- By CNI
- Category: စီးပွားရေး
- Hits: 274
CNI International News
ဘန်ကောက်၊ နိုဝင်ဘာ ၁၅
ထိုင်းပြည်သူများကို ဒစ်ဂျစ်တယ်ငွေကြေး ဘတ် ၁၀,၀၀၀ စီ ထောက်ပံ့ပေးဖို့ ဘတ် ၅၀၀ ဘီလျံ ချေးငွေရယူရန် ကြိုးပမ်းနေသည့် အစိုးရအဖွဲ့၏ ဥပဒေမူကြမ်းကို အတည်ပြုနိုင်ရေးအတွက် ညွန့်ပေါင်း မဟာမိတ်ပါတီများ၏ ထောက်ခံမှုကို ရရှိလိမ့်မည်ဟု ယုံကြည်ကြောင်း ထိုင်းဝန်ကြီးချုပ် ဆရီသာ သာဗီဆင် (Sritha Thavisin)က ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။
ဖြူးထိုင်းပါတီ ဦးဆောင်သည့် ညွန့်ပေါင်းအစိုးရအဖွဲ့သည် အောက်လွှတ်တော်တွင် မဲ ၃၂၀ ကို ရရှိထားသည်။
လွန်ခဲ့သည့် ဆယ်စုနှစ်အတွင်း နှစ်စဉ် ၁ ဒသမ ၉ ရာခိုင်နှုန်း ဖွံ့ဖြိုးတိုးတက်ခဲ့သည့် နိုင်ငံ၏ စီးပွားရေးကို လှုံ့ဆော်ရန်အတွက် ပြည်သူများအား ဒစ်ဂျစ်တယ်ငွေကြေး ထောက်ပံ့ပေးရန် လိုအပ်သည်ဟု ဆရီသာက အမေရိကန်နိုင်ငံ ဆန်ဖရန်စစ္စကိုမြို့သို့ နိုဝင်ဘာ ၁၃ ရက် ညပိုင်းက သွားရောက်ခဲ့သည့် လေယာဉ်ပေါ်တွင် ပြောကြားခဲ့သည်။
ခိုင်မာသည့် စီးပွားရေး ဖွံ့ဖြိုးတိုးတက်မှုမရှိဘဲ ထိုင်းနိုင်ငံသည် ပြည်ပ ရင်းနှီးမြှုပ်နှံမှုများကို ဆွဲဆောင်နိုင်မည် မဟုတ်ကြောင်းလည်း ဆရီသာက ပြောသည်။
MFP ပါတီ၏ ဒုတိယခေါင်းဆောင် သီရိကန်ယာ တန်ဆာခွန်ကို တွေ့ရစဉ်
ထိုင်းဗဟိုဘဏ် (Bank of Thailand) အုပ်ချုပ်ရေးမှူးကလည်း ပြည်သူများအား ဒစ်ဂျစ်တယ်ငွေကြေး ထောက်ပံ့ ရေး စီမံကိန်းအတွက် ရန်ပုံငွေရရှိရန် အစိုးရအနေနှင့် ငွေချေးသင့်ကြောင်း အကြုံပြုခဲ့သည်ဟု ဆရီသာက ပြော သည်။
အတိုက်အခံ Move Forward(MFP)ပါတီ၏ ဒုတိယခေါင်းဆောင် သီရိကန်ယာ တန်ဆာခွန် (Sirikanya Tansakun) ကမူ အစိုးရ၏ ဒစ်ဂျစ်တယ်ငွေကြေး ထောက်ပံ့ရေး စီမံကိန်းသည် အကောင်အထည် ပေါ်လာနိုင်မည် မဟုတ်ကြောင်း၊ လွှတ်တော်တွင် ပယ်ချခံရနိုင်ကြောင်း ပြောကြားခဲ့သည်။
သို့သော် ဆရီသာကမူ သီရိကန်ယာ၏ ပြောကြားမှုကို တုန့်ပြန်ခဲ့ရာတွင် "အစိုးရအဖွဲ့မှာ ဥပဒေမူကြမ်းကို အတည်ပြုနိုင်ဖို့အတွက် လွှတ်တော်အတွင်း ထောက်ခံမဲ ၃၂၀ ရှိနေလိမ့်မယ်ဆိုတာ ကျနော်ယုံကြည်ပါတယ်" ဟု ပြောကြားခဲ့သည်။
အစိုးရသည် ဒစ်ဂျစ်တယ်ငွေကြေး ထောက်ပံ့ရေး စံသတ်မှတ်ချက်များကို ပြန်လည်သုံးသပ်နေပြီး ပြည်သူများ၏ အသံကို နားထောင်နေသည့်အတွက် ထိုစီမံကိန်းသည် နှောင့်နှေးကြန့်ကြာ နိုင်သည်ဟုလည်း ဆရီသာက ပြော ကြားခဲ့သည်။
ပြည်သူများကို ဒစ်ဂျစ်တယ်ငွေကြေးများ ထောက်ပံ့ပေးမည့် အစီအစဉ်ကို ယခင်သတ်မှတ်ထားသည့် ကာလထက် ၃ လနောက်ကျပြီး ၂၀၂၄ ခုနှစ်၊ မေလတွင် စတင်နိုင်လိမ့်မည်ဟုလည်း ဆရီသာက ပြောကြားခဲ့သည်။
Source: ဘန်ကောက်ပို့စ်
- By CNI
- Category: စီးပွားရေး
- Hits: 291
CNI International News
ဝါရှင်တန်၊ နိုဝင်ဘာ ၁၄
ကမ္ဘာလုံးဆိုင်ရာ စီးပွားရေး အခြေအနေသည် ကျိုးပျက်လွယ်သည့် အနေအထားသို့ ရောက်ရှိနေချိန်တွင် အာရှ-ပစိဖိတ် စီးပွားရေး ပူးပေါင်းဆောင်ရွက်မှု (APEC) အစည်းအဝေးတွင် ကမ္ဘာ့စီးပွားရေး အင်အားအကြီးဆုံး ၂ နိုင်ငံ ဖြစ်သည့် အမေရိကန်နှင့် တရုတ်သည် တင်းမာမှုများကို လျှော့ချဖွယ်ရှိသည်ဟု အေပီမှ ဖော်ပြခဲ့သည်။
အမေရိကန်နှင့် တရုတ်သည် ကမ္ဘာ့ကုန်စည်များနှင့် ဝန်ဆောင်မှု လုပ်ငန်း စုစုပေါင်း၏ ၄၀ ရာခိုင်နှုန်းကျော်ကို လည်ပတ်လုပ်ဆောင်နေခြင်းကြောင့် ဖြစ်သည်။
ထို့ကြောင့် အမေရိကန်နှင့် တရုတ်အကြား စီးပွားရေးဆိုင်ရာ ပဋိပက္ခဖြစ်ပွားလာခဲ့မည်ဆိုပါက ကျန်သည့် ကမ္ဘာ့နိုင်ငံအားလုံးသည် ထိုပဋိပက္ခ၏ သက်ရောက်မှုကို ခံစားရမည်ဖြစ်သည်။
ကုန်သွယ်ရေးသင်္ဘောများကိုတွေ့ရစဉ်
စစ်စင်တွင် အမေရိကန်-တရုတ် ကုန်သွယ်ရေးကြောင့် ကမ္ဘာလုံးဆိုင်ရာ စီးပွားရေးသည် အကျိုးအမြတ်များစွာ ရရှိခဲ့သည်ဟု ကျွမ်းကျင်သူများက ပြောကြားခဲ့သည်။
၂၀၂၀ ပြည့်နှစ်က COVID-19 ကပ်ရောဂါ စတင်ဖြစ်ပွားလာခဲ့ပြီးနောက် ငွေကြေးဖောင်းပွမှုများ၊ ဘဏ်အတိုးနှုန်း မြင့်တက်မှုများနှင့်အတူ လက်ရှိ ရုရှား-ယူကရိန်းစစ်ပွဲ၊ အစ္စရေး-ဟားမာ့စ် စစ်ပွဲတို့သည် ကမ္ဘာ့စီးပွားရေးကို ဆိုးရွားစွာ ထိခိုက်စေခဲ့သည်။
လက်ရှိ အခြေအနေများအရ ကမ္ဘာလုံးဆိုင်ရာ စီးပွားရေး ဖွံ့ဖြိုးတိုးတက်မှုနှုန်းသည် ယခုနှစ်အတွင်း ၃ ရာခိုင်နှုန်း သာ တိုးတက်ဖွယ်ရှိပြီး ၂၀၂၄ ခုနှစ်တွင် ၂ ဒသမ ၉ ရာခိုင်နှုန်းအထိ လျော့ကျသွားနိုင်သည်ဟုလည်း နိုင်ငံတကာ ငွေကြေးရန်ပုံငွေအဖွဲ့ (IMF) က ပြောကြားခဲ့သည်။
"အခုလို အခြေအနေမျိုးမှာ ကမ္ဘာ့စီးပွားရေး အင်အားအကြီးဆုံးဖြစ်တဲ့ အမေရိကန်နဲ့ တရုတ်အကြား ထိပ်တိုက် တွေ့နေမယ်ဆိုရင် ကမ္ဘာ့စီးပွားရေးကို ထိခိုက်စေနိုင်တဲ့ ပထဝီနိုင်ငံရေး တင်းမာမှုတွေအပေါ် ဆိုးရွားပြင်းထန်စွာ ရိုက်ခတ်နိုင်ပါတယ်"ဟု အမေရိကန်နိုင်ငံ နယူးယောက်မြို့ရှိ ကော်နဲလ် တက္ကသိုလ် (Cornell University) မှ ကုန်သွယ်ရေး မူဝါဒဆိုင်ရာ ပါမောက္ခ အက်စ်ဝါ ပရာဆက် (Eswar Prasad) က ပြောကြားခဲ့သည်။
APEC ညီလာခံကျင်းပရန် ပြင်ဆင်နေစဉ်
ထို့ကြောင့် အမေရိကန်နှင့် တရုတ်သည် နိုဝင်ဘာ ၁၈ ရက်တွင် စတင်မည့် APEC အစည်းအဝေးတွင် နှစ်နိုင်ငံ အကြား စီးပွားရေး တင်းမာမှုအချို့ကို လျှော့ချနိုင်လိမ့်မည်ဟု မျှော်လင့်ရကြောင်း ကျွမ်းကျင်သူများက သုံးသပ်ခဲ့ သည်။
ထိုအစည်းအဝေးကို ပစိဖိတ်ရပ်ဝန်းမှ နိုင်ငံပေါင်း ၂၁ နိုင်ငံ တက်ရောက်မည်ဖြစ်ပြီး ထိုနိုင်ငံများ၏ စီးပွားရေး အင်အား စုစုပေါင်းသည် ကမ္ဘာ့လူဦးရေ၏ ၄၀ ရာခိုင်နှုန်းနှင့် ကမ္ဘာလုံးဆိုင်ရာ ကုန်သွယ်မှု တန်ဖိုး၏ ၅၀ ရာခိုင်နှုန်းရှိသည်။
Source: အေပီ
- By CNI
- Category: စီးပွားရေး
- Hits: 283
CNI International News
ပေကျင်း၊ နိုဝင်ဘာ ၈
တရုတ်သည် ပတ်လမ်းရပ်ဝန်း စီမံကိန်း (Belt and Road Initiative - BRI) တွင် အမေရိကန်ဒေါ်လာ ၁ ထရီလျံ ကျော် အကြွေးရရန် ရှိခဲ့သည်ဟု ဘန်ကောက်ပို့စ်မှ ဖော်ပြခဲ့သည်။
ယခုသီတင်းပတ်အတွင်း ထွက်ပေါ်လာသည့် သတင်းတစ်ရပ်အရ ကြွေးမြီ စုစုပေါင်း၏ ၈၀ ရာခိုင်နှုန်းခန့်သည် ထိုစီမံကိန်းအား ထောက်ခံသည့် နိုင်ငံများကို ဘဏ္ဍာရေးအရ ထောက်ပံ့ပေးခဲ့ခြင်း ဖြစ်သည်ဟု ဖော်ပြခဲ့သည်။
လွန်ခဲ့သည့် ဆယ်စုနှစ်တစ်စုက တရုတ်သမ္မတ ရှီကျင့်ဖျင် (Xi Jinping) က စတင် အကောင်အထည်ဖော်ခဲ့သည့် ကမ္ဘာလုံးဆိုင်ရာ ကြီးမားကျယ်ပြန့်သည့် အခြေခံအဆောက်အအုံ စီမံကိန်းဖြစ်သည့် BRI တွင် ဥရုဂွေးနိုင်ငံမှအစ သီရိလင်္ကာနိုင်ငံအဆုံး နိုင်ငံပေါင်း ၁၅၀ ခန့် ပါဝင်လက်မှတ် ရေးထိုးခဲ့သည်ဟု တရုတ်က ပြောသည်။
Belt and Road Initiative – BRI စီမံကိန်းအရ အဆောက်အအုံများကို တွေ့ရစဉ်
ထိုစီမံကိန်း၏ ပထမဆယ်စုနှစ်အတွင်း တရုတ်သည် ဝင်ငွေနိမ့်နှင့် ဝင်ငွေ အလယ်အလတ်ရှိသည့် နိုင်ငံများတွင် တံတားများ၊ ဆိပ်ကမ်းများနှင့် အဝေးပြေးလမ်းများ ဆောက်လုပ်ရေးအတွက် ချေးငွေများစွာ ထုတ်ပေးခဲ့သည်။
သို့သော် ထိုချေးငွေများထဲမှ ထက်ဝက်ကျော်သည် မူဘောင်အရ အကြွေးပြန်ဆပ်ရမည့်် အချိန်ကာလသို့ ရောက်ရှိ လာခဲ့သည်ဟု ဝီလျံနှင့် မေရီ ဗာဂျီးနီးယား ကောလိပ် (Virginia's College of William and Mary) မှ ဘဏ္ဍာရေး ဖွံ့ဖြိုးတိုးတက်မှုကို လေ့လာသည့််ဌာနမှ သုတေသနအဖွဲ့ဖြစ်သည့် AidData က နိုဝင်ဘာ ၆ ရက်တွင် သတင်း ထုတ်ပြန် ခဲ့သည်။
မြို့ပြ ဖွံ့ဖြိုးမှုကိုတွေ့ရစဉ်
ထိုချေးငွေ ပြန်ဆပ်ရမည့် စုစုပေါင်း ပမာဏသည် ဆယ်စုနှစ်တစ်စု ကုန်ဆုံးချိန်တွင် ၇၅ ရာခိုင်နှုန်းအထိ ရှိလာ လိမ့်မည်ဟု ထုတ်ပြန်ချက်၌ ဖော်ပြခဲ့သည်။
တရုတ်သည် နိုင်ငံပေါင်း ၁၆၅ နိုင်ငံတွင် စီမံကိန်းပေါင်း ၂၁၀၀၀ ခန့်ကို ငွေကြေးထောက်ပံ့ပေးခဲ့ပြီး လက်ရှိမှာ တော့ တရုတ်သည် ဝင်ငွေနိမ့်နှင့် ဝင်ငွေ အလယ်အလတ်ရှိသည့် နိုင်ငံများကို ဒေါ်လာ ၈၀ ဘီလျံခန့် အကြွေးဆပ် ရန် ဆိုင်းငံ့ပေးခဲ့ကြောင်း AidData က ပြောကြားခဲ့သည်။
အမေရိကန်ကမူ ထိုနိုင်ငံများကို တစ်နှစ်လျင် ဒေါ်လာ ၆၀ ဘီလျံ ထောက်ပံ့ပေးခဲ့သည်။
"တရုတ်ဟာ ကမ္ဘာပေါ်က အကြီးဆုံး မြီရှင်နိုင်ငံ ဖြစ်လာခဲ့ပါတယ်။ ဖွံ့ဖြိုးဆဲနိုင်ငံတွေက တရုတ်ကို ပြန်လည် ပေးဆပ်ရမယ့် အကြွေးပမာဏဟာ ဒေါ်လာ ၁ ဒသမ ၁ ထရီလျံထက်မနည်း ရှိခဲ့ပါတယ်" ဟု AidData က ထုတ်ပြန်ခဲ့သည်။
Source: ဘန်ကောက်ပို့စ်
- By CNI
- Category: စီးပွားရေး
- Hits: 303
CNI International News
ဘန်ကောက် ၊ နိုဝင်ဘာ ၇
မြန်မာ၊ လာအို ၊ ကမ္ဘောဒီးယားနှင့် ဗီယက်နမ်နိုင်ငံတို့မှ ရွှေ့ပြောင်းလုပ်သားများအတွက် ဗီဇာ လျှောက်ထားခနှင့် သက်တမ်းတိုးခ ဈေးနှုန်းများကို နိုဝင်ဘာ ၁၁ ရက်မှစပြီး ဘတ် ၅၀၀ အထိ လျှော့ချပေးသွားမည်ဟု ထိုင်း အလုပ်သမားရေးရာဌာန၏ ယာယီညွှန်ကြားရေးမှူးချုပ် ဆွမ်ချိုင် မိုရက်ကော့စရီဝမ် (Somchai Morakotsriwan) က ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။
ရွှေ့ပြောင်းလုပ်သားများအတွက် ဗီဇာခ အပြောင်းအလဲကို အောက်တိုဘာ ၂၇ ရက် နေ့စွဲဖြင့် ထိုင်းနန်းတော်က တော်ဝင်အမိန့်ပြန်တမ်း ထုတ်ပြန်ခဲ့ခြင်းဖြစ်ပြီး ထိုအမိန့်ပြန်တမ်းသည် နိုဝင်ဘာ ၁၁ ရက်မှစပြီး နောက်ထပ် ၄ နှစ် အထိ အကျုံးဝင် သက်ရောက်မည်ဖြစ်ကြောင်း မစ္စတာ ဆွမ်ချိုင်းက ပြောကြားခဲ့သည်။
ထိုင်းရောက် ရွှေ့ပြောင်းလုပ်သားများကိုတွေ့ရစဉ်
မြန်မာ၊ လာအို ၊ ကမ္ဘောဒီးယားနှင့် ဗီယက်နမ်နိုင်ငံတို့နှင့် အလုပ်သမားရေး ပူးပေါင်းဆောင်ရွက်သည့် နားလည်မှု စာချွန်လွှာအရ ထိုင်းအလုပ်သမားရေးရာဝန်ကြီး ဖီဖတ် ရတ်ချာကစ်ပရာကန် (Phiphat Ratchakitprakan) က အဆိုပြုတင်သွင်းခဲ့သည့် ထိုအစီအစဉ်ကို အောက်တိုဘာ ၃ ရက်က အစိုးရအဖွဲ့၏ ကြေညာချက် ထုတ်ပြန်အပြီး တွင် အကောင်အထည်ဖော်ခဲ့ခြင်း ဖြစ်သည်။
ထိုင်းရောက် ရွှေ့ပြောင်းလုပ်သားများကိုတွေ့ရစဉ်
နိုဝင်ဘာ ၁၁ ရက်ကစပြီး ဗီဇာတင်သွင်းမှုများကို ဘတ် ၂၀၀၀ မှ ဘတ် ၅၀၀ အထိလျှော့ချပေး သွားမည်ဖြစ်ပြီး ၂ နှစ်အထိ အကျုံးဝင်မည်ဖြစ်သည်။ ဗီဇာသက်တမ်းတိုးခကို ဘတ် ၁၉၀၀ မှ ဘတ် ၅၀၀ အထိ လျှော့ချပြီး ၂ နှစ် သက်တမ်းပေးမည်ဖြစ်သည်။
ထိုကဲ့သို့ ဗီဇာ လျှောက်ထားခနှင့် သက်တမ်းတိုးခများကို လျှော့ချခြင်းသည် အလုပ်သမားများ၏ အသုံးစရိတ်ကို လျှော့ချပေးလိုသည့် ရည်ရွယ်ချက်ဖြစ်ပြီး ထိုင်းနိုင်ငံ၏ စီးပွားရေးကို ပြန်လည်ထူထောင်ရန် အထောက်အကူ ဖြစ်စေလိမ့်မည်ဟု ဆွမ်ချိုင်က ပြောကြားခဲ့သည်။
Source: ဘန်ကောက်ပို့စ်
- By CNI
- Category: စီးပွားရေး
- Hits: 291
CNI International News
ဂျကာတာ၊ နိုဝင်ဘာ ၂
အရှေ့အလယ်ပိုင်းဒေသတွင် ဖြစ်ပွားနေသည့် အစ္စရေး-ဟားမာ့စ် စစ်ပွဲကြောင့် ရေနံဈေးနှုန်းများ မြင့်တက်မှု၊ ကုန်ကျစားရိတ် မြင့်တက်မှုနှင့် ကမ္ဘာလုံးဆိုင်ရာ ဝယ်လိုအားများ တည်ငြိမ်မှုမရှိသည့် အခြေအနေသည် အောက်တိုဘာလအတွင်း အာရှနိုင်ငံများ၏ ကုန်ထုတ်လုပ်ရေး လှုပ်ရှားမှုများကို နှေးကွေးစေခဲ့သည်ဟု ဘန်ကောက်ပို့စ်မှ ဖော်ပြခဲ့သည်။
အာရှဒေသတွင်းရှိ နိုင်ငံအများစုသည် ငွေကြေးဖောင်းပွမှု၊ ထုတ်လုပ်မှုနှင့် အော်ဒါအသစ်များ မှာယူမှု လျော့ကျ ခြင်း အစရှိသည့် ဖိအားများကို ရင်ဆိုင်နေရသည်ဟု S&P Global နှင့် au Jibun ဘဏ်တို့က နိုဝင်ဘာ ၁ ရက်တွင် ထုတ်ပြန်ခဲ့သည့် ကုန်ထုပ်လုပ်မှုဆိုင်ရာ အဝယ်တော် မန်နေဂျာများ၏ ညွှန်းကိန်းများ (PMIs) တွင် ဖော်ပြခဲ့သည်။
တရုတ်နိုင်ငံတွင် ပုဂ္ဂလိက စက်မှုလုပ်ငန်း လှုပ်ရှားမှု စံနှုန်းမှာ မကြုံစဖူး လျော့ကျခဲ့သည်။ ထိုအခြေအနေသည် ကမ္ဘာ့ဒုတိယမြောက် စီးပွားရေး အင်အားအကြီးဆုံး တရုတ်နိုင်ငံ၏ ကျိုးပျက်လွယ်သည့် စီးပွားရေး အခြေအနေကို မီးမောင်းထိုး ပြသရာရောက်ခဲ့သည်။
ဟားမာ့စ် - အစ္စရေး ဒုံးကျည်များဖြင့် အပြန်အလှန်ပစ်ခတ်နေကြစဉ်
ယခုထွက်ရှိလာသည့် အချက်အလက်များသည် ကမ္ဘာလုံးဆိုင်ရာ စီးပွားရေး ဖွံ့ဖြိုးတိုးတက်မှုအတွက် စိတ်ပျက် ဖွယ် လက္ခဏာတစ်ရပ်ဖြစ်ပြီး အစ္စရေး-ဟားမာ့စ် စစ်ပွဲသည် စီးပွားရေးနာလန်ပြန်ထူမှု အခြေအနေကို ခြိမ်းခြောက်ခဲ့သလို ဒေသတွင်း ပိုမိုကြီးမားကျယ်ပြန့်သည့် ပဋိပက္ခတစ်ခု ဖြစ်လာမည့် အရေးအတွက် စိုးရိမ်စိတ် များလည်း မြင့်တက်လာခဲ့သည်။
ကမ္ဘာ့ ကုန်ပစ္စည်းအများစုကို ထုတ်လုပ်သည့် အာရှတိုက်သည် ယခုနှစ်အတွင်း ကုန်ထုတ်လုပ်မှုကို အရှိန်မြှင့်တင် ရန် ရုန်းကန်နေရသည်။
ထို့ပြင် အမေရိကန်နှင့် ဥရောပ အပါအဝင် အဓိက နိုင်ငံတကာ ဈေးကွက်များထံမှ ဝယ်လိုအား ကျဆင်းမှု အခြေအနေကိုလည်း အာရှနိုင်ငံများ ရင်ဆိုင်နေရသည်။
PMI အချက်အလက်များတွင် အောက်တိုဘာလအတွင်း ဂျပန်နှင့် တောင်ကိုရီးယားတို့၏ စီးပွားရေး ကျုံ့ဝင်မှု အမှတ်သည် ၄၈ ဒသမ ၇ နှင့် ၄၉ ဒသမ ၈ မှတ်အဖြစ် အသီးသီး သတ်မှတ်ဖော်ပြထားပြီး စက်တင်ဘာလနှင့် နှိုင်းယှဉ်ပါက အပြောင်းအလဲ အနည်းငယ်သာ ရှိခဲ့သည်။
ကားထုတ်တဲ့စက်ရုံကိုတွေ့ရစဉ်
PMI အချက်အလက်များတွင် အမှတ် ၅၀ နှင့်အထက်သည် စီးပွားရေး လှုပ်ရှားမှု မြင့်တက်သည့် အခြေအနေကို ညွှန်ပြခြင်းဖြစ်ပြီး အမှတ် ၅၀ အောက်သည် စီးပွားရေးကျုံ့ဝင်မှုကို ညွှန်ပြခြင်းဖြစ်သည်။
"မြင့််တက်နေတဲ့ ငွေကြေးဖောင်းပွနှုန်းဟာ ကုန်ကြမ်းပစ္စည်းတွေရဲ့ ဈေးနှုန်းတွေကို မြင့်တက်စေခဲ့ပါတယ်။ အထူး သဖြင့် ရေနံနဲ့ ဆက်နွှယ်တဲ့ ကုန်ကြမ်းပစ္စည်းတွေ ဈေးနှုန်းမြင့်တက် လာခဲ့ပါတယ်" ဟု S&P Global Market Intelligence မှ စီးပွားရေးပညာရှင် အူစမာ ဘာတီ (Usamah Bhatti) က ပြောကြားခဲ့သည်။
ဒေသတွင်း စီးပွားရေး မောင်းနှင်အား တစ်ခုဖြစ်သည့် အိန္ဒိယနိုင်ငံသည်လည်း ကုန်ပစ္စည်းဈေးနှုန်းများ မြင့်တက် နေသော အခြေအနေကို အနည်းနှင့်အများဆိုသလို ခံစားခဲ့ရသည်။
အောက်တိုဘာလအတွင်း အိန္ဒိယ၏ PMI အညွှန်းကိန်းသည် ၅၅ ဒသမ ၅ အောက်သို့ လျော့ကျခဲ့သည်။
ဗီယက်နမ်၊ မြန်မာနှင့် ထိုင်းနိုင်ငံတို့၏ PMI များသည် ဆိုးရွားခဲ့ပြီး မလေးရှားနိုင်ငံ၏ PMI သည် အပြောင်းအလဲ မရှိပေ။
အင်ဒိုနီးရှား တစ်နိုင်ငံတည်းသာ အောက်တိုဘာလအတွင်း PMI အညွှန်းကိန်း မြင့်တက်ခဲ့သည်။
Source: ဘန်ကောက်ပို့စ်
- By CNI
- Category: စီးပွားရေး
- Hits: 317
CNI International News
ကရာမာတော့စ်၊ အောက်တိုဘာ ၂၇
ရုရှားနှင့် စစ်ပွဲဖြစ်ပွားနေချိန်တွင် ယူကရိန်း၏ ရှေ့တန်းစစ်မြေပြင်အနီးရှိ ကရာမာတော့စ် (Kramatorsk) မြို့တွင် စီးပွားရေးလုပ်ငန်းရှင်များသည် လုပ်ငန်းလည်ပတ်ရန် အခက်အခဲများနှင့် ရင်ဆိုင်နေရသည်ဟု အေပီမှ ဖော်ပြခဲ့ သည်။
ထိုမြို့ရှိ အဆောက်အအုံများသည် ရုရှား၏ တိုက်ခိုက်မှုများကြောင့် ထိခိုက်ပျက်စီးနေပြီး ဇွန်လအတွင်းကလည်း ယူကရိန်းအရှေ့ပိုင်းရှိ ပီဇာဆိုင်တစ်ဆိုင်ကို ရုရှား၏ ပဲ့ထိန်းဒုံးကျည်တစ်စင်း ထိမှန်မှုကြောင့် လူ ၁၃ ဦး သေဆုံးခဲ့ သည်။
သေဆုံးသူများထဲတွင် စာပေဆုရှင် ယူကရိန်းစာရေးဆရာ တစ်ဦးနှင့် ဆယ်ကျော်သက် အချို့ ပါဝင်ခဲ့သလို သေဆုံးသူများထဲမှ ၇ ဦးသည် ဆိုင်ဝန်ထမ်းများ ဖြစ်သည်။
လက်ရှိတွင် ထိုပီဇာဆိုင်၏ ဝင်ပေါက်နေရာ၌ သေဆုံးသူများအတွက် ရည်စူးသည့် ပန်းများနှင့် ဝမ်းနည်းအောင့်မေ့ ဖွယ် စာသားများကို ရေးသားထားသည်။
ရုရှားဒုံးကျည် ကျရောက်ပေါက်ကွဲလို့ ပီဇာဆိုင်မှာ သေဆုံးခဲ့သူများကို အောက်မေ့ဖွယ် ဂုဏ်ပြုထားစဉ်
"စီးပွားရေးသမားတစ်ဦး အနေနဲ့ဆိုရင် ဆိုင်ခန်းထိခိုက် ပျက်စီးသွားတဲ့အတွက် ဝမ်းနည်းမိပါတယ်။ ဒါပေမယ့် ဒီထက်ပိုဆိုးတာက အစားပြန်မရနိုင်တော့တဲ့ လူ့အသက်တွေပါ ဆုံးရှုံးသွားခဲ့တာ ပိုပြီး ဝမ်းနည်းရပါတယ်" ဟု RIA Pizza ဆိုင်ပိုင်ရှင် ဒီမီထရို အာနက်တန်ကို (Dmytro Ihnatenko) က ပြောကြားခဲ့သည်။
ထိုပီဇာဆိုင်ကို ဒုံးကျည်ထိမှန်ခဲ့သည့် ဖြစ်စဉ်သည် ဒွန်းနက်စ် (Donetsk) ၏ ရှေ့တန်းစစ်မြေပြင်အနီးရှိ ကရာမာတော့စ်မြို့တွင် စီးပွားရေးလုပ်ငန်းများအတွက် အန္တရာယ်ရှိနေသည့် အခြေအနေကို ပြသရာ ရောက်ခဲ့ သည်။
သို့သော်လည်း စီးပွားရေး လုပ်ငန်းရှင်များသည် ၎င်းတို့၏ လုပ်ငန်းများကို မပိတ်ဘဲ ဆက်လက် လည်ပတ် လုပ်ကိုင်နေကြဆဲ ဖြစ်သည်။
ပီဇာဆိုင် ဒုံးကျည်မှန်လို့ ပျက်စီးထားစဉ်
လက်ရှိတွင် ကရာမာတော့စ်မြို့အတွင်း စားသောက်ဆိုင် ၅၀ နှင့် ဈေးဆိုင် ၂၂၈ ဆိုင် ဖွင့်လှစ်ထားဆဲ ဖြစ်သည်ဟု မြို့ကောင်စီအဖွဲ့က ခန့်မှန်းခဲ့သည်။
ထိုအရေအတွက်သည် ပြီးခဲ့သည့်နှစ်ကထက် ဆိုင်ခန်းအရေအတွက် သုံးဆ ပိုမိုမြင့်တက်လာခြင်း ဖြစ်သည်။
"အန္တရာယ်များတယ်ဆိုတာ ကျနော်တို့ သိပါတယ်။ ဒါပေမယ့် ဒီလုပ်ငန်းတွေဟာ ကျနော်တို့ရဲ့ ဘဝဖြစ်တာ ကြောင့် အရဲစွန့်ပြီး ဆက်လက် လုပ်ကိုင်နေတာပါ"ဟု ကရာမာတော့စ်မြို့ရှိ White Burger ဘာဂါဆိုင် အုပ်ချုပ်ရေးမှူး အိုလန်နာ ဇီယာဘင်နာ (Olena Ziabina) က ပြောကြားခဲ့သည်။
Source: အေပီ
- By CNI
- Category: စီးပွားရေး
- Hits: 259
CNI International News
ရောမ၊ အောက်တိုဘာ ၂၃
အီတလီဝန်ကြီးချုပ် ဂျော်ဂျီယာ မယ်လိုနီ (Giorgia Meloni) ၏ ဝန်ကြီးချုပ်အဖြစ် တာဝန်ထမ်းဆောင်သည့် တစ်နှစ်ပြည့် နှစ်ပတ်လည်တွင် အီတလီနိုင်ငံသည် စီးပွားရေး ဖွံ့ဖြိုးတိုးတက်မှု အားနည်းခြင်း၊ ကြွေးမြီမြင့်တက် ခြင်း အစရှိသည့် ပြဿနာများနှင့် ရင်ဆိုင်နေရသည်ဟု ရိုက်တာမှ ဖော်ပြခဲ့သည်။
အီတလီ၏ သမိုင်းကြောင်းတွင် ပထမဆုံးအကြိမ် အမျိုးသမီး ဦးဆောင်သည့် အစိုးရအဖွဲ့ဖြစ်သည့် မယ်လိုနီ၏ ညွန့်ပေါင်းအစိုးရသည် ပြီးခဲ့သည့်နှစ်က ပြုလုပ်ခဲ့သော ရွေးကောက်ပွဲ၌ သောင်ပြိုကမ်းပြို အနိုင်ရခဲ့ပြီးနောက် အာဏာရလာခဲ့သည်။
ထို့ပြင် အီတလီတွင် ဒုတိယကမ္ဘာစစ်က အာဏာရှင် ဘီနင်တို မူဆိုလီနီ (Benito Mussolini) ၏ အစိုးရအဖွဲ့ နောက်ပိုင်း မယ်လိုနီ၏ အစိုးရအဖွဲ့သည် လက်ယာစွန်း အရောက်ဆုံး အစိုးရအဖွဲ့အဖြစ် ရှုမြင်ခံခဲ့ရသည်။
အီတလီဝန်ကြီးချုပ် ဂျော်ဂျီယာ မယ်လိုနီနဲ့ ဘိုင်ဒန်ကို တွေ့ရစဉ်
အဘယ်ကြောင့်ဆိုသော် မယ်လိုနီ၏ Brothers of Italy ပါတီသည် ဖက်ဆစ်ခေတ်လွန် Italian Social Movement (MSI) ကို အခြေခံပြီး ဖွဲ့စည်းခဲ့ခြင်းကြောင့် ဖြစ်သည်။
ထို့ကြောင့် မယ်လိုနီ၏ အစိုးရအဖွဲ့သည် အစွန်းရောက်မှု ရှိနိုင်သည်ဆိုသည့် ပြည်ပနိုင်ငံများ၏ စိုးရိမ်မှုများကို လျော့ပါး သက်သာစေရန် ကြိုးပမ်းနေရပြီး အနောက်နိုင်ငံလိုလားပြီး ဥရောပသမဂ္ဂနှင့် ဆက်ဆံရေး ကောင်းမွန် စေရန် လုပ်ဆောင်လျက်ရှိသည်။
"ကျမတို့ဟာ ပြည်သူတွေရဲ့ ယုံကြည်မှုကို ရရှိအောင် မနားမနေ လုပ်ဆောင်နေပြီး မတူကွဲပြားတဲ့ အီတလီနိုင်ငံကို ထူထောင်ဖို့ ကြိုးပမ်းခဲ့ပါတယ်" ဟု မယ်လိုနီက ယခုသီတင်းပတ်အတွင်း မိန့်ခွန်း ပြောကြားခဲ့သည်။
ဂျော်ဂျီယာ မယ်လိုနီ ဦးဆောင်တဲ့ အစိုးရအဖွဲ့ကိုတွေ့ရစဉ်
သို့သော် COVID-19 ကပ်ရောဂါမှ နာလန်ပြန်ထူရန် ကြိုးပမ်းနေသည့် အီတလီ၏ စီးပွားရေး အခြေအနေသည် နှေးကွေးနေပြီး ယခုနှစ် ဒုတိယ သုံးလပတ်ကာလတွင် ပြည်တွင်း ဂျီဒီပီသည် ၀ ဒသမ ၄ ရာခိုင်နှုန်း ကျုံ့သွားခဲ့ သည်။
ထို့ပြင် အီတလီ၏ စီးပွားရေး ဖွံ့ဖြိုးတိုးတက်မှုနှုန်းသည် ၂၀၂၄ ခုနှစ်တွင် ဥရောပဇုန်အတွင်း အနိမ့်ဆုံးအဆင့်အထိ ကျဆင်းသွားဖွယ် ရှိသည်ဟုလည်း စီးပွားရေးကျွမ်းကျင်သူများက သုံးသပ်ခဲ့သည်။
"အီတလီအစိုးရအတွက် စီးပွားရေးပြဿနာဟာ အခက်ခဲဆုံး ဖြစ်လာပါလိမ့်မယ်။ အစိုးရဟာ ဒီပြဿနာကို ဖြေရှင်းဖို့ ထိရောက်တဲ့ အစီအစဉ် မရှိသေးပါဘူး" ဟု ရောမမြို့ရှိ LUISS တက္ကသိုလ်မှ စီးပွားရေးပါမောက္ခ တစ်ဦး ဖြစ်သူ ဗလန်တီနာ မယ်လီစီယန်နီ (Valentina Meliciani) က ပြောကြားခဲ့သည်။
Source: ရိုက်တာ
- By CNI
- Category: စီးပွားရေး
- Hits: 287
CNI International News
ဘေဂျင်း၊ အောက်တိုဘာ ၂၀
တရုတ်၏ Belt and Road Initiative (BRI) စီမံကိန်းအောက်တွင် တရုတ်နှင့် ပူးပေါင်းဆောင်ရွက်မှုကို ပိုမို မြှင့်တင်မည်ဟု ထိုင်းဝန်ကြီးချုပ် ဆရီသာ သာဗီဆင်က ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။
ဘေဂျင်းမြို့တော်တွင် ပြုလုပ်သည့် Belt and Road စီးပွားရေးဖိုရမ်ကို တက်ရောက်နေသော ဆရီသာက ထိုင်းနိုင်ငံ၏ မြေပြင်ဆက်သွယ်ရေး စီမံကိန်းကို လျစ်လျူမရှုရန်လည်း တရုတ်ရင်းနှီးမြှုပ်နှံသူများကို တိုက်တွန်း ခဲ့သည်။
ထိုင်းဘဏ္ဍာရေးဝန်ကြီး ရာထူးကိုလည်း ရယူထားသည့် မစ္စတာ ဆရီသာသည် တတိယအကြိမ်မြောက် နိုင်ငံ တကာ ပူးပေါင်းဆောင်ရွက်ရေး Belt and Road ဖိုရမ်တွင် "သဘာဝပတ်ဝန်းကျင်နှင့် လိုက်လျောညီထွေရှိသည့် အစိမ်းရောင် ပိုးလမ်းမ စီမံကိန်း" (Green Silk Road for Harmony with Nature) ဟု အမည်တပ်ထားသည့် ထိပ်သီးအဆင့် ဆွေးနွေးပွဲတွင် အထက်ပါအတိုင်း ပြောကြားခဲ့ခြင်းဖြစ်သည်။
တရုတ်အမျိုးသား ကွန်ဗန်းရှင်း စင်တာ (China National Convention Center) တွင် အောက်တိုဘာ ၁၈ ရက်က ပြုလုပ်ခဲ့သည့် ထိုဆွေးနွေးပွဲ၌ ဆရီသာက အရေးကြီးသည့် အချက်များကို အလေးထား ပြောဆိုခဲ့သည်။
ထိုင်း-တရုတ် ဆက်ဆံရေးကို သရုပ်ပြသစဉ်
ဆရီသာ အဆိုပြုခဲ့သည့် ထိုင်း၏ ဦးစားပေး လုပ်ဆောင်ရမည့် အချက်များတွင် သယ်ယူပို့ဆောင်ရေး၊ စွမ်းအင်နှင့် အခြေခံ အဆောက်အအုံကဏ္ဍ အပါအဝင် စီးပွားရေးလှုပ်ရှားမှု အားလုံးမှတစ်ဆင့် ကုန်ထုတ်လုပ်ရေးနှင့် စားသုံးမှု နှုန်းကို တိုးမြှင့်ရန် ပါဝင်သည်။
နည်းပညာသစ်များ၊ ဒစ်ဂျစ်တယ် အသွင်ကူးပြောင်းရေးတို့သည် တန်ဖိုးမဖြတ်နိုင်သည့် အခန်းကဏ္ဍမှ ပါဝင် ကာ ဖန်လုံအိမ် ဓာတ်ငွေ့ထုတ်လွှတ်မှု လျှော့ချရေးတို့သည်လည်း ထိုင်းနိုင်ငံ၏ ဦးစားပေး ကိစ္စရပ်များထဲတွင် ပါဝင် သည်ဟု ဆရီသာက ပြောသည်။
ထို့ပြင် ထိုင်းနိုင်ငံသည် သဘာဝပတ်ဝန်းကျင်နှင့် ဂေဟနစ်ကို ထိန်သိမ်းရေးတို့၏ အရေးကြီးပုံကိုလည်း အသိအမှတ်ပြုကြောင်း ထိုင်းဝန်ကြီးချုပ်က ဆက်လက် ပြောဆိုခဲ့သည်။
ထိုင်းနိုင်ငံအနေနှင့် သဘာဝအတိုင်း စိမ်းလန်းစိုပြေသည့် သစ်ပင်သစ်တောများ ရှိသည့်နေရာကို တစ်နိုင်ငံလုံး အတိုင်းအတာအနေနှင့် ၅၅ ရာခိုင်နှုန်းအထိ တိုးမြှင့်ရန် ရည်ရွယ်ထားကြောင်း၊ ပင်လယ်ရေကြောင်းနှင့် ကမ်းရိုးတန်း ဇီဝမျိုးကွဲများကို ကာကွယ်ထိန်းသိမ်းမှုကိုလည်း တိုးမြှင့်လုပ်ဆောင်သွားမည်ဟု ဆရီသာက ကတိပြုခဲ့သည်။
ထိုင်းနိုင်ငံသည် များပြားလှသည့် စီမံကိန်းများအတွက် ဒေါ်လာ ၁၂ ဒသမ ၅ ဘီလျံအထိ လျာထားချက်ကို တိုးမြှင့် ခဲ့ပြီး မကြာမီတွင် နောက်ထပ် ဈေးကွက်များကိုလည်း မြှင့်တင်သွားမည်ဟု ထိုင်းဝန်ကြီးချုပ်က ပြောကြားခဲ့သည်။
Source: ဘန်ကောက်ပို့စ်
- By CNI
- Category: စီးပွားရေး
- Hits: 315
CNI International News
ပေကျင်း၊ အောက်တိုဘာ ၁၉
ထိုင်းဝန်ကြီးချုပ် ဆရီသာ သာဗီဆင် (Srettha Thavisin) က ရုရှားသမ္မတ ဗလာဒီမာ ပူတင် (Vladimir Putin) အား လာမည့်နှစ်တွင် ထိုင်းသို့ လာရောက်လည်ပတ်ရန် ဖိတ်ကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။
ယူကရိန်းကို ရုရှားက ကျူးကျော်ခဲ့ပြီးနောက် ပူတင်သည် နိုင်ငံတကာ အသိုင်းအဝိုင်းနှင့် ဆက်ဆံရေး ပြတ်တောက်ခဲ့ကာ မဟာမိတ်နိုင်ငံ အနည်းငယ်နှင့်သာ ဆက်ဆံမှုများ ပြုလုပ်ခဲ့သည်။
ယူကရိန်းမှ ထောင်နှင့်ချီသည့် ကလေးများကို နယ်နှင်ခဲ့သည်ဆိုသည့် စွဲချက်များကြောင့် ပူတင်ကို နိုင်ငံတကာ ရာဇဝတ်မှုခုံရုံး (ICC) က ဖမ်းဝရမ်း ထုတ်ခဲ့သည်။
ထိုင်းနိုင်ငံရှိ ဖူးခက်ကျွန်းကို တွေ့ရစဉ်
ICC Rome Statute အဖွဲ့ဝင် မဟုတ်သည့် ထိုင်းနိုင်ငံသည် ရုရှားနှင့် ပူးပေါင်း ဆောင်ရွက်မှုများကို ဆက်လက် ထိန်းသိမ်းထားခဲ့သည်။
ဆရီသာနှင့် ပူတင်တို့သည် အောက်တိုဘာ ၁၇ ရက်နေ့ ညပိုင်းက ဘေဂျင်းတွင် ပြုလုပ်သည့် တရုတ်၏ Belt and Road ဖိုရမ်၌ တွေ့ဆုံခဲ့ပြီး ကုန်သွယ်ရေးနှင့် ယဉ်ကျေးမှု ဆက်ဆံရေးများကို မြှင့်တင်ရန် ဆွေးနွေးခဲ့သည်။
"ကျနော် သူ့(ပူတင်)ကို နောက်နှစ်ထဲမှာ ထိုင်းကို လာလည်ဖို့ ဖိတ်ကြားထားပါတယ်။ သမ္မတပူတင်ဟာ ဖူးခက် (Phuket) ကို နှစ်သက်ပြီး မကြာခဏ လာရောက်လေ့ရှိတာ ကျနော် သိပါတယ်" ဟု ဆရီသာက ထိုင်း၏ အပန်းဖြေ ကျွန်းဖြစ်သည့် ဖူးခက်ကို ရည်ညွှန်းပြောကြားခဲ့သည်။
ထိုင်းအစိုးရက ထုတ်ပြန်ချက်တွင် ပူတင်သည် ဆရီသာ၏ ဖိတ်ကြားချက်ကို လက်ခံခဲ့သော်လည်း ထိုင်းသို့ မည်သည့် အချိန်တွင် လာရောက်မည်ကို ရက်အတိအကျ မသတ်မှတ်ရသေးကြောင်း ဖော်ပြခဲ့သည်။
ထိုင်းဝန်ကြီးချုပ် ဆရီသာ သာဗီဆင်နဲ့ ရုရှားသမ္မတ ဗလာဒီမာ ပူတင်ကို တွေ့ရစဉ်
၎င်းတို့နှစ်ဦး၏ အစည်းအဝေးအတွင်း ပူတင်က တည်ငြိမ်မှုမရှိသည့် နိုင်ငံတကာ အခြေအနေများကြောင့် နှစ်နိုင်ငံအကြား ကုန်သွယ်ရေးကျဆင်းမှုကို ဝမ်းနည်းကြောင်း ပြောကြားခဲ့သည်ဟု ရုရှား၏ တာ့စ် သတင်း အေဂျင်စီက ဖော်ပြခဲ့သည်။
ထိုင်းသည် မကြာသေးမီက ရုရှားနိုင်ငံသားများအတွက် ဗီဇာ အစီအစဉ်များကို အပြောင်းအလဲ ပြုလုပ်ခဲ့သည်။
ရုရှားနိုင်ငံသားများကို ထိုင်းတွင် နေထိုင်ခွင့်ကာလအား ယခင်က ရက်ပေါင်း ၃၀ သတ်မှတ်ပေးခဲ့ရာမှ ယခုအခါ တွင် ၃ လအထိ တိုးမြှင့်ပေးခဲ့သည်။
ယခုနှစ်အတွင်း ရုရှားနိုင်ငံသား တစ်သန်းကျော်သည် ခရီးသွားလုပ်ငန်းကို မှီခိုသည့် ထိုင်းနိုင်ငံသို့ လာရောက် လည်ပတ်ခဲ့ကြသည်။
Source: ဘန်ကောက်ပို့စ်
- By CNI
- Category: စီးပွားရေး
- Hits: 336
CNI International News
နယူးဒေလီ၊ အောက်တိုဘာ ၁၈
အိန္ဒိယဝန်ကြီးချုပ် မိုဒီ (Narendra Modi) သည် နိုင်ငံ၏ ပင်လယ်ရေကြောင်း ကဏ္ဍအတွက် နှစ်ရှည် အစီအစဉ် တစ်ခု၏ တစ်စိတ်တစ်ပိုင်းအနေနှင့် ရူပီး ၂၃၀ ဘီလျံ (ဒေါ်လာ ၂ ဒသမ ၇ ဘီလျံ)ချီ တန်ဖိုးရှိသည့် ပင်လယ်ရေ ကြောင်း စီမံကိန်းများအတွက် အုတ်မြစ်ချ အခမ်းအနားကို အောက်တိုဘာ ၁၇ ရက်က ပြုလုပ်ခဲ့သည်ဟု အာတီ သတင်းဌာနမှ ဖော်ပြခဲ့သည်။
Covid-19 ကပ်ရောဂါနှင့် အနောက်နိုင်ငံများ၏ ပိတ်ဆို့မှုဆိုင်ရာ မူဝါဒများကြောင့် ထောက်ပံ့ရေး ကွင်းဆက်များ ထိခိုက်ခဲ့ပြီးနောက် အိန္ဒိယသည် ယုံကြည်အားထားရပြီး ရေရှည်တည်တံ့သည့်် ထောက်ပံ့ရေး ကွင်းဆက်တစ်ခုကို ထူထောင်ရန် ရည်ရွယ်လျက်ရှိသည်။
မွမ်ဘိုင်း (Mumbai) မြို့တွင် သုံးရက်ကြာပြုလုပ်သည့် Maritime India Summit 2023 ညီလာခံဖွင့်ပွဲ၌ မိုဒီက ရင်းနှီးမြှုပ်နှံသူများကို အိန္ဒိယသို့ လာရောက်ရန်၊ ဖွံ့ဖြိုးတိုးတက်ရေးအတွက် အတူတကွ လက်တွဲလုပ်ဆောင်ရန် တိုက်တွန်းခဲ့သည်။
Maritime India Summit 2023 ညီလာခံ ကျင်းပနေစဉ်
"ကမ္ဘာ့အခင်းအကျင်းသစ်ဟာ ပေါ်ထွက်လာပြီဖြစ်ပြီး ကမ္ဘာတစ်ခုလုံးဟာလည်း ရည်မှန်းချက် အသစ်တွေနဲ့အတူ အိန္ဒိယနဲ့ လက်တွဲလုပ်ဆောင်ဖို့ စီစဉ်နေပါတယ်။ အိန္ဒိယဟာ ကမ္ဘာ့အင်အားအကြီးဆုံး ထိပ်သီးစီးပွားရေးနိုင်ငံ သုံးနိုင်ငံထဲမှာ ပါဝင်ဖို့ နီးစပ်လာပါပြီ"ဟု မိုဒီက ပြောကြားခဲ့သည်။
ထို့ပြင် အိန္ဒိယ၏ ပင်လယ်ရေကြောင်းဆိုင်ရာ စွမ်းဆောင်ရည်များသည် ယခင်ကတည်းက ကမ္ဘာအတွက် အထောက်အကူ ဖြစ်စေခဲ့ပြီး အိန္ဒိယအစိုးရသည် ပင်လယ်ရေကြောင်းကဏ္ဍကို ပိုမိုခိုင်မာစေရန် ကိုးနှစ်ကျော်ကြာ အားထုတ်ကြိုးပမ်းခဲ့သည်ဟုလည်း မိုဒီက ပြောသည်။
ထိုအားထုတ် ကြိုးပမ်းမှုများအနက် အကြီးစားသင်္ဘောများ ပိုမိုဆိုက်ကပ်နိုင်မည့် ဆိပ်ကမ်းအကြီးစားများ တည်ဆောက်မှုကို နှစ်ဆမြှင့်တင်ရန်၊ ဆိပ်ကမ်းနှင့် ဆက်သွယ်ထားသည့် ကားလမ်းကြောင်းများကို ပိုမို ဖောက်လုပ်ရန်နှင့် ကမ်းရိုးတန်းရှိ အခြေခံ အဆောက်အအုံများကို ပိုမိုတိုးချဲ့ရန် အစီအစဉ်များ ပါဝင်သည်ဟု အိန္ဒိယဝန်ကြီးချုပ်က ပြောသည်။
မိုဒီကို တွေ့ရစဉ်
ထို့ပြင် ယခုနှစ် စက်တင်ဘာလက နယူးဒေလီမြို့တော်တွင် ပြုလုပ်ခဲ့သည့် စက်မှုထိပ်သီးနိုင်ငံ-၂၀ (G-20) ခေါင်းဆောင်များ အစည်းအဝေး၌ အိန္ဒိယက အဆိုပြုခဲ့သော အိန္ဒိယ-အရှေ့အလယ်ပိုင်း-ဥရောပ စီးပွားရေးစင်္ကြန့် (India-Middle East-Europe Economic Corridor- IMEC) အစီအစဉ်၏ သဘောထားကိုလည်း မိုဒီက အလေး ထား ပြောခဲ့သည်။
မိုဒီသည် အိန္ဒိယအနောက်ပိုင်း ဂူဂျာရတ်(Gujarat) ပြည်နယ်ရှိ ဒင်းဒါယဲလ် ဆိပ်ကမ်းအာဏာပိုင်အဖွဲ့ (Deendayal Port Authority) ၏ Tuna Tekra ရေနက်ဆိပ်ကမ်းတွင် ပြုလုပ်သည့် အုတ်မြစ်ချ အခမ်းအနားကို ဦးဆောင် ပြုလုပ်ခဲ့ခြင်း ဖြစ်သည်။
အိန္ဒိယ၏ ဒေါ်လာဘီလျံချီ တန်ကြေးရှိသည့်် ပင်လယ်ရေကြောင်းဆိုင်ရာ စီမံကိန်းများအနက် ဂူဂျာရတ်ပြည်နယ် တွင် ရူပီး ၄၅ ဘီလျံ (ဒေါ်လာ သန်း ၅၄၀) တန်ကြေးရှိသော ဆိပ်ကမ်းတစ်ခုကို တည်ဆောက်မည် ဖြစ်သည်။
Source: အာတီ