ ပြဿနာတက်နိုင်တယ်။ အဲဒါလေးကတော့ ဒီဘက်က သတိထားရတာ ပေါ့” ဟု ပြောသည်။
ကော့သောင်း-ရနောင်းလမ်းကနေ ထိုင်းဘက်သွားမည့် MOU လုပ်သားများကိုတွေ့ရစဉ်
ထိုင်း-မြန်မာနယ်စပ် ကုန်စည်စီးဆင်းရာ အဓိကလမ်းကြောင်းဖြစ်သည့် မြဝတီ-ကော့ကရိတ် အာရှလမ်းသစ်တွင် ဒီဇင်ဘာ ၁ ရက် နံနက်ပိုင်းမှ စတင်ကာ KNLA၊ PDF ပူးပေါင်းတပ်ဖွဲ့နှင့် တပ်မတော်တို့ တိုက်ပွဲများဖြစ်ပွားခဲ့သည်။
ထိုလမ်းကြောင်းအား KNLA နှင့် PDF ပူးပေါင်းတပ်ဖွဲ့များက လက်ရှိအချိန်ထိ ထိန်းချုပ်ထားဆဲ ဖြစ်သည်။
ထိုကဲ့သို့ ထိန်းချုပ်ထားဆဲ ဖြစ်သည့်အတွက် မြဝတီ-ကော့ကရိတ် လမ်းသစ်အား လက်ရှိအချိန်ထိ နှစ်ပတ်ကျော် ကြာ အသုံးပြုနိုင်ခြင်း မရှိသဖြင့် ထိုင်း-မြန်မာ ကုန်စည်စီးဆင်းမှု ရပ်တန့်လုနီးပါး ဖြစ်နေရ ကြောင်းလည်း သိရသည်။
- By CNI
- Category: စီးပွားရေး
- Hits: 292
CNI International News
ဘန်ကောက်၊ ဒီဇင်ဘာ ၄
ထိုင်းနိုင်ငံတစ်ဝန်းတွင် အတိုးနှုန်း မတန်တဆများပြားသည့် မြီရှင်များထံမှ ချေးငွေရယူထားသူ ၃၇,၅၇၉ ဦးသည် ၎င်းတို့၏ အကြွေး စုစုပေါင်း ဘတ် ၁ ဒသမ ၅ ဘီလျံကို ပြန်လည် ပေးဆောင်ရန်အတွက် အစိုးရထံမှ အကူအညီ တောင်းခံလျက်ရှိကြောင်း ပြည်ထဲရေးဝန်ကြီးဌာန၏ မှတ်တမ်းတွင် တွေ့ရသည်ဟု ဘန်ကောက်ပို့စ်မှ ဖော်ပြခဲ့ သည်။
နိုင်ငံတစ်ဝန်းတွင် ငွေတိုးချေးသူ ၁၉၀၆၁ ဦးကို ပြန်လည်ပေးဆပ်ရမည့် ချေးငွေ ရယူထားသူများ၏ ပြန်လည် ပေးဆပ်ရမည့် အကြွေး စုစုပေါင်း ဘတ် ၁ ဒသမ ၅၃ ဘီလျံရှိကြောင်း ပြည်ထဲရေးဝန်ကြီးဌာန၏ အမြဲတမ်း အတွင်းဝင် ဆုသီပွန် ချူလ်ချာရွန် (Sutthipong Chulcharoen) က ဒီဇင်ဘာ ၃ ရက်တွင် ပြောကြားခဲ့သည်။
ထိုင်းပြည်သူလူထုကို တွေ့ရစဉ်
ဘန်ကောက်မြို့တော်သည် အလွတ်သဘော ချေးငွေရယူသူ အများဆုံးဖြစ်ပြီး စုစုပေါင်း ၂၄၉၆ ဦးရှိကာ ဆွန်ခလာ (Songkhla) မြို့တွင် ချေးငွေရယူသူ ၁၆၁၀ ဦးဖြင့် ဒုတိယအများဆုံးဖြစ်သည်။
ထို့နောက် နာခွန်း စီ သမ္မာရတ် (Nakhon Si Thammarat) တွင် ၁၄၈၉ ဦး၊ နာခွန်း ရတ်ချာစီမာ (Nakhon Ratchasima) တွင် ၁၄၄၁ ဦးနှင့် ဆာမွတ် ပရာကန် (Samut Prakan) မြို့တွင် ၁၆၅ ဦး ရှိသည်။
ထိုင်းဝန်ကြီးချုပ် ဆရီသာ သာဗီဆင်ကို တွေ့ရစဉ်
ငွေတိုးချေးသူများကို အကြွေး ပြန်မဆပ်နိုင်သည့် လူများသည် အစိုးရ၏ ချေးငွေဆိုင်ရာ ဝက်ဘ်ဆိုက်၊ ပြည်နယ် များ၏ မြို့တော်ခန်းမများ၊ ခရိုင်ရုံးများ သို့မဟုတ် အရေးပေါ် ဆက်သွယ်ရေး ဖုန်းလိုင်း ၁၅၆၇ ကို ဆက်သွယ်ပြီး အကူအညီများ တောင်းခံခဲ့သည်ဟု ဆိုသည်။
ထိုင်းဝန်ကြီးချုပ် ဆရီသာ သာဗီဆင် (Srettha Thavisin) သည် ပြည်သူများ၏ ချေးငွေပြဿနာကို ကူညီဖြေရှင်း ပေးမည်ဟု မကြာသေးမီက ကတိပြုခဲ့ပြီး ပြည်ထဲရေးဝန်ကြီးဌာနက အလွတ်သဘော ချေးငွေရယူခဲ့သူများကို ဖိတ်ကြား၍ အကူအညီတောင်းခံမှုအတွက် စာရင်းသွင်းရန် တိုက်တွန်းခဲ့သည်။
Ref: ဘန်ကောက်ပို့စ်
- By CNI
- Category: စီးပွားရေး
- Hits: 247
CNI International News
မော်စကို၊ နိုဝင်ဘာ ၂
ရုရှားအပေါ် ချမှတ်ထားသည့် အမေရိကန်နှင့် ၎င်းမဟာမိတ်များ၏ ပိတ်ဆို့မှုများသည် နှစ်ပေါင်းများစွာ ကြာမြင့် လိမ့်မည်ဟု ရုရှားက ယူဆထားကြောင်း သို့သော် ကမ္ဘာ့စီးပွားရေးတွင် အမေရိကန်၏ လွှမ်းမိုးမှုသည် ယိမ်းယိုင် လာပြီဖြစ်ကြောင်း ကရင်မလင် ပြောရေးဆိုခွင့်ရှိသူ ဒီမီထရီ ပက်စကော့ဗ် (Dmitry Peskov) က ပြောသည်ဟု CNA မှ ဖော်ပြခဲ့သည်။
ယခုဆယ်စုနှစ်ကုန်ချိန်တွင် ရုရှား၏ ရေနံနှင့် ဓာတ်ငွေ့များမှ ရရှိသည့် ဝင်ငွေများကို ထက်ဝက်အထိ လျှော့ချရန် အမေရိကန်က ရည်ရွယ်ထားကြောင်း အမေရိကန်၏ စွမ်းအင် သယံဇာတရေးရာ ဒုတိယနိုင်ငံခြားရေးဝန်ကြီး ဂျီရော့ဖ်ရေး ပိုင်ယက် (Geoffrey Pyatt) က Financial Times သတင်းစာကို ပြောကြားခဲ့သည်။
ပိုင်ယက်၏ ပြောကြားချက်နှင့်ပတ်သက်ပြီး ပက်စကော့ဗ်က အင်တာဗျူးတစ်ခု၌ မှတ်ချက်ပေးရာတွင် " အဲဒီ ပိတ်ဆို့မှုတွေက နှစ်တွေအများကြီးအထိ ကြာမြင့်လိမ့်မယ်ဆိုတာ ကျနော်တို့ သံသယမရှိပါဘူး။ အမေရိကန်ရဲ့ ထုတ်ပြန်ချက်တွေ မရှိရင်တောင်မှ ဒါကို ကျနော်တို့ ကြိုသိထားပြီး ဖြစ်ပါတယ်။ ကျနော်တို့ရဲ့ တွက်ချက်မှုတွေ အရ အခုလို ယူဆခဲ့တာ ဖြစ်ပါတယ်" ဟု သတင်းထောက်များကို ပြောကြားခဲ့သည်။
ယူကရိန်းစစ်ပွဲနှင့်ပတ်သက်ပြီး အနောက်နိုင်ငံများ၏ ပိတ်ဆို့မှုများကို ရင်ဆိုင်ရာတွင် ၎င်း၏ စီးပွားရေးသည် မျှော်မှန်းထားသည်ထက် ခံနိုင်ရည်ရှိခဲ့သည်ဟု ရုရှားအစိုးရက မကြာခဏ အမွှမ်းတင် ပြောကြားလေ့ရှိသည်။
သို့သော် ရုရှားသည် ငွေကြေးဖောင်းပွမှုများ၊ လုပ်သားအင်အား ပြတ်လပ်မှုများနှင့် ရင်ဆိုင်နေရပြီး နိုင်ငံ၏ စီးပွားရေး ဖွံ့ဖြိုးတိုးတက်မှုကို စစ်ဘက်ဆိုင်ရာ ပစ္စည်းကိရိယာများ ထုတ်လုပ်မှုအတွက် အများဆုံး အသုံးပြုခဲ့ရသည်။
"အမေရိကန်ဟာ ရုရှားအပေါ် ဖိအားတွေ ဆက်ပေးနေပြီး ကုန်သွယ်ရေး၊ စီးပွားရေး ဆက်ဆံရေးစနစ်တစ်ခုလုံးကို ဖျက်ဆီးနေမယ်ဆိုတာ သံသယဖြစ်စရာ မလိုပါဘူး"ဟု ပက်စကော့ဗ်က ပြောသည်။
အနောက်နိုင်ငံများနှင့် ကုန်သွယ်ရေးကျဆင်းမှုကို ကာမိစေရန်အတွက် ရုရှားသည် တရုတ်၊ အိန္ဒိယနှင့် အရှေ့အလယ်ပိုင်း၊ အာရှ၊ အာဖရိကနှင့် လက်တင်အမေရိကမှ အခြားဈေးကွက်များနှင့် ပြောင်းလဲ ချိတ်ဆက် လျက်ရှိသည်ဟု ၎င်းက ဆိုသည်။
"ကမ္ဘာ့စီးပွားရေးဟာ အမေရိကန်ရဲ့ စီးပွားရေးအပေါ်မှာပဲ ကန့်သတ်ထားတာမျိုး မဟုတ်တော့ပါဘူး။ တရုတ်ဟာ လည်း အမေရိကန်ကို အမီလိုက်လာခဲ့ပါပြီ" ဟု ပက်စကော့ဗ်က ပြောကြားခဲ့သည်။
Source: CNA
- By CNI
- Category: စီးပွားရေး
- Hits: 294
CNI International News
ဟနွိုင်း၊ နိုဝင်ဘာ ၃၀
ဗီယက်နမ်နိုင်ငံတွင် ၂၀၂၄ ခုနှစ်၊ ဇန်နဝါရီလမှစတင်ပြီး Samsung ကုမ္ပဏီ အပါအဝင် နိုင်ငံပေါင်းစုံတွင် အခြေစိုက် ဖွင့်လှစ်ထားသည့် ကုမ္ပဏီများအား အခွန်နှုန်းထားကို ၁၅ ရာခိုင်နှုန်း တိုးမြှင့်ကောက်ခံရန် ဗီယက်နမ်လွှတ်တော်က နိုဝင်ဘာ ၂၉ ရက်၌ အတည်ပြုခဲ့သည်ဟု CNA မှ ဖော်ပြခဲ့သည်။
ထို့ပြင် ဗီယက်နမ်၏ စီးပွားရေးအတွက် မှီခိုနေရသည့် ပြည်ပရင်းနှီးမြှုပ်နှံမှုများအပေါ် ထိုးနှက်ချက်ဖြစ်စေမည့် စီမံချက်များကို ရွှေ့ဆိုင်းရန် ဗီယက်နမ်လွှတ်တော်က ဆုံးဖြတ်ခဲ့သည်။
ယခုကဲ့သို့ အခွန်နှုန်းထား တိုးမြှင့်မှုသည် ကမ္ဘာလုံးဆိုင်ရာ အခွန်ကောက်ခံမှု ပြုပြင်ပြောင်းလဲရေး၏ တစ်စိတ် တစ်ပိုင်းအဖြစ် ဗီယက်နမ်လွှတ်တော်က အတည်ပြုခဲ့ပြီး အစိုးရအနေနှင့် ၂၀၂၄ ခုနှစ်အတွင်း ပြည်ပရင်းနှီးမြှုပ်နှံ မှုများကို ဆွဲဆောင်သည့် အစီအစဉ်များ လုပ်ဆောင်သွားမည်ဟု ပြောကြားခဲ့သည်။
ဗီယက်နမ်လွှတ်တော်၏ ဘဏ္ဍာရေးကော်မရှင်အကြီးအကဲ လီကွမ်မန်ကို တွေ့ရစဉ်
"အမျိုးသားလွှတ်တော်ဟာ ဒီအချိန်မှာ ရင်းနှီးမြှုပ်နှံမှုတွေကို ဆွဲဆောင်နိုင်မယ့် အစီအစဉ်နဲ့ပတ်သက်ပြီး ကွဲလွဲတဲ့ ဆုံးဖြတ်ချက်တစ်ရပ် ထုတ်ပြန်ခြင်း မရှိပါဘူး" ဟု ဗီယက်နမ်လွှတ်တော်၏ ဘဏ္ဍာရေးကော်မရှင်အကြီးအကဲ လီကွမ်မန် (Le Quang Manh) က ပြောကြားခဲ့သည်။
ဗီယက်နမ်၏ ကော်ပိုရိတ် ဝင်ငွေခွန်သည် ယခင်ကတည်းက ၂၀ ရာခိုင်နှုန်း သတ်မှတ်ထားခဲ့သော်လည်း ပြည်ပ ရင်းနှီးမြှုပ်နှံသူများအတွက် သတ်မှတ်ထားသည့် နှုန်းထားကို နှစ်ကာလများစွာကြာ လျှော့ချပေးခဲ့သည်။
လက်ရှိ ကောက်ခံမည့် အခွန်နှုန်းထား အသစ်အရ ဗီယက်နမ်နိုင်ငံအတွင်းရှိ ပြည်ပကုမ္ပဏီ ၁၂၂ ခုသည် ၎င်းတို့၏ အခွန်ပေးဆောင်မှုများ မြင့်တက်မှုကို ကြုံတွေ့ရမည်ဖြစ်ပြီး ဗီယက်နမ်နိုင်ငံအတွက် တစ်နှစ်လျှင် ဒေါင် ၁၄ ဒသမ ၆ ထရီလျံ (ဒေါ်လာ ၆၀၁ သန်း) ခန့် အခွန်ထပ်မံ ရရှိမည်ဖြစ်သည်။
ထိုအခွန်တိုးမြှင့်မှုကို တောင်ကိုရီးယား၏ Samsung ကုမ္ပဏီက အများဆုံး ပေးဆောင်ရမည် ဖြစ်သည်။
Samsung ကုမ္ပဏီကို တွေ့ရစဉ်
အဘယ်ကြောင့်ဆိုသော် ဗီယက်နမ်နိုင်ငံတွင် Samsung ကုမ္ပဏီ၏ စက်ရုံများသည် ဒေါ်လာ ဘီလျံနှင့်ချီ ရရှိနေသည့် အကြီးမားဆုံး စီးပွားရေးအင်အားစု ဖြစ်သည်။
Samsung ကုမ္ပဏီသည် ၎င်း၏ စမတ်ဖုန်း ထုတ်လုပ်မှု၏ ထက်ဝက်ခန့်ကို ဗီယက်နမ်တွင် ထုတ်လုပ်နေခြင်း ဖြစ်ပြီး ဗီယက်နမ်၏ ပြည်နယ်များတွင် ဖွင့်လှစ်ထားသည့် Samsung ကုမ္ပဏီတစ်ခုသည် ၂၀၁၉ ခုနှစ်တွင် အခွန် ၅ ဒသမ ၁ ရာခိုင်နှုန်းသာ ပေးဆောင်ခဲ့ရသည်။
ယခုတွင် ဗီယက်နမ်၏ အခွန်တိုးမြှင့်မှု အစီအစဉ်နှင့်ပတ်သက်ပြီး မှတ်ချက်ပေးရန် တောင်းဆိုမှုကို Samsung ကုမ္ပဏီက တုန့်ပြန်ခဲ့ခြင်းမရှိပေ။
Source: CAN
- By CNI
- Category: စီးပွားရေး
- Hits: 299
CNI International News
ဘန်ကောက်၊ နိုဝင်ဘာ ၃၀
ထိုင်းနိုင်ငံ၏ စီးပွားရေးသည် ပို့ကုန်ကဏ္ဍပိုင်း အားနည်းနေမှုကြောင့် နှေးကွေးနေချိန်တွင် ဘဏ်အတိုးနှုန်းကို (၈)လဆက်တိုက် တိုးမြှင့်ခဲ့ပြီးနောက် ပထမဆုံးအကြိမ်အဖြစ် ဘဏ်အတိုးနှုန်းကို ၂ ဒသမ ၅၀ ရာခိုင်နှုန်း သတ်မှတ်ထားမှုကို ပြောင်းလဲခြင်းမရှိခဲ့ဘဲ ထိုနှုန်းထားဖြင့်် ဆက်လက် ထိန်းသိမ်းထားသည်ဟု ထိုင်းဗဟိုဘဏ် (Bank of Thailand) က နိုဝင်ဘာ ၂၉ ရက်တွင် ထုတ်ပြန်ခဲ့ကြောင်း Nikkei Asia မှ ဖော်ပြခဲ့သည်။
မကြာသေးမီက ရိုက်တာသတင်းဌာနမှ ကောက်ခံခဲ့သည့် စီးပွားရေး စစ်တမ်း၏ ရလဒ်များနှင့်အညီ ထိုဆုံးဖြတ် ချက်ကို ချမှတ်ခဲ့ခြင်း ဖြစ်သည်ဟု သိရသည်။
"စီးပွားရေးပြန်လည် နာလန်ထူတဲ့ အလားအလာကို ရှေ့ဆက်နိုင်ဖို့အတွက် ငွေကြေးမူဝါဒ ကော်မတီဟာ လက်ရှိ မူဝါဒရဲ့ အတိုးနှုန်းကို သတ်မှတ်ထားတဲ့ ပမာဏအတွင်းမှာ ဆက်လက် ထိန်းထားနိုင်ဖို့နဲ့ ရေရှည်တည်တံ့တဲ့ ကြီးမားတဲ့ ဘဏ္ဍာရေးတည်ငြိမ်မှုကို မြှင့်တင်ဖို့ ဆုံးဖြတ်ခဲ့ပါတယ်" ဟု ထိုင်း ဗဟိုဘဏ်က ထုတ်ပြန်ခဲ့သည်။
ထိုင်းနိုင်ငံအတွင်းက နေရာတစ်ခုကိုတွေ့ရစဉ်
နိုဝင်ဘာ ၂၉ ရက်နေ့မှာပင် ထိုင်းဗဟိုဘဏ်က ယခုနှစ်အတွက် ဂျီဒီပီ ဖွံ့ဖြိုးတိုးတက်မှုနှုန်းကို ယခင်ခန့်မှန်း ထားသည့် ၂ ဒသမ ၈ ရာခိုင်နှုန်းမှ ၂ ဒသမ ၄ ရာခိုင်နှုန်းသို့ လျှော့ချခဲ့သည်။
၂၀၂၄ ခုနှစ်အတွက် စီးပွားရးဖွံ့ဖြိုးတိုးတက်မှုနှုန်းကို ၃ ဒသမ ၂ ရာခိုင်နှုန်းအထိ ခန့်မှန်းထားပြီး ထိုနှုန်းထားသည် ယခင်ခန့်မှန်းထားသည့် စီးပွားရေးဖွံ့ဖြိုးတိုးတက်မှုနှုန်း ၄ ဒသမ ၄ ရာခိုင်နှုန်းမှ လျှော့ချခဲ့ခြင်းလည်း ဖြစ်သည်။
လာမည့်နှစ် မေလတွင် စတင်မည့် ထိုင်းဝန်ကြီးချုပ် ဆရီသာ သာဗီဆင် (Srettha Thavisin) ၏ ဒစ်ဂျစ်တယ် ငွေကြေး ထောက်ပံ့ပေးမည့် အစီအစဉ်ကြောင့် ၂၀၂၄ ခုနှစ်အတွင်း စီးပွားရေး ဖွံ့ဖြိုးတိုးတက်မှုနှုန်းသည် ၃ ဒသမ ၈ ရာခိုင်နှုန်းအထိ ရောက်ရှိနိုင်သည်ဟုလည်း ဗဟိုဘဏ်က ထုတ်ပြန်ခဲ့သည်။
ထိုင်းဗဟိုဘဏ်၏ နောက်ဆုံး ထုတ်ပြန်ခဲ့သည့် ငွေကြေးမူဝါဒ ကြေညာချက်သည် ထိုင်းအမျိုးသား စီးပွားရေးနှင့် လူမှုရေး ဖွံ့ဖြိုးတိုးတက်မှုကောင်စီ (NESDC) က ထုတ်ပြန်ခဲ့သည့် ဂျီဒီပီ ဖွံ့ဖြိုးတိုးတက်မှုနှုန်း ခန့်မှန်းချက်ထက် ပိုမိုနည်းပါးခဲ့သည်။
ထိုင်းနိုင်ငံအတွင်းက နေရာတစ်ခုကိုတွေ့ရစဉ်
ပြီးခဲ့သည့် သီတင်းပတ်က NESDC ၏ ခန့်မှန်းချက်သည် ထိုင်းနိုင်ငံ၏ ၂၀၂၃ ခုနှစ် စီးပွားရေးဖွံ့ဖြိုးတိုးတက် မှုနှုန်းကို ၂ ဒသမ ၅ ရာခိုင်နှုန်းအဖြစ် သတ်မှတ်ခဲ့သည်။
ထိုနှုန်းထားသည် သြဂုတ်လအတွင်းက ခန့်မှန်းခဲ့သည့် ၃ ဒသမ ၀ ရာခိုင်နှုန်းမှ ၂ ဒမသ ၅ ရာခိုင်နှုန်းအထိ လျှော့ချခဲ့ခြင်း ဖြစ်သည်။
Source: Nikkei Asia
- By CNI
- Category: စီးပွားရေး
- Hits: 200
CNI International News
ဘန်ကောက်ပို့၊ နိုဝင်ဘာ ၂၄
တရုတ်ခရီးသွားများကို ဆွဲဆောင်ရန် နိုင်ငံ၏ ခရီးသွားကဏ္ဍ မဟာဗျူဟာ အစီအစဉ်အသစ်များအား ပြန်လည် ရေးဆွဲရန် လိုအပ်သည်ဟု ထိုင်းခရီးသွား အာဏာပိုင်အဖွဲ့ (TAT) ၏ အုပ်ချုပ်ရေးမှူးဟောင်း ယူသာဆက် စူပါဆွန်း (Yuthasak Supasorn) က ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။
ယခုနှစ်အတွင်း ထိုင်းနိုင်ငံသို့ တရုတ်ပြည်မကြီးမှ ခရီးသွားများ ဝင်ရောက်မှုနှုန်းသည် ၂၀၁၉ ခုနှစ်က တရုတ်ခရီး သွားများ ဝင်ရောက်မှုနှုန်း၏ ၂၆ ဒဿမ ၈ ရာခိုင်နှုန်းသာရှိသည်ဟု ခန့်မှန်းချက်များ ထွက်ပေါ်ခဲ့ချိန်တွင် TAT အကြီးအကဲဟောင်း၏ ပြောကြားချက် ထွက်ပေါ်လာခြင်း ဖြစ်သည်။
အစိုးရအနေနှင့် တရုတ်လေကြောင်းလိုင်းများနှင့်အတူ ဈေးနှုန်းမျှတပြီး သာတူညီမျှမှုရှိသည့် အခကြေးငွေ နှုန်းထားများနှင့်ပတ်သက်ပြီး ထိုင်းလေကြောင်းလိုင်းများအတွက် လေကြောင်းပျံသန်းမှု ခရီးစဉ်များ ပိုမို ပြေးဆွဲခွင့်ရရှိရန် တရုတ်နှင့် ဆွေးနွေးညှိနှိုင်းမှုများကို အာရုံစိုက် လုပ်ဆောင်သင့်ကြောင်း ယူသာဆက်က ပြောကြားခဲ့သည်။
တရုတ်ခရီးသွားများနဲ့ ယူသာဆက် စူပါဆွန်းကို တွေ့ရစဉ်
အပူချိန်လျှော့ကျပြီး အေးသည့်ရာသီဥတုဖြစ်သည့် ၂၀၂၃ ခုနှစ်၊ အောက်တိုဘာလမှ ၂၀၂၄ ခုနှစ်၊ မတ်လအထိ ထိုင်းနှင့်တရုတ်အကြား လေကြောင်းလိုင်း ပြေးဆွဲမှုများသည် ၂၀၁၉ ခုနှစ်ကနှင့်နှိုင်းယှဉ်ပါက ၂၄ ဒဿမ ၃ ရာခိုင်နှုန်း ရှိလာလိမ့်မည်ဖြစ်သည်။
ထိုကာလအတွင်း လေကြောင်းလိုင်း ပြေးဆွဲမှုအကြိမ်ရေ ၁၆,၃၃၀ ရှိနိုင်ပြီး ၂၀၁၉ ခုနှစ် ကာလတူအတွင်း ၆၇,၀၆၂ ကြိမ်ရှိခဲ့သည်။
နိုဝင်ဘာ ၂၀ ရက်အထိ ရရှိထားသည့် အချက်အလက်များအရ ယခုနှစ်အတွင်း ထိုင်းသို့ ရောက်ရှိသည့် တရုတ် နိုင်ငံသား ၂ ဒဿမ ၉၈ သန်းရှိခဲ့သည်။ ထိုရာခိုင်နှုန်းသည် ၂၀၁၉ ခုနှစ်က ထိုင်းသို့ရောက်ရှိခဲ့သည့် တရုတ်နိုင်ငံ သား အရေအတွက်၏ ၂၆ ဒဿမ ၈ ရာခိုင်နှုန်းရှိခဲ့သည်။
တရုတ်ခရီးသွားများကိုတွေ့ရစဉ်
ယခုနှစ်အတွင်း နေ့အလိုက် ထိုင်းသို့ ရောက်ရှိခဲ့သည့် တရုတ်နိုင်ငံသား အရေအတွက်သည် ၉၁၉၆ ဦးရှိပြီး ၂၀၁၉ ခုနှစ်တွင် နေ့အလိုက် ထိုင်းသို့ ရောက်ရှိခဲ့သည့် တရုတ်နိုင်ငံသား အရေအတွက် ၃၀၀၀၀ ခန့်ရှိခဲ့သည်။
၂၀၂၀ ပြည့်နှစ် ပထမနှစ်ဝက်အတွင်း တရုတ်နိုင်ငံသား သန်း ၄၀ ခန့်သည် ပြည်ပနိုင်ငံများသို့ သွားရောက်ခဲ့ပြီး ၎င်းတို့အနက် ၂၅ ရာခိုင်နှုန်း သို့မဟုတ် ၁၀ သန်းခန့်သည် မက္ကာအိုနှင့် ဟောင်ကောင်ဒေသများသို့ သွားရောက် ခဲ့ခြင်း ဖြစ်သည်။
Source: ဘန်ကောက်ပို့စ်
- By CNI
- Category: စီးပွားရေး
- Hits: 273
CNI International News
ဆန်ဖရန်စစ္စကို၊ နိုဝင်ဘာ ၁၇
ထိုင်းနိုင်ငံတွင် ရင်းနှီးမြှုပ်နှံမှုများပြုလုပ်ရန် ယခုအချိန်သည် အချိန်ကောင်းဖြစ်သည်ဟု ထိုင်းဝန်ကြီးချုပ် ဆရီသာ သာဗီဆင် (Srettha Thavisin) က အမေရိကန်နိုင်ငံ ဆန်ဖရန်စစ္စကို (San Francisco)မြို့တွင် ပြုလုပ်သည့် အာရှ-ပစိဖိတ် စီးပွားရေး ပူးပေါင်းဆောင်ရွက်မှု (APEC) အစည်းအဝေးတွင် တိုက်တွန်းခဲ့သည်ဟု Thai PBS World မှ ဖော်ပြခဲ့သည်။
ဆရီသာသည် နိုဝင်ဘာ ၁၅ ရက်က ဆန်ဖရန်စစ္စကိုမြို့ရှိ မော့စ်ကွန်းစင်တာ (Moscone Centre)တွင် ပြုလုပ် သည့် ၂၀၂၃ ခုနှစ် APEC-CEO ညီလာခံသို့ တက်ရောက်လာသည့် စီးပွားရေးခေါင်းဆောင်များကို မိန့်ခွန်းပြောကြား ရာ၌ အထက်ပါအတိုင်း တိုက်တွန်းခဲ့သည်ဟု ထိုင်းအစိုးရအဖွဲ့၏ ပြောရေးဆိုခွင့်ရှိသူ ချိုင် ဝါချာရွန်ကီ (Chai Wacharonke) က ပြောကြားခဲ့သည်။
ထိုင်းနိုင်ငံသည် နိုင်ငံရေးတည်ငြိမ်ပြီး အစိုးရအနေနှင့်လည်း ဖွံ့ဖြိုးတိုးတက်မှု၊ ရေရှည်တည်တံ့ခိုင်မြဲမှုနှင့် စီးပွားရေး ယှဉ်ပြိုင်မှုများအတွက် မူဝါဒများကို အကောင်အထည်ဖော်ခဲ့ကြောင်း ဆရီသာက ပြောကြားခဲ့သည်။
ထိုင်းဝန်ကြီးချုပ် ဆရီသာ သာဗီဆင်ကို တွေ့ရစဉ်
APEC သည် အင်အားကြီးမားသည့် အဖွဲ့ဖြစ်ကြောင်းနှင့် APEC အဖွဲ့ဝင်နိုင်ငံများ၏ စုစုပေါင်း လူဦးရေသည် ကမ္ဘာ့ လူဦးရေ၏ ၃ ပုံ ၁ ပုံရှိကြောင်း၊ ကမ္ဘာ့ကုန်သွယ်မှု ပမာဏစုစုပေါင်း၏ ထက်ဝက်ခန့်ရှိကြောင်း ဆရီသာက ပြော ကြားခဲ့သည်။
ထို့ပြင် မကြာသေးမီ နှစ်များအတွင်း APEC သည် ကုန်သွယ်ရေးနှင့် ရင်းနှီးမြှုပ်နှံမှုကဏ္ဍများတွင် ပွင့်လင်းမှုများမှ တစ်ဆင့် သန်းနှင့်ချီသည့် လူသားများကို ဆင်းရဲတွင်းမှ ဆွဲထုတ်ရာတွင် အောင်မြင်မှု ရရှိခဲ့သည်ဟုလည်း ထိုင်းဝန်ကြီးချုပ်က ပြောသည်။
ရေရှည်တည်တံ့ခိုင်မြဲမှု၊ နည်းပညာ၊ ဆန်းသစ်တီထွင်မှု၊ ကုန်သွယ်ရေးနှင့် ရင်းနှီးမြှုပ်နှံမှုများသည် စီးပွားရေး ပူးပေါင်းဆောင်ရွက်မှု၏ အဓိက အခန်းကဏ္ဍများ ဖြစ်သည်ဟုလည်း ဆရီသာက အလေးထားပြောခဲ့သည်။
ထိုင်းဝန်ကြီးချုပ် ဆရီသာ သာဗီဆင်ကို တွေ့ရစဉ်
APEC အမျိုးသားစင်တာ အနေနှင့်လည်း ရေရှည်တည်တံ့ခိုင်မြဲသည့် အနာဂါတ် ဖိုရမ် (Sustainable Future Forum) ကို ပထမဆုံးအကြိမ် ကျင်းပနိုင်ရေးအတွက် သဘောတူညီမှုရရှိစေရန် ဆရီသာက တိုက်တွန်းခဲ့သည်။
ထိုင်းအစိုးရသည် ရေရှည်တွင် ဒစ်ဂျစ်တယ် အစိုးရအဖြစ်သို့ ကူးပြောင်းနိုင်ရန် ရည်ရွယ်ထားပြီး နည်းပညာ၏ အကူအညီနှင့်အတူ ပြည်သူ့ ဝန်ဆောင်မှု လုပ်ငန်းများတွင် ထိရောက်မှုရှိစေရေးကို မြှင့်တင်ရန်နှင့် ဒစ်ဂျစ်တယ် နည်းပညာကဏ္ဍ၌ ပြည်ပရင်းနှီးမြှုပ်နှံမှုများကို ကြိုဆိုကြောင်း ဝန်ကြီးချုပ်ဆရီသာက ပြောကြားခဲ့သည်ဟု ထိုင်း အစိုးရအဖွဲ့က ထုတ်ပြန်ခဲ့သည်။
Source: Thai PBS World