- By CNI
- Category: စီးပွားရေး
- Hits: 522
CNI International News
နယူးဒေလီ၊ ဧပြီ ၂၃
ပြီးခဲ့သည့်လက အိန္ဒိယ၏ ရူပီးငွေကြေးသည် အမေရိကန်ဒေါ်လာနှင့် နှိုင်းယှဉ်ပါက သိသာစွာ ကျဆင်းခဲ့ပြီးနောက် အိန္ဒိယသည် ၎င်း၏ ရူပီးငွေကြေး (INR) ကို ခိုင်မာသည့် ကမ္ဘာ့အရန်ငွေကြေး ဖြစ်လာစေရန် မျှော်မှန်းထားသည် ဟု Economic Times မှ ဖော်ပြခဲ့သည်။
နိုင်ငံတကာ ဈေးကွက်တွင် ရူပီးငွေကြေး၏ ဝယ်ယူမှု အင်အားသည် လျော့ကျခဲ့ပြီး သွင်းကုန်ဝယ်ယူမှုများ သိသာစွာ မြင့်တက်ခဲ့သဖြင့် ဒေါ်လာနှင့်နှိုင်းယှဉ်ပါက ရူပီးငွေတန်ဖိုးများ ကျဆင်းခဲ့ခြင်းဖြစ်သည်။
ရေနံ သွင်းကုန်များအပေါ် အလွန်အမင်း မှီခိုနေရသည့် အိန္ဒိယသည် ထိုကဲ့သို့ ရူပီးငွေတန်ဖိုး လျော့ကျမှုကို ဆိုးရွားစွာ ခံစားခဲ့ရသည်။
ထိုအခြေအနေကို တုန့်ပြန်သည့် အနေဖြင့် ပြီးခဲ့သည့်နှစ် ဇူလိုင်လက အိန္ဒိယသည် ယူအေအီးထံမှ ရေနံများ ဝယ်ယူရာတွင် ရူပီးငွေကြေးဖြင့် ပေးချေရန် သဘောတူ စာချုပ်တစ်ခုကို လက်မှတ်ရေးထိုးခဲ့သည်။
ထိုလုပ်ဆောင်ချက်သည် ပြဿနာကို သွယ်ဝိုက်ဖြေရှင်းသည့် စီမံဆောင်ရွက်ချက်ဖြစ်ပြီး ရုရှားထံမှရေနံများ ဝယ်ယူမှုကိုလည်း ရူပီးငွေကြေးဖြင့်သာ ပေးချေရန် လုပ်ဆောင်ခဲ့သည်။
အိန္ဒိယရဲ့ ရူပီးငွေကို တွေ့ရစဉ်
လက်ရှိတွင် အိန္ဒိယသည် နိုင်ငံပေါင်း ၃၉ နိုင်ငံမှ ရေနံစိမ်းများကို တင်သွင်းဝယ်ယူလျက်ရှိသည်။
အိန္ဒိယသည် ယူအေအီး၊ ရုရှားတို့နှင့် သဘောတူညီမှုများကဲ့သို့ အခြားနိုင်ငံများထံမှ ရေနံဝယ်ယူမှုများကိုလည်း ရူပီးဖြင့် ပေးချေနိုင်ရန် ကြိုးပမ်းလျက်ရှိသည်။
ထို့ပြင် အိန္ဒိယ၏ အရန်ငွေကြေးဘဏ် (RBI) ကလည်း ထိုင်းတွင် အိန္ဒိယရူပီး အသုံးပြုခွင့် ရရှိစေရန် ဆွေးနွေး မှုများ ပြုလုပ်နေသည်။
ထိုသို့ လုပ်ဆောင်ခြင်းဖြင့် အိန္ဒိယခရီးသွားများသည် ထိုင်းသို့ ပိုမိုသွားရောက်နိုင်မည်ဖြစ်သလို ထိုင်းအတွက်လည်း အကျိုးရှိစေမည်ဖြစ်သည်။
RBI သည် ရူပီးငွေကြေးဖြင့် ကုန်သွယ်မှုများ ပြုလုပ်ရန် နိုင်ငံပေါင်း ၁၉ နိုင်ငံနှင့် ဆွေးနွေးလျက်ရှိပြီး ထိုနိုင်ငံများမှ ဘဏ်များကို ငွေကြေးပေးချေမှုများအတွက် အထူး Vostro ရူပီး အကောင့်များ (SVRAs) ဖွင့်ခွင့်ပြုခြင်းအားဖြင့် သဘောတူညီမှုရရှိရန် လုပ်ဆောင်နေသည်။
ထိုလုပ်ဆောင်ချက် အားလုံးသည် ပြည်ပ ငွေကြေး ပေးချေမှုများတွင် ဒေါ်လာအစား ရူပီးကို အသုံးပြုနိုင်မည့် စီမံဆောင်ရွက်ချက်များဖြစ်ပြီး ရူပီးကို နိုင်ငံတကာသုံး ငွေကြေးအဖြစ် ရည်မှန်းထားခြင်း ဖြစ်သည်ဟု ကျွမ်းကျင် သူများက ပြောကြားခဲ့သည်။
Source: Economic Times
- By CNI
- Category: စီးပွားရေး
- Hits: 1119
CNI International News
နယူးဒေလီ၊ ဧပြီ ၂၂
အိန္ဒိယဝန်ကြီးချုပ် မိုဒီ (Narendra Modi) ၏ အစိုးရအဖွဲ့သည် ဂြိုဟ်တု ထုတ်လုပ်ရေးနှင့် ဂြိုဟ်တု လွှတ်တင်ရေး ယာဉ် အစိတ်ပိုင်းများ ထုတ်လုပ်ရေးတွင် ပြည်ပရင်းနှီးမြှုပ်နှံသူများကို ဆွဲဆောင်ရန်အတွက် အာကာသကဏ္ဍ၌ ပြည်ပတိုက်ရိုက်ရင်းနှီးမြှုပ်နှံမှုဆိုင်ရာ မူဝါဒကို ပြင်ဆင်ပြောင်းလဲခဲ့ကြောင်း Eur Asian Times မှ ဖော်ပြခဲ့သည်။
Tesla နှင့် SpaceX စီအီးအို အီလွန် မာ့စ် (Elon Musk) သည် အိန္ဒိယသို့ ဧပြီ ၂၁ ရက်မှ ၂၂ ရက်အထိ လာရောက် မည့် ခရီးစဉ်မတိုင်မီ ရက်ပိုင်းအလိုတွင် အိန္ဒိယအစိုးရ၏ ကြေညာချက် ထွက်ပေါ်ခဲ့ခြင်း ဖြစ်သည်။
သို့သော် အီလွန်မာ့စ်သည် ၎င်း၏ အလုပ်တာဝန်များကြောင့် ထိုခရီးစဉ်ကို ရက်ရွှေ့ဆိုင်းခဲ့ပြီး ယခုနှစ်ကုန်ပိုင်းတွင် အိန္ဒိယသို့ လာရောက်မည်ဟု ပြောကြားခဲ့သည်။
ယခုနှစ် ဖေဖော်ဝါရီလ အစောပိုင်းက အိန္ဒိယအစိုးသည် ဂြိုဟ်တုများ ထုတ်လုပ်ရာတွင် ပြည်ပရင်းနှီးမြှုပ်နှံသူများ နှင့် ပုဂ္ဂလိက ကုမ္ပဏီများကို ဆွဲဆောင်ရန် အာကာသကဏ္ဍ၌ ပြည်ပရင်းနှီးမြှုပ်နှံမှု (FDI) စံချိန်စံညွှန်းများအား ဖြေလျှော့ပေးခဲ့သည်။
ထို့နောက် ဧပြီ ၁၆ ရက်တွင် အာကာသကဏ္ဍအတွက် FDI မူဝါဒကို ပြင်ဆင်ပြောင်းလဲကြောင်း အစိုးရပြန်တမ်း ထုတ်ပြန်ခဲ့ပြီး ဂြိုလ်တုနှင့်တစ်ကွ ဆက်စပ်ပစ္စည်းများ၊ စနစ်များ ထုတ်လုပ်ရေး၌ ပြည်ပရင်းနှီးမြှုပ်နှံမှုကို ၁၀၀ ရာခိုင်နှုန်း ခွင့်ပြုပေးခဲ့သည်။
အိန္ဒိယက အာကာသထဲ ဒုံးကျည်ပစ်လွှတ်နေစဉ်
အီလွန်မာ့စ်၏ Starlink ဂြိုလ်တု အင်တာနက် ဝန်ဆောင်မှုကို အိန္ဒိယ ပြည်ထဲရေးဝန်ကြီးဌာနက လက်ခံရယူမည် ဖြစ်ပြီး အိန္ဒိယတွင် ဂြိုဟ်တုဆက်သွယ်ရေး ဝန်ဆောင်မှုများအတွက် အီလွန်မာ့စ်၏ ကုမ္ပဏီကို ကန်ထရိုက်ပေးရန် မူအရ အတည်ပြုပေးခဲ့ပြီးဖြစ်သည်။
SpaceX ကုမ္ပဏီ၏ ဂြိုဟ်တု အင်တာနက် ဝန်ဆောင်မှုကို ကမ္ဘာ့နိုင်ငံပေါင်း ၇၀ တွင် လွှမ်းခြုံထောက်ပံ့ ပေးထား ပြီး ထိုဂြိုဟ်တု အင်တာနက် ထောက်ပံ့သည့် ဂြိုလ်တုအစုအဝေးသည် ကမ္ဘာ့ပတ်လမ်း အနိမ့်၌ တည်ရှိလျက်ရှိသည်။
ထို့နောက် တစ်ကမ္ဘာလုံးကို အင်တာနက်ဝန်ဆောင်မှု ထောက်ပံ့ပေးရန် မျှော်မှန်းထားသည်။
Starlink မှတစ်ဆင့် အိန္ဒိယစျေးကွက်တွင် ဝန်ဆောင်မှုပေးမည့် အစီအစဉ်နှင့် ဆက်စပ်သည့် အရေးကိစ္စများကို အစိုးရနှင့် ဆွေးနွေးနေသူများအနက် Agnikula Cosmos၊ Bellatrix Aerospace၊ Skyroot Aerospace၊ Dhruva Space၊ Pixxel၊ SatSure၊ နှင့် Digantara တို့ကဲ့သို့ အာကာသနည်းပညာ startup ကုမ္ပဏီတည်ထောင်သူများ ပါဝင်သည်။
အိန္ဒိယအစိုးရသည် အာကာသနယ်ပယ်တွင် ပုဂ္ဂလိက၏ ပါဝင်မှုအခန်းကဏ္ဍကိုလည်း မြှင့်တင်ရန် တွန်းအားပေး လုပ်ဆောင်လျက်ရှိသည်။
Source: Eur Asian Times
- By CNI
- Category: စီးပွားရေး
- Hits: 204
CNI International News
ဟောင်ကောင်၊ ဧပြီ ၁၂
ဥရောပဆိပ်ကမ်းများတွင် တင်သွင်းဝယ်ယူထားသည့် မော်တော်ယာဥ်များသည် အများအပြားစုပုံနေပြီး ဆိပ်ကမ်းများကို ကားပါကင်များအဖြစ် ပြောင်းလဲသွားစေခဲ့သည်။
ထို့နောက် ကားထုတ်လုပ်သူများနှင့် ဖြန့်ဖြူးရောင်းချသူများသည် ဝယ်လိုအား ကျဆင်းမှု၊ ထိုကားများကို သယ်ယူပို့ဆောင်ပေးသည့် ထရပ်ကား ယာဥ်မောင်းများ ရှားပါးမှုတိုဖြင့် ရုန်းကန်နေရသည်ဟု AFR သတင်း ဝက်ဘ်ဆိုက်မှ ဖော်ပြခဲ့သည်။
တရုတ်လျှပ်စစ်ကားများ စုပုံဝင်ရောက်လာခြင်းသည် ပြဿနာဖြစ်စေသည့် အဓိက အကြောင်းရင်းများထဲတွင် တစ်ခု အပါအဝင်ဖြစ်ကြောင်း ဆိပ်ကမ်းနှင့် ကားလုပ်ငန်း အမှုဆောင်အရာရှိများက ပြောကြားခဲ့သည်။
နောက်ထပ် ပြဿနာများအနက် ကားထုတ်လုပ်သူများသည် ၎င်းတို့၏ ကားများကို သယ်ယူပို့ဆောင်ပေးရန် ကားများကို တင်ဆောင်သည့် ထရပ်ကားများအား မောင်းနှင်မည် ယာဥ်မောင်းများ ရှားပါးခြင်းလည်း ပါဝင် နေခြင်းဖြစ်သည်။
တရုတ်ထုတ် လျှပ်စစ်ကားတွေကို ဆိပ်ကမ်းမှာတွေ့ရစဉ်
"ကားဖြန့်ဖြူးရောင်းချသူတွေဟာ ဆိပ်ကမ်းက ကားပါကင်တွေကို ဂိုထောင်တွေအဖြစ် အသုံးပြုတာတွေ မြင့်တက်လာပါတယ်"ဟု ဥရောပတွင် ကားများတင်သွင်းမှု အများဆုံးဖြစ်သည့် ဘယ်လ်ဂျီယံနိုင်ငံ Zeebrugge မြို့ရှိ Antwerp-Bruges ဆိပ်ကမ်းမှ တာဝန်ရှိသူများက ပြောကြားခဲ့သည်။
"ကားပွဲစားတွေဆီမှာ ကားတွေ စုပုံနေရမယ့်အစား ကားတွေဟာဆိပ်ကမ်းတွေမှာ စုပုံလာပါတယ်။ ကားတွေ တင်သွင်းတဲ့ ဆိပ်ကမ်းကြီးတွေ အားလုံးဟာ အဲဒီပြဿနာနဲ့ ရင်ဆိုင်နေရပါတယ်"ဟု Antwerp-Bruges ဆိပ်ကမ်းအာဏာပိုင်များက ပြောကြားခဲ့သည်။
သို့သော် မည်သည့်နိုင်ငံမှ တင်သွင်းသည့် ကားများဖြစ်သည် ဆိုခြင်းကိုမူ အသေးစိတ် ပြောကြားခြင်း မရှိပေ။
ကားလုပ်ငန်းမှ အလုပ်အမှုဆောင်အချို့ကမူ တရုတ်၏ ကားထုတ်လုပ်သူများသည် ၎င်းတို့၏ ကားများကို ဥရောပတွင် မျှော်မှန်းထားသလောက် လျင်မြန်စွာ မရောင်းချနိုင်ခဲ့ဘဲ တရုတ်ကားများသည် ဥရောပဆိပ်ကမ်း များသို့ ဝင်ရောက်မှု အများဆုံးဖြစ်ကြောင်း ပြောကြားခဲ့သည်။
တရုတ်ထုတ် လျှပ်စစ်ကားတွေကို ဆိပ်ကမ်းမှာတွေ့ရစဉ်
"တရုတ် လျှပ်စစ်ကား ထုတ်လုပ်သူတွေဟာ ဆိပ်ကမ်းတွေကို ကားပါကင်တွေလို အသုံးချနေပါတယ်" ဟု ကားတင်သွင်းသည့် မန်နေဂျာတစ်ဦးက ပြောကြားခဲ့သည်။
တရုတ်လျှပ်စစ်ကား အမှတ်တံဆိပ်အချို့သည် ဥရောပဆိပ်ကမ်းများတွင် ၁၈ လအထိ သောင်တင်နေပြီး အချို့ဆိပ်ကမ်းများက ကားတင်သွင်းသူများကို ကားများ ဦးတည်သွားရောက်မည့် လမ်းကြောင်းကို ထောက်ပံ့ပေးရန် တောင်းဆိုခဲ့ကြောင်း ကားလုပ်ငန်း အလုပ်အမှုဆောင်များက ပြောကြားခဲ့သည်။
"ဒါက ပရမ်းပတာ အခြေအနေ ဖြစ်ပါတယ်" ဟု အခြား ကားလုပ်ငန်းရှင်တစ်ဦးက ပြောကြားခဲ့သည်။
Source: AFR
- By CNI
- Category: စီးပွားရေး
- Hits: 145
CNI International News
ဘန်ကောက်၊ ဧပြီ ၁၁
ထိုင်းနိုင်ငံ၊ ချင်းမိုင်မြို့တွင် လေထုညစ်ညမ်းနေသော်လည်း ခရီးသွားလာရောက်မှု လျော့ကျခြင်းမရှိကြောင်း ခရီးသွားလုပ်ငန်းအာဏာပိုင်အဖွဲ့၏ ချင်းမိုင်ရုံးမှ ညွှန်ကြားရေးမှူး ပက်ဆင်ဆာဝီထရတ် (Patsin Sawetrat)က ပြောကြားခဲ့ကြောင်း Thai PBS World မှ ဖော်ပြခဲ့သည်။
တောမီးလောင်မှုများမှ မီးခိုးများသည် ခရီးသွားကဏ္ဍအပေါ် သက်ရောက်မှု ရှိကောင်းရှိနိုင်ကြောင်း ၎င်းက ဝန်ခံ ပြောကြားခဲ့သော်လည်း ဧပြီ ၁၂ ရက်မှ ၁၆ ရက်အထိ ကျင်းပသော ဆွန်ကရမ် ရေကစားပွဲတော်အတွင်း ဟိုတယ် လာရောက်တည်းခိုသူ မြင့်တက်လာလိမ့်မည်ဟု မျှော်မှန်းထားကြောင်း ပြောကြားခဲ့သည်။
ချင်းမိုင်မြို့တွင် ဆွန်ကရမ် ရေကစားပွဲတော်ကာလအတွင်း ခရီးသွားကဏ္ဍမှ မျှော်မှန်းဝင်ငွေသည် ခန့်မှန်းခြေ ဘတ် ၁.၂ ဘီလျံခန့်ရှိသည်ဟု ပက်ဆင်ဆာဝီထရတ်က ပြောကြားခဲ့သည်။
မိမိတို့ရုံးက ဒေသခံများနှင့် ဧည့်သည်များအတွက် ဘုန်းကြီးကျောင်း ၉ ကျောင်းတွင် အထွတ်အမြတ် ရေစင်ပွဲကို ပြုလုပ်သွားမည်ဟု ၎င်းက ထပ်မံပြောကြားခဲ့သည်။
ချင်းမိုင်မြို့တွင် ခရီးသွားများကိုတွေ့ရစဉ်
အထွတ်အမြတ်ရေစင်ကို ပုလင်း ၁၇,၇၂၈ ဘူးတွင် ဖြည့်သွားမည်ဖြစ်ကာ မြို့သူမြို့သားများအား မင်္ဂလာရှိသော ပစ္စည်းတစ်ခုအဖြစ် မျှဝေလှူဒါန်း သွားမည်ဖြစ်သည်။
ချင်းမိုင်မြို့တွင် အလားတူပွဲများကို ကျင်းပလာခဲ့သည်မှာ လေးနှစ် ဆက်တိုက်ရှိပြီ ဖြစ်သည်။
သဘာဝအရင်းအမြစ်များနှင့် သဘာဝပတ်ဝန်းကျင်ဝန်ကြီး ပက်ချာရာဝက်ဝေါင်ဆူဝန်(Patcharawat Wongsuwan)က ပုံမှန်ပြုလုပ်နေကြ အစိုးရအဖွဲ့ အစည်းအဝေးပြီးနောက် ချင်းမိုင်တွင် လေထုညစ်ညမ်းမှု ပြဿနာကို ဖြေရှင်းရန် အဆင့်မြင့်ကော်မတီ အစည်းအဝေးတစ်ရပ်ကို အရေးပေါ် ခေါ်ယူခဲ့သည်။
ချင်းမိုင်တွင် အုပ်ချုပ်ရေးမှူး နီရတ်ပွန်းဆစ်သီသာဗွန်(Nirat Pongsitthithavorn)က ဒေသခံအုပ်ချုပ်ရေး အဖွဲ့အစည်းများအနေဖြင့် အဖွဲ့အစည်းတစ်ခုစီအတွင်း လေသန့်စင်သော အခန်း ၃ ခန်းထက်မနည်း ထားရှိရန် ညွှန်ကြားခဲ့သည်။
အလားတူ အခန်းများကိုလည်း ဆေးရုံများ အားလုံးတွင် ထားရှိသွားမည်ဖြစ်သည်။
ဝန်ကြီး ပက်ချာရာဝက်ဝေါင်ဆူဝန်ကို တွေ့ရစဉ်
ခုခံအားနည်းသော သို့မဟုတ် လေထုညစ်ညမ်းမှု အကျိုးဆက်ကို ကြုံတွေ့နိုင်ခြေ အမြင့်ဆုံးဟု ယူဆထားသူ ၄ သိန်းကျော်ကို အထူးဂရုစိုက်ရန်လည်း ကျန်းမာရေးတာဝန်ရှိသူများကို မှာကြားခဲ့သည်။
၎င်းတို့ထဲတွင် အသက် ၅ နှစ်အောက်အရွယ် ကလေး ၁ သိန်းကျော်၊ ကိုယ်ဝန်ဆောင် အမျိုးသမီး ၃၀၀၀ ကျော်၊ နာတာရှည်ရောဂါ ဝေဒနာရှင် ၆၀၀၀ ကျော်၊ ပန်းနာရင်ကြပ် ရောဂါဝေဒနာရှင် ၄၀၀၀ ကျော်၊ မသန်စွမ်းနှင့် သက်ကြီးရွယ်အို ၂၅၀,၀၀၀ ခန့်နှင့် နှလုံးရောဂါဝေဒနာရှင် ၁၆၀၀ ခန့် ပါဝင်သည်။
လူအများအနေဖြင့် ဧပြီ ၁၁ ရက်နေ့အထိ နေအိမ်အတွင်းတွင် နေထိုင်ကြရန်နှင့် အပြင်ထွက်သည့် အခါတွင်လည်း နှာခေါင်းစည်း တပ်ဆင်ကြရန် အကြံပြုထားသည်။
Source: Thai PBS World
- By CNI
- Category: စီးပွားရေး
- Hits: 149
CNI International News
အစ္စလာမ်မာဘက်၊ ဧပြီ ၁၁
ပါကစ္စတန်နိုင်ငံတွင် နိုင်ငံရေး မတည်ငြိမ်မှုကြောင့် စီးပွားရေး အကျပ်အတည်းနှင့် ရင်းနှီးမြှုပ်နှံမှုများ လျော့ကျ လာသည့် အခြေအနေကို ရင်ဆိုင်နေရသည်ဟု India Blooms သတင်းဝက်ဘ်ဆိုက်မှ ဖော်ပြခဲ့သည်။
ထိုအခြေအနေနှင့်ပတ်သက်ပြီး ပါကစ္စတန်နိုင်ငံ၊ ပန်ဂျပ် (Punjab) ပြည်နယ်၏ ပထမဆုံးအမျိုးသမီး ဝန်ကြီးချုပ် မာရမ်နာဝက်ဇ် (Maryam Nawaz) က လူသိရှင်ကြား ကြိုတင်သတိပေးခဲ့သည်။
၎င်း၏ သတိပေးချက်သည် မှန်ကန်နိုင်ခြေရှိသည်ဟု ကျွမ်းကျင်သူများက ပြောကြားခဲ့သည်။
ရင်းနှီးမြှုပ်နှံမှုနှင့် ကုန်သွယ်ရေးတွင် အစိုးရ၏ တည်ငြိမ်မှုမရှိသည့် မူဝါဒများ၊ အစိုးရ၏ အသုံးစရိတ်၊ အခွန်စနစ်၊ ဘဏ္ဍာရေးဟန်ချက်ညီမှု၊ ငွေကြေးမူဝါဒ၊ ကြွေးမြီအခြေအနေ၊ ငွေကြေးဖောင်းပွမှုနှင့် ပြည်ပငွေလဲလှယ်မှုနှုန်း ထားများတွင် သေချာရေရာမှုမရှိသဖြင့် ပါကစ္စတန်၏ စီးပွားရေးဖွံ့ဖြိုးတိုးတက်မှုကို ဆိုးရွားစွာ သက်ရောက် ခဲ့သည်။
ပါကစ္စတန် နိုင်ငံရေးမတည်ငြိမ်မှုကို တွေ့ရစဉ်
နိုင်ငံရေး မတည်ငြိမ်မှုနှင့် ထိုအခြေအနေများက ပြည်တွင်း/ပြည်ပ ရင်းနှီးမြှုပ်နှံမှုများကို ထိခိုက်စေခဲ့သည်ဟု လေ့လာသူများက ပြောကြားခဲ့သည်။
နိုင်ငံရေးမတည်ငြိမ်မှုများက
၁၉၈၄ ခုနှစ်မှ ၂၀၁၈ ခုနှစ်အထိ ဒီမိုကရေစီ အစိုးရများနှင့် ဒီမိုကရေစီ မဟုတ်သည့် အစိုးရများ၏ လက်အောက် တွင် နိုင်ငံရေးမတည်ငြိမ်မှုများနှင့် ရင်ဆိုင်နေရသည့် ပါကစ္စတန်နိုင်ငံကို ရင်းနှီးမြှုပ်နှံမှုများ လျော့ကျမှု၊ စီးပွားရေး ကျဆင်းမှုတို့ကို ဖြစ်စေသည့် အခြေအနေသို့ ဆွဲခေါ်သွားခဲ့ကြောင်း ကရာချီမြို့အခြေစိုက် စီးပွားရေးအုပ်ချုပ်မှု အင်စတီကျူ (IBA) ၏ စီးပွားရေး သုံးသပ်ချက် စစ်တမ်းတစ်ရပ်တွင် ဖော်ပြထားသည်။
ကမ္ဘာ့ဘဏ်၏ ၂၀၂၂ ခုနှစ် ကမ္ဘာလုံးဆိုင်ရာ နိုင်ငံရေး တည်ငြိမ်မှုအညွှန်းကိန်းတွင် ပါကစ္စတန်သည် အောက်ဆုံးမှ စတင် ရေတွက်လျှင် အဆင့် ၁၄ နေရာ၌ ရှိခဲ့သည်။
မကြာသေးမီ နှစ်များအတွင်း ပါကစ္စတန်၏ နိုင်ငံရေး အခြေအနေသည် အနည်းငယ် တိုးတက်ခဲ့သော်လည်း ခိုင်မာသည့် ရင်းနှီးမြှုပ်နှံမှုများကို ဆွဲဆောင်နိုင်သည်အထိ လုံလောက်မှုမရှိခဲ့ပေ။
ပါကစ္စတန်နိုင်ငံသားတွေကိုတွေ့ရစဉ်
ဝန်ကြီးချုပ်ဟောင်း နာဝက်ဇ် ရှရစ်ဖ် (Nawaz Sharif) ၏ သမီးဖြစ်သည့် ပန်ဂျပ်ပြည်နယ်ဝန်ကြီးချုပ် နာဝက်ဇ် ကလည်း နိုင်ငံရေး မတည်ငြိမ်မှုသည် အလားအလာရှိသည့် ရင်းနှီးမြှုပ်နှံသူများကို ဟန့်တားနေကြောင်း မကြာသေးမီက ပြောကြားခဲ့သည်။
"နိုင်ငံရေး မတည်ငြိမ်မှုကြောင့် ပြည်တွင်း/ပြည်ပ ရင်းနှီးမြှုပ်နှံသူတွေဟာ ပါကစ္စတန်မှာ ရင်းနှီးမြှုပ်နှံဖို့ စိုးရိမ်နေ ကြပါတယ်" ဟု ၎င်းက ပြောကြားခဲ့သည်။
ကမ္ဘာ့ဘဏ်၏ သတင်းတစ်ရပ်တွင် ပါကစ္စတန်သည် ရင်းနှီးမြှုပ်နှံမှု၌ လုံလောက်မှုမရှိဘဲ ဂျီဒီပီနှင့် ရင်းနှီးမြှုပ်နှံမှု ပမာဏနှိုင်းယှဉ်ပါက ကမ္ဘာ့အနိမ့်ဆုံး နိုင်ငံများစာရင်းတွင် ပါဝင်နေသည်ဟု ဖော်ပြခဲ့သည်။
Source: India Blooms
- By CNI
- Category: စီးပွားရေး
- Hits: 199
တရုတ်၏ ဒေသန္တရအစိုးရကြွေးမြီက ပုဂ္ဂလိကကုမ္ပဏီများကို အထိနာစေ
CNI International News
ဘေကျင်း၊ ဧပြီ ၉
တရုတ်၏ ဆယ်စုနှစ် ၂ စုကြာ ထောင်လွှားသည့် စီမံကိန်းများက ဒေသန္တရအာဏာပိုင်အများစုကို အကြွေးနွံ နစ်စေခဲ့ကာ ပုဂ္ဂလိကစီးပွားရေး လုပ်ငန်းများကို သက်ရောက်စေခဲ့ရုံသာမက အောက်ခြေလူတန်းစား အုပ်ချုပ်မှု အကျပ်အတည်းကိုလည်း ဆိုးရွားစေခဲ့ကြောင်း South China Morning Post(SCMP) မှ ဖော်ပြခဲ့သည်။
ဝူဟန် (Wuhan) တက္ကသိုလ်၏ နိုင်ငံရေးသိပ္ပံနှင့် ပြည်သူ့အုပ်ချုပ်ရေးကျောင်းမှ တွဲဖက်ပါမောက္ခ တစ်ဦးဖြစ်သည့် ဖန်ချွမ် (Feng Chuan) က အရာရှိများ၊ ဒေသခံများ၊ ဒေသန္တရအစိုးရ ဘဏ္ဍာရေး ယန္တရားများ၊ ကန်ထရိုက်တာ များနှင့် ဘဏ်များသည် အကြွေးပိနေသည်ကို တွေ့ရှိခဲ့ပြီးနောက် လူထု၏ ယုံကြည်မှုနှင့် စီးပွားရေးယုံကြည်မှုကို ပြန်လည်တည်ဆောက်ရန် တိုက်တွန်းခဲ့သည်။
"အကြွေးပေးချေဖို့ ဆိုင်းငံ့ခွင့်ဟာ လိုတာထက်ပိုပြီး ဖြစ်ပွားနေတာဟာ လူမှုအုပ်ချုပ်ရေး အနေအထားကို ထိန်းပေးထားတဲ့ အခြေခံယုံကြည်မှုစနစ်ကို ပျက်စီးစေပါတယ်" ဟု ချွမ်က ပြီးခဲ့သည့် သီတင်းပတ်အတွင်း NetEase သတင်းဝက်ဘ်ဆိုက်က ဖော်ပြသည့် ဆောင်းပါးတွင် ရေးသားဖော်ပြခဲ့သည်။
ချွမ်သည် တရုတ်၏ အကြွေးဒဏ်ပိနေသည့် ပြည်နယ်များကို သွားရောက်ပြီး ကွင်းဆင်းလေ့လာခဲ့သည့် ခရီးစဉ်အပြီးတွင် ထိုကဲ့သို့ ကောက်ချက်ချခဲ့ခြင်းဖြစ်သည်။
တရုတ်ပြည်သူတွေကို တွေ့ရစဉ်
ချွမ်၏ ကောက်ချက်ထဲတွင် ကွီကျိုး (Guizhou) ပြည်နယ်၌ ဒေသခံ အာဏာပိုင်အဖွဲ့ထံမှ ချေးငွေ ဒေါ်လာ ၃၀ ဒသမ ၄ သန်းကို ပြန်လည်ရယူရန် ကြိုးပမ်းမှုအဖြစ် ရန်လိုသည့် ပြဿနာဖန်တီးမှုကြောင့် ဖမ်းဆီးခံခဲ့ရသည့် စီးပွားရေးလုပ်ငန်းရှင် အမျိုးသမီးတစ်ဦး၏ ဖြစ်စဉ်လည်း ပါဝင်ခဲ့သည်။
ဒေသန္တရအစိုးရအဖွဲ့၏ ကြွေးမြီသည် တစ်နှစ်ထက်တစ်နှစ် ၁၄ ဒသမ ၃ ရာခိုင်နှုန်း မြင့်တက်လာခဲ့ပြီး ယခုနှစ် ဖေဖော်ဝါရီလ ကုန်ပိုင်းတွင် ဒေါ်လာ ၅ ဒသမ ၇ ထရီလျံအထိ ရှိလာခဲ့သည်ဟု ဘဏ္ဍာရေးဝန်ကြီးဌာန၏ အချက်အလက်များကို ကိုးကားပြီး တရုတ်နိုင်ငံပိုင် ဆင်ဟွာသတင်းအေဂျင်စီက ဖော်ပြခဲ့သည်။
ကြွေးမြီများ မြင့်တက်မှုသည် ဒေသန္တရအာဏာပိုင်များ၏ ထိန်းညှိဆောင်ရွက်မှုများကို ဟန်ချက်ပျက်စေခဲ့ပြီး ကြွေးမြီပြန်လည်ပေးဆပ်မှု၏ အစိုးရအာမခံချက်အပေါ် သက်ရောက်မှုရှိခဲ့သည်။
တရုတ်အစိုးရသည် ထိုအခြေအနေကို လျော့ပါးသက်သာစေရန် ကြွေးမြီအများဆုံး ပြည်နယ်များတွင် အခြေခံ အဆောက်အအုံ စီမံကိန်းများကို ဆိုင်းငံ့ခြင်း၊ အထူးငွေ တိုက်စာချုပ်များ ရောင်းချခြင်းတို့ပြုလုပ်ပြီး အစိုးရအဖွဲ့၏ အားထုတ်ကြိုးပမ်းမှုများကို မြှင့်တင်ခဲ့သည်။
Source: SCMP
- By CNI
- Category: စီးပွားရေး
- Hits: 159
CNI International News
အစ္စလာမ်မာဘက်၊ ဧပြီ ၉
ပါကစ္စတန်နိုင်ငံတွင် စီးပွားရေး အကျပ်အတည်းနှင့် စားဝတ်နေရေး အခြေအနေ ပိုမိုဆိုးရွားလာချိန်တွင် ပြည်သူများအကြား အဆိုးမြင်ဝါဒီများ မြင့်တက်နေကြောင်း Greek City Times မှ ဖော်ပြခဲ့သည်။
မျှော်လင့်ချက် ကင်းမဲ့နေသည့် အချိန်မျိုးတွင် ပါကစ္စတန်ပြည်သူ ၁၀ ဦးတွင် ၁ ဦးသာ နိုင်ငံသည် မှန်ကန်သည့် လမ်းကြောင်းပေါ် ဆက်လက်ရွေ့လျားနေသည်ဟု ယုံကြည်နေကြသည်။
မကြာသေးမီက ပြင်သစ်နိုင်ငံ၊ ပါရီ (Paris) မြို့တော်အခြေစိုက် ကမ္ဘာလုံးဆိုင်ရာ သုတေသနနှင့် ပြည်သူ့ အတွေးအမြင်အဖွဲ့ဖြစ်သည့် Ipsos က ပြုလုပ်ခဲ့သည့် စစ်တမ်းတွင် ထိုကဲ့သို့ ဖော်ပြခဲ့ခြင်းဖြစ်သည်။
ထိုစစ်တမ်းအရ ပါကစ္စတန်၌ လူ ၁၀ ဦးတွင် ၆ ဦးသည် နိုင်ငံ့ စီးပွားရေးအခြေအနေ အားနည်းနေသည်ဆိုသည့် အချက်ကို ဟုတ်မှန်ကြောင်း ဖြေကြားခဲ့ကြသည်ဟုဆိုသည်။
စနစ်တကျ ဖွဲ့စည်းထားသည့် ဖွံ့ဖြိုးတိုးတက်မှု ကာလအဖြစ် သတ်မှတ် လုပ်ဆောင်ခဲ့သော ၅ နှစ်တာကာလ အတွင်း နိုင်ငံ့အခြေအနေ တိုးတက်နေသည်ဟု ယူဆရမည့်အစား ခေတ်နောက်ပြန် ဆွဲနေသည်ဟု စစ်တမ်းတွင် ပါဝင်ဖြေဆိုသူများက ပြောကြားခဲ့သည်။
ပါကစ္စတန်နိုင်ငံသူကို တွေ့ရစဉ်
စီးပွားရေးစိန်ခေါ်မှုများ ဆက်လက် တည်ရှိနေခြင်းက နေ့စဉ်ကုန်ပစ္စည်း ဝယ်ယူမှုများနှင့်အနာဂတ် ရင်းနှီးမြှုပ်နှံမှု များနှင့်ပတ်သက်ပြီး လူထုအကြား စိတ်ပျက်မှုများ ကျယ်ကျယ်ပြန့်ပြန့် ရှိလာစေခဲ့သည်ဟု စစ်တမ်းတွင် ဖော်ပြခဲ့ သည်။
ထို့ပြင် မကြာသေးမီက ပါကစ္စတန်တွင် ပြုလုပ်ခဲ့သည့် ရွေးကောက်ပွဲသည် ပွင့်လင်းမြင်သာမှုနှင့် ယုံကြည်ခိုင်မာမှု တို့နှင့် ပတ်သက်ပြီး လူထု၏ ယုံကြည်ချက်သည် အလွန်နိမ့်ကျနေသည်ဟု ပြောသည်။
နောက်ထပ် ကမ္ဘာလုံးဆိုင်ရာ စစ်တမ်းကောက်ယူမှု သုတေသန ကုမ္ပဏီဖြစ်သည့် Gallup ကလည်း ပါကစ္စတန် နိုင်ငံသား ၃ ပုံ ၂ ပုံကျော်သည် ရွေးကောက်ပွဲဆိုင်ရာ လုပ်ငန်းစဉ်နှင့် ဖက်ဒရယ်အစိုးရ၏ တည်ကြည်ခိုင်မာမှု အပေါ် ယုံကြည်ခြင်း မရှိကြောင်း ဖော်ပြခဲ့သည်။
ထို့အတူ ပြည်ပ၏ တိုက်ရိုက်ရင်းနှီးမြှုပ်နှံမှုကို အဟန့်အတား ဖြစ်စေသည့် နိုင်ငံတည်ငြိမ်မှု ပျက်ယွင်းနေမှုအပေါ် လူထုအကြား ဒေါသထွက်နေပြီး ထိုအခြေအနေက လက်ရှိကြုံတွေ့နေရသည့် ဘဏ္ဍာရေး အကျပ်အတည်းကို ပိုမို ဆိုးရွားစေခဲ့ကြောင်း စစ်တမ်းတွင် ဖော်ပြခဲ့သည်။
Source: Greek City Times
- By CNI
- Category: စီးပွားရေး
- Hits: 177
CNI International News
ဘေကျင်း၊ ဧပြီ ၈
တရုတ်နိုင်ငံ၏ အိမ်ခြံမြေစျေးကွက်သည် ပြီးခဲ့သည့် ဆယ်စုနှစ်များအတွင်း တစ်ဟုန်ထိုး မြင့်တက်လာမှုကြောင့် ဒါဇင်နှင့်ချီသည့် တရုတ်ဘီလျံနာများသည် ကမ္ဘာ့အချမ်းသာဆုံး ပုဂ္ဂိုလ် ၅၀၀ စာရင်းတွင် ပါဝင်လာခဲ့ကြသည်ဟု Bloomberg မှ ဖော်ပြခဲ့သည်။
သို့သော် မကြာသေးမီနှစ် အနည်းငယ်အတွင်း တရုတ်၏ အိမ်ခြံမြေစျေးကွက် ပြိုလဲမှုကြောင့် တရုတ်၏ အိမ်ခြံမြေ စီးပွားရေး လုပ်ငန်းရှင်များကို ထိခိုက်ခဲ့ပြီး ဒေါ်လာဘီလျံ ၁၀၀ ကျော် ဆုံးရှုံးခဲ့ရသည်။
ထိုလုပ်ငန်းရှင်းများထဲတွင် တရုတ်၏ အကြီးဆုံး အိမ်ခြံမြေအကျိုးဆောင် ကုမ္ပဏီများထဲတွင် တစ်ခု အပါအဝင် ဖြစ်သည့် China Evergrande Group ကို ထူထောင်သူဖြစ်ပြီး ထိုကုမ္ပဏီဥက္ကဋ္ဌလည်းဖြစ်သည့် ဟွေ့ကာရန် (Hui Ka Yan) လည်း ပါဝင်ခဲ့သည်။
ဟွေ့၏ ပိုင်ဆိုင်မှုသည် ၂၀၂၀ ပြည့်နှစ်၊ ဒီဇင်ဘာလက ဒေါ်လာ ၂၃ ဒသမ ၃ ဘီလျံအထိ ရှိခဲ့သော်လည်း ၂၀၂၄ ခုနှစ်၊ မတ်လတွင် ဒေါ်လာ ၁ ဒသမ ၁ ဘီလျံအထိ ကျဆင်းသွားခဲ့သည်။
တရုတ် အထပ်မြင့် အဆောက်အအုံများကိုတွေ့ရစဉ်
နောက်ထပ် တစ်ဦးမှာ Dalian Wanda Group ကို ထူထောင်သူလည်းဖြစ် ကုမ္ပဏီဥက္ကဋ္ဌလည်းဖြစ်သည့် ဝမ်ကျန်းလင်း (Wang Jianlin) ဆိုသူဖြစ်သည်။
ဝမ်၏ ပိုင်ဆိုင်မှုသည် ၂၀၂၀ ပြည့်နှစ်၊ ဒီဇင်ဘာလက ဒေါ်လာ ၁၅ ဒသမ ၁ ဘီလျံရှိခဲ့သော်လည်း ၂၀၂၄ ခုနှစ်၊ မတ်လတွင် ဒေါ်လာ ၆ ဒသမ ၃ ဘီလျံအထိ ကျဆင်းသွားခဲ့သည်။
Country Garden ကုမ္ပဏီကို ထူထောင်သူဖြစ်သည့် ယန်းဟွေ့ရန် (Yang Huiyan) သည်လည်း အိမ်ခြံမြေ စျေးကွက် ပြိုလဲမှုတွင် အထိနာခဲ့ရသူ ဖြစ်သည်။
ယန်း၏ ပိုင်ဆိုင်မှုသည် ၂၀၂၀ ပြည့်နှစ်၊ ဒီဇင်ဘာလက ဒေါ်လာ ၃၀ ဘီလျံရှိခဲ့သော်လည်း ၂၀၂၄ ခုနှစ်၊ မတ်လတွင် ဒေါ်လာ ၄ ဒသမ ၃ ဘီလျံအထိ ကျဆင်းသွားခဲ့သည်။
၎င်းတို့ ၃ ဦးအပြင် Longfor Group Holding တွဲဖက်တည်ထောင်သူ ဝူယာကျွန် (Wu Yahun) ၊ Logan Group ဥက္ကဋ္ဌ ကိုင်ဟိုပန် (Kei Hoi Pang) နှင့် Seazen Holdings တည်ထောင်သူ ဝမ်ကျန်းဟွာ (Wang Zhenhua) တို့ အပါအဝင် တရုတ်ဘီလျံနာ ၁၀ ဦးခန့်သည် အိမ်ခြံမြေစျေးကွက် ပြိုလဲမှုကြောင့် ဆုံးရှုံးခဲ့သည့် ပိုင်ဆိုင်မှု စုစုပေါင်း သည် ဒေါ်လာ ၁၀၀ ဘီလျံကျော်အထိ ရှိခဲ့သည်။
Source: Bloomberg
- By CNI
- Category: စီးပွားရေး
- Hits: 189
CNI International News
ပေကျင်း၊ ဧပြီ ၆
တရုတ်နိုင်ငံ၏ စီးပွားရေး တုံ့ဆိုင်းနေမှု အခြေအနေသည် ကမ္ဘာ့စင်မြင့်ထက်တွင် တရုတ်သမ္မတ ရှီကျင့်ဖျင် (Xi Jinping) ကို မျက်နှာပျက်စေခဲ့ကြောင်း Telegraph မှ ဖော်ပြခဲ့သည်။
၁၉၈၉ ခုနှစ်က တီအန်မင် ရင်ပြင် (Tiananmen Square) အရေးအခင်းတွင် တစ်ကမ္ဘာလုံးက တရုတ်ကို ဝိုင်းဝန်း ဆန့်ကျင်ခဲ့ကြ၍ ထိုအချိန်က တရုတ်ခေါင်းဆောင် တိန့်ရှောင်ဖိန် (Deng Xiaoping) သည် ကွန်မြူနစ်ပါတီအား စိတ်ရှည်သည်းခံရန် ပြောကြားခဲ့သည်။
ထိုအလေ့အထသည် တရုတ်နိုင်ငံခြားရေးမူဝါဒအတွက် ဆယ်စုနှစ်များစွာကြာ ကျင့်သုံးလာသည့် အလေ့အထ ဖြစ်ခဲ့ပြီး တရုတ်၏ စီးပွားရေး ပြုပြင်ပြောင်းလဲမှုများနှင့် ဖွံ့ဖြိုးတိုးတက်မှုများအတွက် အဓိကကျသည့် အခန်းကဏ္ဍမှ ပါဝင်ခဲ့သည်။
သို့သော် ရှီ၏ လက်ထက်တွင် စိတ်ရှည်သည်းခံနိုင်မှု အတိုင်းအတာ နည်းပါးခဲ့ပြီး လူစွမ်းကောင်းဝါဒ ပိုမို အားကောင်းလာခဲ့သည်။
အနောက်နိုင်ငံများသည် တရုတ်အား မိတ်ဖက်နိုင်ငံဆိုခြင်းထက် ခြိမ်းခြောက်မှု တစ်ခုအဖြစ် စတင်ရှုမြင်ခဲ့ကြ သည်ဟု တိန့်ရှောင်ဖိန်က ယူဆခဲ့ဖွယ်ရှိသည်။
ရှီကျင့်ဖျင်နဲ့ ဘိုင်ဒန်ကို တွေ့ရစဉ်
ထိုအချက်ကို ရှီသည် လက်ရှိတွင် နားလည်လာပုံပေါ်ပြီး တရုတ်၏ စီးပွားရေး တုံ့ဆိုင်းမှုနှင့် ရန်လိုသည့် နိုင်ငံများ မြင့်တက်လာမှုကို မြင်တွေ့ခဲ့ရသည်ဟု ကျွမ်းကျင်သူများက ပြောကြားခဲ့သည်။
ယခုသီတင်းပတ် အစောပိုင်းက ရှီသည် အမေရိကန်သမ္မတ ဂျိုးဘိုင်ဒန် (Joe Biden) နှင့် နှစ်နာရီနီးပါးကြာ ဖုန်းပြောဆိုခဲ့ပြီး ယခင်ကထက် ပိုမိုရင်းနှီးနွေးထွေးသည့် စကားလုံးများကို အသုံးပြုခဲ့သည်။
ထိုဖုန်းဆက်သွယ် ပြောဆိုမှုသည် နိုဝင်ဘာလက အမေရိကန်နိုင်ငံ၊ ဆန်ဖရန်စစ္စကို (San Francisco) မြို့တွင် ပြုလုပ်သည့် အစည်းအဝေးပြီးနောက် ပထမဆုံးအကြိမ် ရှီနှင့် ဘိုင်ဒန်တို့၏ ဆက်သွယ်ပြောဆိုမှုဖြစ်ပြီး ရှီက အမေရိကန်ကို ကောင်းမွန်သည့် အရာများဖြစ်စေရမည်ဟု ကတိပြုခဲ့သည်။
သို့သော် ရှီသည် ပြည်တွင်းတွင် ပျော်ရွှင်ကျေနပ်ရသည့် အခြေအနေမျိုး မဟုတ်ပေ။ တရုတ်၏ ကြီးမားသည့် အိမ်ခြံမြေအကျိုးဆောင် Evergrande သည် ၂၀၂၁ ခုနှစ်က ၎င်း၏ ပေးဆပ်ရမည့် ကြွေးမြီများကို ပေးဆပ်ရန် ပျက်ကွက်ခဲ့ပြီးနောက် တရုတ်၏စီးပွားရေးသည် တိုးတက်မှုမရှိဘဲ ရုန်းကန်ခဲ့ရသည်။
ထို့ပြင် ရှီသည် စီးပွားရေးကို ပြန်လည်ဦးမော့စေရန် ကြိုးပမ်းနေသည့်တိုင် စားသုံးသူများနှင့် စီးပွားရေး လုပ်ငန်းရှင်များ၏ ယုံကြည်မှုမှာ အနိမ့်ဆုံးအဆင့်အထိ ကျဆင်းမှုနှင့် ရင်ဆိုင်နေရသည်။
Source: Telegraph
- By CNI
- Category: စီးပွားရေး
- Hits: 173
CNI International News
ဘန်ကောက်၊ မတ်လ ၃၀
ထိုင်းနိုင်ငံတွင် ကာစီနိုရုံများကို တရားဝင်ဖွင့်ခွင့်ပေးမည့် ဥပဒေမူကြမ်းကို အစိုးရက ရေးဆွဲမည်ဖြစ်ကြောင်း ထိုင်းအစိုးရအရာရှိတစ်ဦးက ပြောကြားခဲ့သည်ဟု ရိုက်တာမှ ဖော်ပြခဲ့သည်။
ထိုလုပ်ဆောင်ချက်သည် အလုပ်အကိုင် အခွင့်အလမ်းများနှင့် နိုင်ငံ့ဝင်ငွေများကို ပိုမိုများပြား စေနိုင်လိမ့်မည်ဖြစ် သည်။
အဆိုပါ အစီအစဉ်ကို ဝန်ကြီးချုပ် ဆရီသာ သာဗီဆင် (Srettha Thavisin) ကလည်း ထောက်ခံခဲ့သည်။
ကာစီနိုရုံများသည် ထိုင်းတွင် တရားမဝင်ဘဲ အစိုးရက ထိန်းချုပ်ထားသည့် မြင်းပြိုင်ပွဲများကိုသာ လောင်းခွင့်နှင့် ထီကံစမ်းခွင့်များကိုသာ ခွင့်ပြုထားသည်။
ထိုင်းလောင်းကစားရုံကို တွေ့ရစဉ်
သို့သော် တရားမဝင် လောင်းကစားမှုများ၊ ဘောလုံးပွဲ လောင်းမှုများ၊ တရားမဝင် ကာစီနိုရုံများနှင့် ချဲထီ လုပ်ငန်း များမှာ တည်ရှိနေသည်။
လောင်းကစားလုပ်ငန်း အသိုင်းအဝိုင်းကမူ ထိုင်းတွင် တရားဝင် ကာစီနိုရုံများ ခွင့်ပြုပေးလိုက်မည်ဆိုပါက ခရီးသွားများကို ပိုမိုဆွဲဆောင်ရာ၌ အောင်မြင်မှုရရှိမည်ဖြစ်ပြီး ကမ္ဘာ့အကြီးဆုံး လောင်းကစား လုပ်ငန်း တည်ရှိသည့် မက္ကာအိုကို ယှဉ်ပြိုင်နိုင်လိမ့်မည်ဟု ယူဆထားကြသည်။
"နိုင်ငံအတွင်း တရားမဝင် လောင်းကစား လုပ်ငန်းတွေ ရှိနေတယ်ဆိုတာ ကျနော်တို့ ဝန်ခံရပါမယ်။ အဲဒီ တရားမဝင် လောင်းကစား လုပ်ငန်းတွေကို နှိမ်နင်းဖို့ ကြိုးပမ်းနေပေမယ့် ပပျောက်မသွားနိုင်ပါဘူး။ အဲဒါကြောင့် ကျနော်တို့အနေနဲ့ ဒါကို ပြန်လည်သုံးသပ်ဖို့လိုပါတယ်" ဟု ဒုနိုင်ငံခြားရေးဝန်ကြီး ဂျာလူပန် အမ်မော်ဗီဗက် (Julapun Amornvivat)က သတင်းထောက်များကို ပြောကြားခဲ့သည်။
ထိုင်းအလုပ်သမားတွေကိုတွေ့ရစဉ်
ထို့နောက် စင်္ကာပူနိုင်ငံကို အတုယူရမည်ဖြစ်ကြောင်း ၎င်းက ထပ်လောင်း ပြောဆိုခဲ့သည်။
ထိုင်းလွှတ်တော်သည် လောင်းကစား လုပ်ငန်းများနှင့်ပတ်သက်ပြီး လေ့လာမှုများ ပြုလုပ်နေသည့် သတင်း ထွက်ပေါ်လာခဲ့ပြီး ဂီတဖျော်ဖြေရေး ခန်းမများနှင့် မွေထိုင်းလက်ဝှေ့ရုံများ၊ ကြက်တိုက်သည့် နေရာများနှင့် မြင်းပြိုင်ပွဲများကဲ့သို့ အခြားပွဲလမ်းသဘင် အခမ်းအနားများအတွက်လည်း လေ့လာနေကြောင်း သိရသည်။
ထိုအစီအစဉ်တွင် ထိုကဲ့သို့ အဆောက်အအုံများ မည်မျှ တည်ဆောက်မည် ဆိုခြင်းကို အသေးစိတ် ဖော်ပြ မထားသော်လည်း လေဆိပ်များနှင့် ၁၀၀ ကီလိုမီတာ (၆၂) မိုင် အကွာအဝေးအတွင်း ထားရှိရန် အကြံပြု ထားသည်။
ထိုင်းနိုင်ငံသည် ယခုနှစ်အတွင်း ပြည်ပခရီးသွား သန်း ၄၀ လာရောက်စေရန် ရည်မှန်းထားသည်။
ထိုင်းတွင် ယခင်ကလည်း လောင်းကစား လုပ်ငန်းများကို တရားဝင် ခွင့်ပြုရေးအတွက် ဆွေးနွေးခဲ့ဖူးသော်လည်း ပြည်သူများ၏ ဆန့်ကျင် ကန့်ကွက်မှုများကြောင့် အကောင်အထည် ပေါ်လာခဲ့ခြင်းမရှိပေ။
၂၀၂၁ ခုနှစ် ပြည်သူ့သဘောထားဆန္ဒ စစ်တမ်းတွင် ပါဝင်ဖြေဆိုသူ ၄၇ ရာခိုင်နှုန်းက ရာဇဝတ်မှုများကို စိုးရိမ် သဖြင့် လောင်းကစားကို တရားဝင်ခွင့်ပြုရန် ဆန့်ကျင်ခဲ့ပြီး ၂၁ ရာခိုင်နှုန်းက ထောက်ခံခဲ့ကာ ၁၈ ရာခိုင်နှုန်းက လောင်းကစားကို တရားဝင် ခွင့်ပြုမည့် အိုင်ဒီယာကို တစ်စိတ်တစ်ပိုင်း သဘောတူကြောင်း ဖြေကြားခဲ့သည်။
Source: ရိုက်တာ